OMULUME ou watalama apa o apostolu Petulu. Ava vekahi monyima yae omapanga ae. Mahi omokonda yatyi omulume ou apetamena konomphai mba Petulu? Ankho una yokulinga ngotyo? Ove umwii olie?

Omulume ou o Korneliu. Onkhalamutue yomafualali oko Roma. Korneliu ankho kei Petulu, mahi watolelua akonge Petulu opo eye keumbo liae. Tutalei oñgeni otyo tyaenda.

Ovalongwa votete va Yesu ankho ova Judeu, mahi Korneliu ankho hamu Judeu ko. Anthi ankho uhole Huku, ankho ulikuambela ku Huku, no kulinga ovipuka ovinyingi oviwa pala ovanthu. Onthiki imue kekumbi oandyu yemumonekela aimupopila okuti: ‘Huku wahambukua no ove, moluotyo makumbulula omalikuambelo ove. Tuma ovalume vakaihane omulume umue utiwa o Petulu. Ukahi ko Jope meumbo lia Simau, ukala popepi nelunga.’

Korneliu atumu liwa liwa ovalume vamue vakaovole Petulu. Monthiki onkhuavo, puetyi ovalume ovo ankho vekahi nokuhika popepi no Jope, Petulu ankho ukahi kombanda yondyuo ya Simau. Oko, Huku walekesa Petulu nemonekelo otyipuka tyimue tyikahi ngomulele omunene ukahi nokutuluka peulu. Pomulele opo ankho pena ovinyama aviho. Motyitumino tya Huku, ovinyama ovio ankho kaviakohokelwe pala okuliwa. Mahi ondaka imue keulu yati: ‘Katuka, Petulu. Ipaa ovinyama evi ulie.’

Petulu akumbulula okuti: ‘Au. Ame hinelie ovinyama evi viasila.’ Anthi ondaka yatolela Petulu okuti: ‘Etyi Huku akohokeswa wehetyiihane okuti tyasila. Otyo tyamonekela Petulu ovikando vitatu. Iya puetyi Petulu ankho ekahi nokusoka oityi tyihangununa ovipuka ovio aviho, ovalume vatumwa na Korneliu vehika meumbo iya avapulu Petulu.

Petulu atuluka apopi okuti: ‘Omulume mukahi nokuovola ame. Omokonda yatyi mueila? Etyi ovalume vahangununa okuti oandyu imue yatolela Korneliu opo akonge Petulu eye kondyuo yae, Petulu etavela okuenda navo. Etyi tyati komuhuka, Petulu no mapanga ae avaende okukatalelapo Korneliu ko Sesareia.

Korneliu ankho waongiyale ombunga yae no mapanga. Etyi Petulu ehika, Korneliu ekelivasa nae. Atuiki konongolo iya apetamena ponthele yonomphai mba Petulu, ngetyi uluete polutalatu apa. Mahi Petulu ati: ‘Katuka; ame ndyimunthu vala ngove.’ Enga, Ombimbiliya ilekesa okuti tyapenga okufenda omunthu. Onthue tuna yokufenda vala Yehova.

Petulu pahe atolela ondaka ya Huku aveho ankho veliongiya. Petulu apopi okuti: ‘Ndyiluete okuti Huku utavela ovanthu aveho vahanda okumuumbila.’ Puetyi Petulu nkhele apopia, Huku watumikisa ospilitu sandu yae iya ovanthu ovo avahimbika okupopia momalaka elikalaila. Otyo tyahuvisa unene ovalongwa ova Judeu ankho vekahi na Petulu. Mokonda ankho vasoka okuti Huku upanda vala ova Judeu. Otyo tyevelongesa okuti Huku kapande vala ovanthu vovivala vimue. Otyo, hatyipuka ko otyiwa atuho tuesukisa okuhinangela?