TALA. Oandyu ei apa yaikula epito liokaleya. Ovalume ava vekahi nokuyovolwa ono apostolu mba Yesu. Matutale omokonda yatyi vapakelwa mokaleya.

Otyo tyapita etyi Yesu anengulila ovalongwa vae ospilitu sandu. Etyi otyo tyaendapo: Ankho okekumbi, Petulu na João vaya kondyuo ya Huku mo Jelusalei. Oko, popepi yombundi ankho pena omulume umue walemana tunde apa atyitwa. Ononthiki ambuho ovanthu vemutyinda avemupake opo pala aite onombongo kovanthu vana vanyingila mondyuo ya Huku. Etyi amona Petulu na João, eveiti onombongo. Oityi ono apostolu mbalinga?

Ono apostolu vatalama iya avemutale. Petulu apopi okuti: ‘Ame ndyitupu onombongo, mahi mandyikuavela etyi ndyinatyo. Menyina lia Yesu, katuka iya oende.’ Petulu akuate mokuoko kuomulume oo, iya oe akatuka liwa liwa ahimbika okueenda. Etyi ovanthu vetyimona, avahuvu no kuhambukwa unene mokonda yehuviso olio.

Petulu apopi okuti: ‘Tualinga ehuviso eli mepondolo lia Huku, una watutilisa Yesu kononkhia.’ Puetyi Petulu na João ankho nkhele vapopia, peya ononkhalamutue mbumue mbo nongeleya. Avanumana unene mokonda Petulu na João ankho vekahi nokutolela ovanthu kombinga ya Yesu okuti watutila. Moluotyo, vakuata ono apostolu avevepake mokaleya.

Etyi tyati komuhuka, ononkhalamutue ombo mbalinga eliongiyo limue enene. Avatumu okueta Petulu na João nomulume una vavelula. Ononkhalamutue mbo nongeleya avapulu okuti: ‘Mualinga ehuviso eli nepondolo patyi?

Petulu evetolela okuti, tualinga ehuviso olio nepondolo lia Huku, una watutilisa Yesu kononkhia. Ono saserdote ankho kambutyii oityi mavalingi, mokonda ankho kavapondola okuanya ehuviso olio. Ngotyo, valondola ono apostolu opo vahapopie vali kombinga ya Yesu, iya aveveyeke.

Monthiki onkhuavo, ono apostolu mbatualako nokuivisa kombinga ya Yesu no kuvelula ovavei. Onondaka kombinga yomahuviso ó ambuliyandyana. Ovanthu vomapundaumbo omakuavo ankho ekahi popepi no Jelusalei, avaeta ovavei vavo pala ono apostolu vevehakule. Otyo tyaetesa onkhi ononkhalamutue mbo nongeleya, avakuate ono apostolu avevepake mokaleya. Mahi kavakalelemo ehimbwe.

Kounthiki oandyu ya Huku yaikula ombundi yokaleya, ngetyi uluete polutalatu olu. Oandyu aiti: ‘Edei kondyuo ya Huku, amutualako nokupopila ovanthu.’ Komuhuka, etyi ononkhalamutue mbo nongeleya vatuma ovalume pala okukapola ono apostolu mokaleya, ono apostolu kambumo. Konyima, ovalume vevevasa vekahi nokulongesa mondyuo ya Huku. Iya ovalume ovo, avaeta ono apostolu mondyuo omu ankho mueliongiya ononkhalamutue mbo nongeleya.

Ononkhalamutue mbo nongeleya avapopi okuti: ‘Onthue tuemuavela elondolo opo muhalongese vali kombinga ya Yesu. Mahi onue mueyulisa o Jelusalei nomalongeso enyi.’ Ono apostolu ambukumbulula okuti: ‘Tuna yokutavela Huku ngo mutumini wetu tyipona okutavela kovanthu.’ Molutyo, ono apostolu mbatualako nokulongesa “onondaka onongwa Mbouhamba wa Huku.” Oyo hangeleka ongwa pala okulandula?