Vakuatate Nonomphange Ononthyolwe:

Okuhimbikila mu 1 ya Kupupu yo 2008, Omutala Womulavi waeta ononthele onongwa mbuna osapi yati: “Hetekela Ekolelo Liavo.” Okuhimbikila opo, ononthele ombo mbukahi nokulingwa monohanyi ononthatu-ononthatu, mbuya nokutukuatesako unene!

Oñgeni ovatangi vekahi nokutala ononthele ombo? Omunthu umwe, etyi amana okutanga onthele ipopia Marta wahoneka okuti: “Etyi namana okutanga neliyolela mokonda ame apeho ndyikahi nga Marta, nahanda okuyakula nawa ovanthu nokuundapa unene, mahi pamwe ndyilimbua otyipuka tyesukisa vali, okukala nomapanga.” Omukainthu umwe etyi atanga ehipululo lia Ester wapopia onondaka ombu onongwa okuti: “Ame ndyipondola okupopia konthele yetyi hono tukala tyahuva novikutu viankhimana. Tupondola okulihiviswa . . . , mahi katupondola okulambesa.” Ayawisako okuti: “Jeova wesuka vali netyi tuatuwa mokati.” Onthele onkhuavo ongwa yapopia apostolu Petulu yahambukiswa omphange umwe Omukristau, ahoneka okuti: “Yamphaka mokati kehipululo! Andyilitehela ngoti naame ankho opo ndyikahi.”

Ovatangi ovo novanyingi ovakuavo vahoneka okupandula etyi vatanga ononthele ombo, valekesa otyili tyahoneka apostolu Paulu omanima omanyingi konyima okuti: “Ovipuka aviho viahonekwa kohale, viahonekwa pala okutulonga.” (Rom. 15:4) Otyili, Jeova watuma etyi ovanthu ovo valinga tyihonekwe Mombimbiliya opo tulilongesileko. Atuho, tyilinge tuanoñgonoka otyili kohale ine pahe, tupondola okulilongesila kuvo.

Tukuavela ondundo opo utange omukanda ou tyihasete. Ukutikinya Mefendelo Liombunga, mauhambukiswa unene ovana! Tyina wamehimbika okulilongeswa Melilongeso Liombimbiliya Mewaneno, uhalañge osimana naike! Taindya omuvo, uhatange okuhatekesa. Soka kuetyi utanga, linga ngatyina opo ukahi. Ovola okutehelela etyi ovanthu ovo ankho velitehelela, tala etyi vamona. Eleka etyi ovanthu ovo vakala etyi ovipuka viamoneka momuenyo wavo nonkhalelo ove ñgeno wakala.

Tuekulingila omukanda ou nehambu enene. Maukala ondyambi ongwa pala ove nombunga yove. Tuna oluembia olunene nove nehambu,

Ononkhalamutwe Mbo Nombangi Mba Jeova