KONYIMA yokuhakula ovamphoki ovo vevali ankho vaita osimola, Yesu waya mepundaumbo limue etutu popepi no Jelusalei. Atolela ovalongwa vae vevali okuti: ‘Endei mepundaumbo, iya mamuvasimo otyiketa tyotyimbulu. Tyikutululei amutyieta kuno.’

Etyi vemuetela otyimbulu, Yesu wavelama kotyimbulu otyo. Iya anyingila mo Jelusalei nokuavelama kotyimbulu. Etyi ehika mepundaumbo, otyinyingi tyovanthu tyeya okumuliepesa. Vamue vapola ovikutu viavo iya aveviyale mondyila. Ovakuavo vateta ovimpha viomiti viomulunga, iya tupu avevipake mondyila, avakaluluka okuti: ‘Huku aavele ononkhaneno onongwa ohamba yeya menyina lia Yehova.’

Kohale, mo Isilayeli ono hamba onomphe mbuhole okulonda kotyiketa tyotyimbulu pala okunyingila mo Jelusalei opo velilekese kovanthu. Etyi otyo Yesu alinga. Iya ovanthu ava, ankho vekahi nokulekesa okuti vahanda Yesu akale ohamba yavo. Anthi haavehoko ankho vetyihanda. Otyo tupondola okutyitala puetyi Yesu anyingila mondyuo ya Huku.

Mondyuo ya Huku, Yesu wavelula ovanthu ankho valemana, no vamphoki. Etyi ovana vetyimona, avahivilika Yesu. Mahi otyo tyanumanesa ono saserdote, avapopila Yesu okuti: ‘Utyiivite etyi ovana ovo vapopia?’

Yesu akumbulula okuti: ‘Enga, ndyityiivite.’ ‘Kamunetange Mombimbiliya onthele imue yati: “Huku matundisa ehiviliko momilungu viovana?”’ Ngotyo, ovana avatualako nokuhivilika ohamba ya Huku.

Onthue katuhande okukala ngovana ovo? Ovanthu vamue mavahande tuyekepo okuivisa ouhamba wa Huku. Mahi, onthue matutualako okupopila vakuetu kombinga yovipuka oviwa Yesu makalinga pala ovanthu aveho.

Etyi Yesu ali pano pohi ankho nkhele omuvo wae wokutumina ngo hamba kaunehikepo. Iya onalupi maukehikapo? Ovalongwa va Yesu ankho vahandele okutyinoñgonoka. Matukelilongesa kombinga yotyo mehipululo lilandulako.