ETYI Petulu na João vatunda pelangalo ankho papakwa otyivimbi tya Yesu, Maliya esalapo aike. Ahimbika okulila. Avendamena mokati kelangalo, ngetyi tuamona polutalatu luehipululo 102. Mokati kelangalo amonomo onoandyu onombali. Ambupulu Maliya okuti: ‘Omokonda yatyi ulilila?’

Maliya akumbulula okuti: ‘Vatyindapo Tatekulu yange, iya ame hityii opi vemutuala.’ Etyi Maliya apiluluka, wamona omulume umue. Omulume oo apulu Maliya okuti: ‘Olie ukahi nokutaindya?’

Maliya wasoka okuti omulume oo uyunga otyikunino, iya hamue oe wapolamo otyivimbi tya Yesu. Moluotyo, apulu okuti: ‘Inkha ove wemupolamo, ntholele opi wemupaka.’ Anthi, tyotyili omulume ó ankho o Yesu. Ankho welipilulula olutu lumue Maliya ahaimbukile. Mahi etyi aihana enyina liae, Maliya aimbuka okuti o Yesu. Wakahateka iya akatolela ovalongwa okuti: ‘Ame namona Tatekulu!’

Konyima, puetyi ovalongwa vevali ankho vaya nokepundaumbo lio Emaus, apamoneka omulume umue aendela kumue navo. Ovalongwa ankho vanumana unene mokonda Yesu walekua. Mahi etyi ankho vaenda, omulume oo wahangununa ovipuka ovinyingi vio Mombimbiliya, iya avivekalesa nawa. Etyi vatalama pala okulia, ovalongwa avaimbuka okuti omulume ou o Yesu. Avehemumono vali opi ayanako. Avakondoka liwa liwa ko Jelusalei opo vakatolele ono apostolu kombinga yae.

Pomuwo watyo ó, tupu Yesu amonekela Petulu. Ovakuavo avahambukwa unene etyi vetyiiva. Ovalongwa vana vevali etyi vakondoka ko Jelusalei vavasa ono apostolu, avevetolela oñgeni tupu Yesu evemonekela mondyila. Iya puetyi ankho nkhele vapopia, utyii oityi tyapitapo?

Tala polutalatu apa. Yesu wamoneka mokati kuondyuo, namphila ombundi ankho yaikwa. Ovalongwa avakala nehambu enene. Mokonda ankho onthiki imue iyangalalesa. Utyii okuvalula ovikando viñgapi Yesu amonekale kovalanduli vae? Wavalula ovikando vitano?

Apostolu Tome ankho kepo etyi Yesu amoneka. Moluotyo, ovalongwa ovakuavo vemutolela okuti: ‘Tuamona Tatekulu.’ Mahi, Tome apopi okuti una yokumona Yesu opo etavele. Etyi papita ononkhiki etyinana ovalongwa ankho vekahi vali kumue mondyuo yaikwa, iya Tome nae ankho omo ekahi. Yesu amoneka mondyuo, pahe Tome etavela.