OKAMUKAINTHU aka weete apa kena omanima 12. Yesu wakuata mokuoko kuae, iya me yae na tate yae vatalama ponthele yae. Utyii omokonda yatyi vahambukilwa unene? Tutalei.

Tate yo kamukainthu aka ankho omulume umue omunene potyilongo, ankho utiwa o Jailu. Onthiki imue omona wae wavela, tyokukala poula. Mahi, ankho kekahi nokuveluka. Ankho ukahi nokuvilapo vali. Jailu nomukai wae ankho vasukalala unene, mokonda omona wavo womukainthu ankho ukahi nonkunkhia. Ankho vena vala omona oo. Ngotyo, Jailu akataindya Yesu, mokonda weiva omahuviso alinga.

Jailu avasi Yesu pokati potyinyingi otyinene tyovanthu. Mahi, Jailu etyivili okulamba ovanthu ovo akakuatelela monomphai mba Yesu. Ati: ‘Omona wange wavela unene.’ Aiti okuti: ‘Mbambavo, endyu ukemuvelule.’ Yesu emupopila okuti maende.

Puetyi ankho vaenda, ovanthu vatualako nokuvehitikinya. Liwa liwa Yesu atalama. Iya apulu: ‘Olie wankhuata?’ Yesu weiva okuti epondolo liemutunda. Moluotyo wanoñgonoka okuti pena omunthu umue wemukuata. Mahi olie? Ankho omukai umue wavela omanima 12. Omukai oo, weya akuate movikutu via Yesu iya aveluka.

Otyo tyapameka Jailu, mokonda wamona okuti pala Yesu okuvelula omunthu katyipuiya. Iya akuiya onkhuanangolo imue, aitolela Jailu okuti: ‘Uhapitikise vali Yesu, omona wove wankhiale.’ Yesu etyiivi, iya apopila Jailu okuti: ‘Uhasukalale, omona wove makala nawa.’

Etyi vehika keumbo lia Jailu, ovanthu avahimbika okulila nokankhenda. Mahi Yesu apopi okuti: ‘Muhalilei. Omona kankhile, ulele vala.’ Anthi, ovanthu avayolo nokulinga Yesu omukuele, mokonda ankho vetyii okuti omona wankhia.

Iya Yesu atuala tate na me yokamukainthu, nono apostolu mbae ononthatu mondyuo ankho mulele omona. Yesu akuate peke liae apopi okuti: ‘Pindukapo.’ Iya omona akala nomuenyo, ngetyi uluete polutalatu apa. Apindukapo iya ahimbika okuenda. Otyo me yae na tate yae vahambukilwa unene.

Ou hamunthuko wotete Yesu atutilisa. Ombimbiliya ipopia okuti omunthu wotete atutilisa, omona womuhepe umue ankho ukala mepundaumbo lio Naim. Konyima, Yesu atutilisa tupu Lasalu omphange ya Maliya na Marta. Kumbi Yesu akatumina Mouhamba wa Huku, makatutilisa ovanthu ovanyingi. Otyo katyituhambukiswa?