TALA omalienge ku Paulu. Tala efualali likahi nokumuyunga. Mo Roma, Paulu wakala onkhuatwa. Ukahi nokukevelela alo Sesale omutumini wo Roma atokola etyi memulingi. Etyi Paulu ankho ekahi mokaleya, ovanthu ankho vapondola okukemutalelapo.

Konyima yokukala ononthiki ononthatu mo Roma, Paulu watuma okuihana ononkhalamutue mbumue mbova Judeu opo veye okumutalelapo. Mokonda yotyo, ova Judeu ovanyingi mo Roma aveya okumutalelapo. Paulu evetolela kombinga ya Yesu no Youhamba wa Huku. Vamue avetavela iya avakala ova Kristau. Mahi ovakuavo kavetavelele.

Tupu Paulu watolela Ondaka ya Huku omafualali omanyingi ankho emuyunga. Omanima evali Paulu akala onkhuatwa, wapopila Ondaka ya Huku ovanthu aveho. Alo umue ombunga ya Sesale navo veiva onondaka onongwa Mbouhamba wa Huku, iya vamue avakala ova Kristau.

Mahi utyii olie omuenda ou ukahi komesa nokuhoneka? O Timoteo. Timoteo nae ankho wali mokaleya mokonda yokupopia kombinga Youhamba wa Huku. Mahi pahe wayovoka. Timoteo pahe weya okukuatesako Paulu. Utyii oityi Timoteo ekahi nokuhoneka? Tutalei.

Uhinangela omapundaumbo o Filipu no Efesu Mehipululo 110? Paulu wakuatesako okuhimbika okuonganeka omawaneno ova Kristau momapundaumbo oo. Pahe mokaleya, Paulu ukahi nokuhoneka omikanda pala ova Kristau ovo. Omikanda viatyo ovio vikahi Mombimbiliya, vitiwa Efésios na Filipenses. Paulu pahe ankho utolela Timoteo oityi ena okuhoneka pala omapanga ae ova Kristau mo Filipu.

Ovanthu vomo Filipu ankho vehole unene Paulu. Moluotyo, ankho vemutumikisa oviawa mokaleya, iya Paulu pahe ukahi nokupandula. Oviawa ovio ankho viaetwa nomulume utiwa o Epafroditu. Iya konyima Epafroditu avele unene. Mahi ankho pahe ukahi nawa, wafuapo pala okukondoka keumbo. Etyi akondoka ko Filipu watyinda omukanda wa Paulu na Timoteo.

Puetyi ankho ekahi mokaleya, Paulu wahonekele vali omikanda vivali, vikahi Mombimbiliya. Omukanda umue weuhonekelele ova Kristau mepundaumbo lio Kolosu. Utyii oñgeni utumbulwa? Utiwa Colossenses. Omukanda omukuavo weuhonekelele epanga liae ankho utiwa o Filomon, tupu ankho ukala mo Kolosu. Omukanda oo ankho upopia kombinga yomuundapi wa Filemon utiwa o Onesimu.

Onesimu ankho watilile Filemon iya aende ko Roma. Onesimu ankho weiva okuti Paulu ukahi mokaleya. Moluotyo ekemutalelapo, iya Paulu apopila Onesimu Ondaka ya Huku. Iya Onesimu akala omu Kristau. Pahe Onesimu elivele mokonda yetyi atila. Utyii oityi Paulu ahonekela Filemon?

Paulu waita Filemon aevele Onesimu. Paulu wahoneka okuti: ‘Ame ndyikahi nokukondola Onesimu kuove. Mahi pahe hamuundapi wove ko vala, tupu omukuatate wove omu Kristau wokuna onondunge.’ Etyi Onesimu akondoka ko Kolosu, watyinda omikanda ovio vivali. Umue pala ova Kolosu nomukuavo pala Filemon. Tupondola okusokolola ehambu lia Filemon puetyi eiva okuti omuundapi wae pahe walinga omu Kristau.

Etyi Paulu ahonekela ova Filipu na Filemon, ankho una onondaka mbumue onongwa pala okuvepopila. Paulu wevetolela okuti: ‘Ame ndyikahi nokumutuma Timoteo. Mahi, naame apa katutu mandyiya okumutalelapo.’ Iya Filemon emuhonekela okuti: ‘Pongiya omphangu apa mandyiya okukala.’

Etyi Paulu ayovoka, akatalelapo ovakuatate vae ova Kristau konomphangu ononyingi. Mahi, konyima Paulu akuatwa vali mo Roma. Paulu ankho pahe utyii okuti otyikando etyi maipawa. Moluotyo, wahonekela Timoteo okumwita opo eye liwa liwa. Paulu wahoneka okuti: ‘Ame nakala nekolelo ku Huku, iya Huku mamphe ondyambi.’ Etyi Paulu ankhia papita vala omanima ehehi, o Jelusalei aihanyaunuapo vali. Otyikando etyi ova Roma veihanyaunapo.

Mahi Mombimbiliya muna vali ovipuka ovinyingi. Yehova Huku watuma o apostolu João ahoneke omikanda viahulako vio Mbimbiliya, okukutikinyamo omukanda wa Revelação. Omukanda oo upopia kombinga yovipuka mavikapita komutue. Pahe tutalei oityi matyikalingwa komutue.