YESU ankho watalama pala okupululukuapo ponthele yonyombo mo Samaria. Ovalongwa vae vaya mokati kepundaumbo pala okukalanda okulia. Omukai ou Yesu ekahi nokutomphola nae weya okutapa omaande. Yesu apopila omukai okuti: ‘Ndyavelevo omeva ndyinuepo.’

Otyo atyihuvisa unene omukai ou. Utyii omokonda yatyi? Omokonda Yesu omu Judeu, iya omukai owoko Samaria. Otyinyingi tyova Judeu ankho veliyele nova Samaritano. Ankho ni kavapopi navo! Anthi Yesu ankho uhole ovanthu aveho. Moluotyo, wapopia okuti: ‘Inkha wanoñgonokele olie ukahi nokukuita omaande, ove ñgeno wemuita omaande omuenyo.’

Omukai ati: ‘Tatekulu, onyombo yaya kohi, ove ni utupu ombaliti. Opi mokapola omaande omuenyo?’

Yesu akumbulula okuti: ‘Inkha unwa omaande omonyombo ei mokala vali nohunga. Mahi, omeva mandyikupe atuala omunthu komuenyo wahapu.’

Omukai ati: ‘Tatekulu, ndyavelevo omeva atyo oo. Opo nahakale vali nohunga. Andyiheya vali ponyombo apa okutapa omaande.’

Omukai ankho wasoka okuti Yesu ukahi nokupopia kombinga yomaande okunwa. Anthi, Yesu ankho ukahi nokupopia kombinga yotyili tya Huku Nouhamba wae. Otyili otyo tyipondola okuavela omunthu omuenyo wahapu.

Yesu pahe atolela omukai okuti: ‘Enda, kaihane omulume wove iya okondoka.’

Omukai akumbulula okuti: ‘Ame ndyitupu omulume.’

Yesu ati: ‘Wakumbulula nawa. Ankho wanepelue novalume vetano, iya pahe omulume ukahi nae hawoveko.’

Omukai wahuva, mokonda atyiho Yesu apopia otyili. Mahi, oñgeni Yesu ankho anoñgonoka ovipuka ovio? Omokonda Yesu oyouna Huku alaele okutuma pano pohi. Moluotyo o Huku wemutolela ovipuka ovio. Pomuvo watyo oo, ovalongwa va Yesu vakondoka. Avahuvu etyi vamona Yesu ukahi nokutomphola nomukai woko Samaria.

Otyo tyitulongesa tyi? Tyitulongesa okuti Yesu uhole ovanthu vovivala aviho. Nonthue otyo tuna yokulinga. Tuhasokei okuti ovanthu vamue onondingavivi mokonda vena otyivala otyikuavo. Yesu uhanda ovanthu aveho vanoñgonoke otyili tyituala komuenyo wahapu. Nonthue tuna yokukuatesako ovanthu okunoñgonoka otyili.