TALA, Yesu waumphama apa. Ukahi nokulongesa ovanthu ava komphunda mo Galileia. Ovanthu ava vaumphama ponthele yae ovalongwa vae. Yesu waholovona 12 opo vakale ono apostolu. Ono apostolu ovalongwa vakolela va Yesu. Ove wii omanyina avo?

Ankho umue o Simau Petulu nondenge yae Andre. Na Tiagu na João, navo ankho opomukulu nondenge. Tupu ankho pena o apostolu onkhuavo utiwa o Tiagu, nomukuavo ankho utiwa o Simau. Ankho pena vali ono apostolu onombali mbutiwa Judas. Umue o Judas Iskaliote, omukuavo o Judas tupu ankho utiwa o Tadeu. Ankho pena vali Filipe na Natanael (tupu ankho utiwa o Mbatolomeu), na Mateusi na Tome.

Etyi atunda ko Samaria, Yesu wahimbika okuivisa okuti: ‘Ouhamba wokeulu ukahi popepi.’ Utyii oityi Ouhamba oo? Outumino wa Huku. Yesu oe ohamba, makatumina keulu no kukaeta ombembwa pano pohi. Ouhamba wa Huku maukapilulula oohi ino aiho aikala omphangu imue ongwa.

Yesu apa ukahi nokulongesa ovanthu kombinga Youhamba wa Huku. Yesu evepopila okuti, likuambelei ngetyi: ‘Tate yetu ukahi keulu, enyina liove lihivilikwe. Ouhamba wove wiye. Ehando liove lilingwe pano pohi, ngetyi likahi nokulingwa keulu.’ Ovanthu ovanyingi vati ‘Elikuambelo lia Tatekulu.’ Ovakuavo veliihana okuti o ‘Tate Yetu.’ Utyivila okupopia elikuambelo olio aliho?

Yesu tupu walongesa ovanthu oñgeni vena yokukala navakuavo. Wati: ‘Etyi uhanda vakuenyi vekulinge, otyo ove una yokuvelinga.’ Kuhambukwa putyina vakuenyi vekulinga ovipuka oviwa? Ngotyo, Yesu wapopia okuti noonthue tuna yokulingila vakuetu ovipuka oviwa. Mouye omupe, ovanthu aveho mavakalinga ovipuka oviwa. Kamatyikakala otyiwa unene?