TALA owato ou ukahi movitateka. Ukahi nokuhanyauka. Uluete ovanthu valombokela momaande? Vamue vehikale kondye. Okuti Paulu opo ekahi? Tutalei oityi tyapita nae.

Hinangela okuti Paulu wakala omanima evali mokaleya mo Sesareia. Konyima, Paulu no nonkhuatwa ononkhuavo valondekwa mowato pala okuenda ko Roma. Etyi vehika popepi no tyilongo tyimue tyikala pokati komeva tyitiwa Kreta, pevevasa epukupuku limue enene. Ankho omphepo imue onene unene iya ovalume avehetyivili vali okuendesa owato. Komutenya kavamwene ekumbi, ni kounthiki kavamwene ononthungululu. Etyi papita ononthiki ononyingi, ovanthu ovo ankho vetupu vali ekevelelo liokuhupa.

Mahi, Paulu atalama iya apopi okuti: ‘Nawike puonthue mankhi. Owato vala mauhanyauka. Ounthiki wokuapita, oandyu ya Huku yeile kwame aimphopila okuti: “Wahakale nouoma Paulu. Una yokukelivasa na Sesale, omutumini wo Roma. Huku mayovola aveho vekahi nokuenda noove.”’

Ankho pahe omokati kounthiki, monthiki ye 14 tunde etyi epukupuku liahimbika. Ovalume ankho vaendesa owato vamona okuti omeva kaaile unene kohi. Iya mokonda ankho kuanthikovela, kavahandele okuveta momamanya, iya avayumbu momeva ovivela viokutalamesa owato opo utalame. Etyi tyati komuhuka vamona okalongo kamue. Avatokola okutuala owato wavo pokalongo oko.

Puetyi ankho vekahi nokuhika kehimba, owato waveta meheke ngomo wanyena. Omanyonda elunga ahimbika okuveta mowato, iya owato auhimbika okuhanyauka. Onkhalamutue yomafualali aiti: ‘Una utyivila okuyoa, alombokele momeva tete opo ayoe alo kehimba. Iya konyima ovakuavo navo valombokelemo avakuate movinthimbu viowato opo vehike nawa.’ Iya avalingi ngotyo. Moluotyo, ovanthu aveho 276 ankho vaendela mowato oo vehika kehimba nomuenyo, ngetyi oandyu yalaele.

Okalongo oko ankho katiwa o Malta. Ovanthu vo opo ankho onondalawa unene, iya avayakula nawa aveho vatunda mowato. Etyi epukupuku liatula, valondeka Paulu mowato omukuavo avemutuala ko Roma.