OVAKUENDYE ava vetatu uvehinangela? Enga, omapanga a Daniele, una waanyene ovikulia viohamba. Ova Mbambilonia ankho veveluka Sadrake, Mesake na Abedeneku. Mahi, pahe nkhele vetala tupu polutalatu apa. Omokonda yatyi, kavafendela otyilolo etyi, ngetyi vakuavo aveho vekahi nokulinga? Tutalei omokonda yatyi.

Ove uhinangela ovitumino vina Yehova ahonekele, vitiwa Ovitumino Ekwi? Otyitumino tyotete tyati: ‘Wahafende ono huku ononkhuavo. Una yokufenda vala ame.’ Ovakuendye ava, vekahi nokutavela otyitumino otyo, namphila katyapepukile okutyilinga.

Nambukondonosole ohamba yo Mombambilonia, ankho wakonga ovanthu ovanyingi vana vakolela, opo veye okufenda otyilolo etyi atungisa. Wapopila ovanthu aveho okuti: ‘Tyina mueiva ononkhuino, noharpa, novipuka ovikuavo viokuhika vikahi nokuhika, onue amuho nyongamenei pohi, iya amufende otyilolo etyi tyo olu. Una wahanyongamene, nokufenda otyilolo etyi, mayumbwa mofolono yatokota unene.’

Etyi Nambukondonosole etyiiva okuti Sadrake na Mesake na Abedeneku, kavafendele otyilolo, anumana unene. Atumu okuveeta ponthele yae. Eveavela vali omphitilo onkhuavo yokufenda otyilolo. Mahi, ovakuendye ovo, vayumba onthumbi mu Yehova. Avapopila Nambukondonosole okuti: ‘Huku yetu ou tukahi nokuumbila, upondola okutuyovola. Mahi, namphila ketuyovolele, onthue kamatufende otyilolo tyove tyo olu.’

Nambukondonosole okutyiiva otyo, anumana vali unene nkhele. Ankho pena ofolono imue ikahi popepi, atumu okuti: ‘Tokotesei ofolono oyo ovikando epanduvali, tyipona etyi itokautale.’ Aholovona pomafualali ae ovalume vapama unene, opo vakute Sadrake, na Mesake na Abedeneku, veveyumbe mofolono. Ofolono ankho yatokota unene. Iya ovalume ovo ankho vokuapama unene avankhi nomutemo wofolono. Mahi, oityi tyapita novakuendye vana vetatu, vayumbwa mokati kofolono?

Etyi ohamba atala mokati kofolono, akala nouoma omunene. Iya apulu okuti: ‘Katuayumbile mofolono ovanthu vetatu vakutwa?’

Ovaundapi vae avakumbulula okuti: ‘Enga, tuayumbamo.

Ohamba ati: Mahi, ame pahe ndyiete ovalume vekuana vekahi nokuendaenda. Kavakutilwe, tupu kavekahi nokupia. Omulume wakuana ulinga ngo huku.’ Iya ohamba afuene ponthele yombundi yofolono, aihana peulu okuti: ‘Sadrake! Mesake! Abedeneku! Vaumbili va Huku Omukulami, lupukeimo.’

Etyi valupukamo, aveho avamono okuti otupia katueveyokele. Okuhulako ohamba ati: ‘Huku ya Sadrake, na Mesake na Abedeneku, ankhimanekwe. Watuma oandyu yae opo iveyovole. Mokonda kavafendele o huku onkhuavo. Vafenda vala Huku yavo muene.’

Ongelaka oyo ongwa yokukolela mu Yehova, haiyoko tuesukisa okulandula?