Puetyi ova Isilayeli ankho vekahi koukonde Mombambilonia, vapita momahetaiko omanyingi, ekolelo liavo. Sadrake, na Mesake na Abedeneku, avayumbwa mofolono yatokota unene. Anthi, Huku evepolomo nomuenyo. Konyima, etyi Ombambilonia yateyuapo nova Medo Persia, Daniele ayumbwa meleva lio nonkhiyama. Mahi, Huku tupu emuamena, mokuaika omilungu viononkhiyama.

Okuhulako, Siru ohamba yo Persia, wayovola ova Isilayeli. Avakondoka motyilongo tyavo, konyima yomanima 70, tunde puetyi vatualwa oukonde Kombambilonia. Otyipuka tyotete valinga etyi vehika mo Jelusalei, okupindulapo ondyuo ya Yehova. Anthi, onondyale ambuya okutalameka ovilinga viavo. Moluotyo, ondyuo ya Huku yapwa vala, konyima yomanima 22 tunde puetyi vakondoka mo Jelusalei.

Komutue, matukelilongesa kombinga youngendi wa Esdra, wokukondoka ko Jelusalei opo akahiuise ondyuo ya Huku. Otyo tyapita konyima yomanima 45, tunde puetyi ondyuo ya Huku yapwa. Etyi papita omanima 13, tunde poungendi wa Esdra, Neemia eya okukuatesako ova Isilayeli okupindulapo ovimato vio Jelusalei. Onthele ya TANO ina ehipululo liomanima 152, alo pomuvo oo.