1, 2. Oityi Petulu ankho akevela tyina Jesus alongesa mo Kafarnau, iya oityi tyaendapo?

PETULU ankho ukahi nokutala nawa ovanthu vatehelela Jesus. Ankho vekahi mondyuo yefendelo ko Kafarnau. Eumbo lia Petulu ankho likala mepundaumbo olio, ovilinga viae viokufwa ankho omo alingila, Melunga lio Galileia, omapanga ae nombunga ovanyingi omo vakala. Tyotyili Petulu ankho uhanda ovanthu votyilongo tyae vatale Jesus ngetyi oe ankho umutala, navo na vakale nehambu liokulongeswa Ouhamba wa Huku nomulongesi wavilapo kovalongesi aveho. Mahi ankho tyimoneka ngoti kamatyivilwa.

² Ovanyingi avayekepo okumutehela. Vamwe ankho vemupenya nokutomba onondaka ankho aivisa. Mahi ankho etyi tyisukalalesa vali Petulu okutala oñgeni ankho tyikahi ovalongwa va Jesus. Ankho vetupu vali ehambu liokuhanda okunoñgonoka ovipuka ovipe. Ankho vetupu vali ehambu, liokuhanda okunoñgonoka otyili. Ankho vamoneka ngoti vangwangwana, alo umwe vanumana. Vamwe ankho vapopia etyi veliivite, okuti onondaka mba Jesus mbunumanesa. Avahahande vali okutehelela, avatundu mondyuo yefendelo nokuyekapo okulandula Jesus.​—Tanga João 6:60, 66.

3. Oñgeni ekolelo lia Petulu liemukuatesako movikando ovinyingi?

³ Otyo tyaihamene unene Petulu nono apostolu ononkhuavo. Petulu ankho kanoñgonokele nawa etyi Jesus apopia monthiki oyo. Mahi wanoñgonoka omokonda yatyi onondaka mba Jesus mbumoneka ngoti mbunumanesa. Iya oityi Petulu alinga? Otyo hatyikando tyotete, tupu hatyoko tyahulilila ekolelo noukuatyili wae konthele Yomulongesi wae vialolwa. Tutalei oñgeni ekolelo lia Petulu liemukuatesako okulamba ovitateka ovio nokutualako noukuatyili.

4, 5. Oñgeni Jesus alinga ovipuka mononkhalelo ovanthu ankho vahakevela?

⁴ Ovikando ovinyingi Jesus ankho upopia etyi Petulu ehei.  Ovikando ovinyingi pamwe Omulongesi wae ankho ulinga, nokupopia monkhalelo imwe ovanthu ankho vahakevela. Monthiki imwe konyima, wavelele okulia komahuviso ovanthu ovanyingi. Mokonda yotyo, avahande akale ohamba yavo. Alingi etyi ovanthu ankho vahakevela etyi ahondovoka nokutuma ovalongwa vae vanyingile mowato okueenda ko Kafarnau. Tyina ovalongwa vekahi nokuenda nowato kounthiki, Jesus alingi vali etyi ankho vahakevela okueendela komaande Melunga lio Galileia, alongesa Petulu esilivilo liokukala nekolelo.

⁵ Komuhuka avamono ovanthu ovanyingi vevelandula nowato. Mahi mokutala ovanthu ankho vahanda Jesus alinge vali ehuviso ekuavo liokulia, ankho vetupu ondyala notyili. Jesus aviyula ovanthu ovo mokonda yotyituwa otyo tyokuhanda omalumono. (João 6:25-27) Etompho olio alitualako mondyuo yefendelo ko Kafarnau, muna Jesus apopia vali etyi ankho vahakevela etyi evelongesa otyili tyimwe tyakolela mahi tyepuiya.

6. Onthengele-popia patyi Jesus alinga, iya oñgeni ovanthu vakala?

⁶ Jesus ankho kahande ovanthu vemutale ngatyina aava vala okulia kuopahito, mahi ankho vena okumutala ngatyina onkhuta Huku aava, una omuenyo wae nononkhia mbae vietela vakuavo omuenyo wahapu. Ngotyo, alingi onthengele-popia okulieleka no manaa, ombolo yatunda keulu kononthiki mba Moisesi. Etyi ovanyingi otyo vetyiyala, alingi onthengele-popia onkhuavo okuhangununa okuti tyesukisa okulia ohitu yae nokunwa ohonde yae pala okukala nomuenyo. Ovanthu avetyiyale vali unene. Vamwe avati: “Onondaka ombo mbunumanesa, olie upondola okumbutehelela?” Ovanyingi povalongwa vae avayekepo okumulandula. *​—João 6:48-60, 66.

7, 8. (a) Oityi Petulu nkhele ankho ahanoñgonokele konthele yotyilinga tya Jesus? (b) Oñgeni Petulu akumbulula epulo Jesus alinga ono apostolu?

⁷ Oityi Petulu alinga? Tupu nae ankho wanguanguana nonondaka mba Jesus. Ankho ketyii okuti Jesus ankho wesukisa okunkhia opo afuisepo ehando lia Huku. Nongotyo, okuti Petulu wahandele okulandula ovalongwa vana vahapamene vasapo Jesus monthiki oyo? Au, pena otyipuka tyimwe tyakolela tyakuatesako Petulu okusoka monkhalelo yelikalela. Oityi?

⁸ Jesus wapula ono apostolu okuti: “Okuti nonue muhanda okuenda?” (João 6:67) Wapopila 12, mahi Petulu ngae ukumbulula ngetyi alinga-lingale. Tyafuile Petulu ankho oe omukulu vali.  Mahi tyimoneka nawa okuti Petulu ankho oe upopia vali ku vakuavo, tyafuile, apeho ankho kayekepo okupopia etyi asoka. Momuwo omo, apopi onondaka ombu onongwa nokuhalimbuwa, mbati: “Tatekulu okulie matwii nako? Ove una onondaka mbomuenyo wahapu.”​—João 6:68.

9. Oñgeni Petulu alekesa oukuatyili mu Jesus?

⁹ Kuhambukwa tyina utehelela onondaka ombo? Ekolelo ankho Petulu ena mu Jesus liemukuatesako okukala notyituwa tyimwe otyiwa​—oukuatyili. Petulu ankho utyii okuti Jesus oe vala Omuyovoli watumwa na Jeova, iya Jesus ankho uyovola nonondaka mbae, etyi alongesa konthele Youhamba wa Huku. Petulu ankho utyii okuti namphila pena ovipuka vimwe ahanoñgonokele, ankho petupu omphangu onkhuavo oku apondola okuenda, inkha uhanda okupandwa na Huku nokukamona omuenyo wahapu.

10. Oñgeni hono tupondola okuhetekela oukuatyili wa Petulu?

¹⁰ Ongotyo noove ulitehelela? Katyihambukiswa, okutala ovanthu ovanyingi hono valekesa okuti vehole Jesus, mahi kavatualako noukuatyili. Oukuatyili wotyotyili mu Kristu, wesukisa okutala omalongeso a Jesus ngetyi Petulu ankho eetala. Tuesukisa okulilongesa omalongeso oo, nokuenoñgonoka nawa, nokuendela muetyi apopia, alo umwe tyina ehelikuatele netyi ankho tukevela ine tuhanda. Matukamona vala omuenyo wahapu Jesus etuhandela, inkha tukala ovakuatyili.​—Tanga Salmo 97:10.

11. Opi Jesus atuala ovalongwa vae? (Tala okatoi.)

¹¹ Kapakalele ononthiki ononyingi, tunde pononthiki ombo mbovilinga ovinyingi, Jesus atuala ono apostolu novalongwa ovakuavo moungendi umwe omunene okuenda no koutakelo. Alo umwe tyina ukahi komaande omangole Elunga lio Galileia, upondola okutala ondungu Yomphunda Hermon yaumbwa nongandyi, okutala koutakelo okuenda no Kotyilongo Tyalaelwe. Katutu-katutu, omphunda otyo ikala ngoti ikahi nokukala onene, otyo ihiwa vali, tyina vafuenako, okuinduka okuviuka kovilongo vikala popepi no Sesalea ya Filipe. * Momphangu oyo ongwa unene, mutavela okutala onthele onene yo koutundilo Wotyilongo Tyalaelwe, Jesus alingi ovalanduli vae epulo limwe liakolela.

12, 13. (a) Oityi Jesus apula konthele yetyi ovanthu vasoka? (b) Monondaka Petulu apopila Jesus, oñgeni alekesa okuti una ekolelo liotyotyili?

 ¹² Wevepula okuti: “Ovanthu vati amelie?” Tupondola okusoka Petulu utala momaiho a Jesus, okuimbuka ouwa-tima nounongo Womulongesi wae. Jesus ankho uhanda anoñgonoke oityi ovanthu vasoka tyina veiva etyi apopia netyi alinga. Ovalongwa va Jesus avakumbulula epulo, okuwana omalusoke apenga ovanthu ankho vena konthele ya Jesus. Mahi Jesus ankho uhanda okunoñgonoka vali. Okuti ankho ovalongwa akala navo naavo ongotyo vasoka? Wevepula okuti: “Iya onwe muti amelie?”​—Luc. 9:18-20.

¹³ Tyihasete Petulu akumbulula vali. Nonondaka mbayandyuluka nokuapama apopi etyi ovanyingi ankho vekahipo vasoka. Wati: “Ove, ove Kristu, Omona wa Huku wokuna omuenyo.” Tupondola okusoka Jesus uliyolela okuetavela upandula etyi Petulu apopia. Jesus ahinangelesa Petulu okuti o Jeova Huku, hamunthu ko pano pohi wahangununa otyili otyo tyakolela ku vana vena ekolelo liotyotyili. Petulu waimbuka otyili tyimwe otyinene tyaholololwa na Jeova, okuimbuka olie Mesiya ine o Kristu, walaelue omanima omanyingi konyima!—Tanga Mateus 16:16, 17.

14. Jesus wavela Petulu otyilinga patyi tyakolela?

¹⁴ Kristu oo, oe wapopilue neulo limwe okuti emanya ovatungi vayala. (Sal. 118:22; Luc. 20:17) Nomaulo ngoo ankho ei, Jesus wahololola okuti Jeova makaika ewaneno kemanya olio, ine onkhanda, Petulu amana okuimbuka. Konyima yotyo, avela Petulu otyilinga tyimwe tyakolela mewaneno olio. Jesus kaavelele Petulu omphangu yakolela kono apostolu ononkhuavo, ngetyi vamwe vasoka, mahi wemuavela otyilinga. Wavela Petulu “onosapi mbouhamba.” (Mat. 16:19) Petulu ankho una otyilinga tyokuikula ekevelo Liouhamba wa Huku pala ovikundyi vitatu viovanthu​—tete ova Judeu, konyima ova Samaria, okuhulililako ova Sindiyu ine vana vehe va Judeu.

15. Oityi Petulu apakelamo Jesus, iya wapopia onondaka patyi?

¹⁵ Mahi, konyima Jesus wati una upewa unene makevelwa alinge ovipuka ovinyingi. Esilivilo lionondaka ombo lipondola okutalelwa ku Petulu. (Luc. 12:48) Jesus watualako okuhololola otyili tyakolela konthele ya Mesiya, okukutikinyamo ononkhumbi nononkhia mamono mo Jelusalei. Petulu anumana unene  etyi otyo etyiiva. Aihanena Jesus ponthele emupakelamo okuti: “Tatekulu lilingila okankhenda, otyo kamatyipiti noove.”​—Mat. 16:21, 22.

16. Oñgeni Jesus aviyula Petulu, iya elondolo patyi atuho tuvasa monondaka mba Jesus?

¹⁶ Tyotyili, omalusoke a Petulu ankho kaapengele, moluotyo tyipondola ekumbululo lia Jesus liemuhanunukisa. Watyindamena ku Petulu, atale kovalongwa ovakuavo, tyafuile navo ankho vasoka nga Petulu, ati: “Pita konyima yange Satanasi! Ove umanya liokumphundukisa, mokonda omalusoke ove ha Huku, mahi o ovanthu.” (Mat. 16:23; Mar. 8:32, 33) Monondaka mba Jesus muna elondolo pala onthwe atuho. Tyapepuka unene okuyeka omalusoke ovanthu apite komutwe omalusoke a Huku. Inkha otyo tyimoneka, alo tyina tuna ehando liokukuatesako, tupondola okulinga omahando a Satanasi tyihetyii atuhayembe kehando lia Huku. Mahi oñgeni Petulu akala?

17. Oityi tyihangununa etyi Jesus apopila Petulu opo “akale konyima” yae?

¹⁷ Tyotyili, Petulu ankho utyii okuti Jesus kekahi nokupopia okuti oe o Satanasi Eliapu. Jesus kapopile na Petulu ngatyina apopia na Satanasi. Etyi apopia na Satanasi, Jesus watile: “Tundapo, Satanasi”; Mahi etyi apopia na Petulu wati: “Pita konyima yange.” (Mat. 4:10) Jesus kayalele o apostolu oo, ankho una ovituwa oviwa ovinyingi, mahi wemuviyula vala opo ayekepo omalusoke ae apenga. Petulu ankho wesukisa okutunda komutwe Womulongesi wae ngatyina emanya lipundukisa, mahi ankho una okukala konyima yae okumulandula otyo emukuatesako.

18. Oñgeni Petulu alekesa oukuatyili, iya oñgeni tupondola okumuhetekela?

¹⁸ Okuti Petulu watañgunine, okuti wanumanene? Au, wetavelele eviyulo nomutima weliola. Ngotyo, walekesa vali oukuatyili. Ovalanduli aveho va Kristu pamwe vesukisa okuviyulwa. Inkha nomitima weliola tutavela okuviyulwa nokulongwa, nokulilongesilako matutualako okufuena ku Jesus Kristu no ku Tate yae Jeova Huku.​—Tanga Provérbios 4:13.

19. Onondaka patyi mbutumphulukisa Jesus apopia, iya tyafuile oityi ankho Petulu elipula?

¹⁹ Konyima Jesus apopi onondaka ononkhuavo, mbutumphulukisa.  Wati: “Tyotyili, ame ndyimupopila okuti pena vamwe vetai pano kamavamakela ononkhia, alo vamona tete Omona womulume ukahi nokuya mouhamba wae.” (Mat. 16:28) Tyotyili onondaka ombo mbaetela Petulu olumbwe. Oityi Jesus ankho ahanda okupopia? Tyafuile Petulu ankho usoka okuti mokonda waviyulua, elao olio hamwe kamelipewa.

20, 21. (a) Popiapo emonekelo Petulu amuene. (b) Oñgeni etompho liakalele pemonekelo liakuatesako okuviyula Petulu?

²⁰ Mahi, etyi palamba osimano, Jesus aende na Tiago, na João na Petulu “komphunda imwe yaya peulu” tyafuile Omphunda Hermom, ikala popepi naapa ankho vekahi. Tyafuile ankho o kounthiki mokonda ovalume ovo ankho valiwa nolumphoki. Mahi etyi Jesus ekahi nokulikuambela apamoneka otyipuka tyimwe tyevepola olumphoki.​—Mat. 17:1; Luc. 9:28, 29, 32.

²¹ Jesus ahimbika nokupiluluka otyo vemutala. Otyipala tyae atyihimbika okuliaima alo tyakala ngekumbi. Ovikutu viae tupu  avihimbika okutuela nokuliaima. Konyima ponthele yae apamoneka ovanthu vevali umwe ukahi nga Moisesi omukuavo o Eliya. Avahimbika okutomphola na Jesus konthele “youngendi wae, okufuisapo etyi matyikapita nae ko Jelusalei” tyafuile konthele yononkhia mbae netutilo. Tyimoneka nawa okuti ankho tyapenga etyi Petulu apopia okuti otyo kamatyikapita na Jesus!​—Luc. 9:30, 31.

22, 23. (a) Oñgeni Petulu alekesa okuti ondyandyi nokuapama? (b) Petulu na Tiago na João vatambula ondyambi patyi motyinthiki tyina?

²² Petulu tupu ahande alinge onthele memonekelo olio lihuvisa, tyafuile ankho uhanda litualeko. Ankho tyimoneka ngoti Moisesi na Eliya mavaende na Jesus. Moluotyo, Petulu ati: “Mulongesi, otyiwa tukale pano, tulinge omakaka etatu, limwe oliove, ekuavo olia Moisesi, iya ekuavo olia Eliya.” Mahi tyotyili ovaumbili vevali va Jeova vamoneka memonekelo olio ankho vankhiale kohale kavesukisa vali omakaka. Tyotyili Petulu ankho ketyii etyi ekahi nokupopia. Mahi ove kuhambukilwa omulume oo ondyandyi nokuapama?​—Luc. 9:33.

²³ Petulu na Tiago na João vatambula vali ondyambi onkhuavo motyinthiki otyo. Keulu akutundu ekaka alilapela kuvo. Mekaka olio amutundu ondaka, ankho ondaka ya Jeova Huku! Aiti: “Ou Omona wange, una naholovona. Mutehelelei.” Konyima emonekelo alimanuhuka, avesala vala na Jesus komphunda.​—Luc. 9:34-36.

24. (a) Oñgeni emonekelo liakuatesako Petulu? (b) Oñgeni hono emonekelo lipondola okutukuatesako?

²⁴ Emonekelo olio ankho otyiawa pala Petulu nonthwe! Omanima amwe konyima Petulu wahoneka konthele yelao akala nalio motyinthiki tyina, etyi alekeswa Jesus ngatyina ekahi keulu ngohamba iya Petulu akala nelao “liokutala omunkhima wae”. Emonekelo lina liapameka omaulo omanyingi ekahi Mondaka ya Huku nokupameka ekolelo lia Petulu, akoleleye etyi konyima alolwa. (Tanga 2 Pedro 1:16-19.) Tupu nonthwe malipameka ekolelo lietu, inkha tulinga nga Petulu, okukala ovakuatyili Komulongesi wetu una Jeova etuholovonena, nokulilongesila kwe, nokuviyulwa nokumulandula nomutima weliola nthiki na nthiki.