OITYI weete polutalatu apa? Omasualali avelama konokhambe onongonga. Mahi, nkhele tala oku vekahi nokutundilila. Ononkhambe mbukahi no kutundilila keulu, okuhateka kombanda yomakaka. Okuti keulu kuna umue onokhambe?

Au, kutupu. Ombu hanonkhambe mbotyotyili. Onthue tutyii mokonda ononkhambe kambupondola okuhateka kombanda yomakaka. Ine mbupondola? Mahi, Ombimbiliya ipopia kombinga yononkhambe meulu. Ove utyii omokonda yatyi ipopila ngotyo?

Omokonda kohale ankho ononkhambe mbuundapeswa unene movita. Moluotyo, Ombimbiliya ipopia kombinga yovanthu vavelama kononkhambe meulu, okulekesa okuti Huku makalinga ovita novanthu pano pohi. Enyina liovita ovio ove ulii? Litiwa o Armagedon. Ovita ovio mavikanyimako ovipuka aviho ovivi kombanda yoohi.

Yesu oe makapita komutwe movita ovio, vio Armagedon. Hinangela okuti Yesu waholovonua na Yehova opo akale ohamba youhamba Wae. Otyo Yesu avalela ekolowa liohamba komutue. Iya omutunga ou ulekesa okuti Yesu makaipaa onondyale mba Huku ambuho. Tyituhuvisa okuiva okuti Huku makanyimako onondingavivi ambuho?

Tala konyima Kehipululo 10. Oityi weetepo? Uluete Ombila onene, ina yaipaele ovanthu vonondingavivi. Olie walokesile Ombila oyo? O Yehova Huku. Pahe tala Ehipululo 15. Oityi tyikahi nokupita apa? Omapundaumbo o Sodoma no Gomorra ekahi no kuhanyaunuapo notupia tuatumikiswa na Yehova.

Pahe ikula Ehipululo 33. Tala etyi tyikahi nokupita no nonkhambe ombu nomatemba omafualali oko Egitu. Olie wevehitikila momeva ngetyi? O Yehova. Yehova walinga ngotyo opo aamene ovanthu vae. Tala Ehipululo 76. Pehipululo olio mokamona okuti Yehova wayeka ovanthu vae ova Isilayeli vahanyaunueko, mokonda yovipuka ovivi valinga.

Ngotyo, Yehova makatuma onoandyu mbae keulu, opo mbuiye okunyimako ovipuka ovivi aviho kombanda yoohi. Otyo katyituhuvisa. Mahi, pahe nkhele sokolola oityi otyo matyikaeta. Ikula eefo ekuavo, na tutale.