PAPITA omanima evali tunde etyi Ombambilonia yatambulwa nova Medo nova Persia. Pahe tala, oityi tyikahi nokupita apa? Ovaisilayeli vekahi nokutunda Mombambilonia. Oñgeni vetyivila okuyovoka? Olie weveyeka vaye?

Siru, ohamba yo Persia, oe wevetuma okuenda. Etyi nkhele Siru ehenetyitwe, Isaia omuuli wa Yehova, wahoneka kombinga ya Siru okuti: ‘Ove mokalinga etyi nahanda. Omapito maakala aikuka, opo unyingile mepundaumbo.’ Siru wakala onkhalamutue movilwa viokunyingila Mombambilonia. Omafualali oko Medo noko Persia anyingila mepundaumbo olio kounthiki. Vakuata pombundi, mokonda ankho omapito veevasa aikuka.

Tupu omuuli wa Yehova Isaia, wati Siru makatuma okukapindulapo o Jelusalei nondyuo ya Huku. Okuti Siru alingi umue tyili ngotyo? Enga. Siru watolela ova Isilayeli okuti: ‘Pahe, endei ko Jelusalei mukapindulepo ondyuo ya Yehova, Huku yenyi.’ Ovaisilayeli ava polutalatu olu, otyo mavakalinga.

Mahi, ova Isilayeli aveho ankho vokukahi mo Mbambilonia, kavetyivilile okukondoka ko Jelusalei. Mokonda oungendi oo ankho omunene unene. Ankho pena ono kilometu 800. Iya ovanthu vamue ankho vakulupa, ovakuavo vavela. Ngotyo, ankho kavetyili okulinga oungendi oo omunene. Tupu vamue kavetyivilile okuenda, mokonda yomahunga omakuavo vali. Mahi, Siru wapopila vana ankho vahapondola okuenda okuti: ‘Avelei ava mavaende o olu no palata noviawa ovikuavo, opo vakatunge o Jelusalei nondyuo ya Huku.’

Ngotyo, ova Isilayeli vana ankho vekahi mondyila yokuenda ko Jelusalei, vapewa ovipuka ovinyingi. Tupu, Siru wevekondolela ono kopo mbuna Nambukondonosole apolele mondyuo ya Yehova, puetyi ateyapo o Jelusalei. Moluotyo, ovanthu ankho vena ovipuka ovinyingi pala okutyinda.

Konyima yonohanyi ononkhuana mboungendi, ova Isilayeli vehika mo Jelusalei. Ankho papita omanima 70, tunde etyi epundaumbo liahanyaunuapo. Ankho otyilongo tyesalele tyihena omunthu nawike. Pahe ankho ova Isilayeli vakondoka motyilongo tyavo muene. Anthi, ankho vakevelela okupita movitateka vimue viatena, ngetyi matukelilongesa komutue.