OU o Yesu Komphunda yo Mindyambi. Ovalume ava vekuana vekahi nae, ono apostolu mbae. O Andre na Petulu pomukulu nondenge, tupu na Tiagu na João pomukulu nondenge. Ondyuo oyo imoneka ngotyo ondyuo ya Huku mo Jelusalei.

Papitale ononthiki onombali tunde apa Yesu anyingila mo Jelusalei nokuavelama kotyimbulu. Ankho omuvali. Komuhuka wonthiki oyo, Yesu ankho waile kondyuo ya Huku. Omo, ono saserdote ambuhande okukuata Yesu opo vemuipae. Mahi, avakala nouoma mokonda ovanthu ankho vehole Yesu.

Yesu aihana ononkhalamutue ombo mbo nongeleya okuti: ‘Ononyoka novana vononyoka.’ Iya Yesu apopi okuti Huku mevehitisa mokonda yovipuka aviho ovivi valinga. Konyima yotyo, Yesu walonda Komphunda yo Mindyambi, iya ono apostolu ombu ononkhuana ambuhimbika okumulinga omapulo. Utyii oityi vapula Yesu?

Ono apostolu vapula kombinga yovipuka vikeya komutue wandyila. Ankho vetyii okuti Yesu makamanako ovivi aviho kombanda yoohi. Mahi, pahe vahandele okunoñgonoka onalupi otyo matyikapita. Onalupi Yesu meya vali opo atumine ngo Hamba?

Yesu ankho utyii okuti ovalanduli vae pano pohi kamavapondola okumumona putyina akondoka. Mokonda makala keulu, iya kamavapondola okumumona. Moluotyo, Yesu watolela ono apostolu mbae ovipuka vimue mavikapita pano pohi putyina amahimbika okutumina ngo Hamba keulu. Ovipuka patyi apopia?

Yesu wapopia okuti makukakala ovita ovinene, nomauvela, nondyala, noungangala, no vinimawe ovinene. Tupu Yesu wapopia okuti onondaka onongwa kombinga Youhamba wa Huku mambukaivisilwa kononthele ambuho mboohi. Ovipuka ovio havioko vikahi nokupita mononthiki mbetu? Ega! Ngotyo, tupondola okukala nonthumbi yokuti Yesu ukahi pahe nokutumina keulu. Apa katutu makamanako ovivi aviho pano pohi.