1, 2. (a) Maliya wakukunyua monkhalelo patyi nomunthu ehei? (b) Etokolo patyi Maliya ankho ekahi nokulinga malipilulula omuenyo wae?

MALIYA watala nokuahuva etyi omuenda ekahi nokunyingila meumbo liae. Ankho kaendelele ovohe ya Maliya. Omuenda oo weya okupopia nae! Maliya ankho una onthumbi yokuti omunthu oo kakala mo Nazare. Mepundaumbo etutu ngoliae, ovaenda vaimbukwa. Mahi omuenda oo welikalela unene. Wapopia na Maliya monkhalelo imwe yelikalela, wati: “Okamene, ove wokuapandua unene, Jeova ukahi noove.”​—Tanga Lucas 1:26-28.

² Ongotyo Ombimbiliya ihimbika okupopia konthele ya Maliya omona wa Eli, wepundaumbo lio Nazare, mo Galileia. Maliya ankho ukahi nokusoka ketokolo limwe enene momuenyo wae. Ankho omphunga ya Jose omuhongi womavai, omulume umwe wahepa, mahi ankho wakolela mu Huku. Ngotyo, mokutala ankho utyiyale oñgeni ovipuka maviende, kamakala nomalumono, makuatesako omulume wae Jose nokutekula ovana nae. Mahi, liwa-liwa Maliya apilwa nomueenda umwe wemuavela otyilinga tyatuka ku Huku tyapilulula omuenyo wae.

3, 4. Opo tunoñgonoke Maliya, oityi tuesukisa okuyekapo iya oityi tuesukisa okutala nawa?

³ Ove upondola okuhuva okutala okuti Ombimbiliya kaipopi unene konthele ya Maliya. Ipopia vala katutu konthele yae nombunga yae kaipopi ovituwa viae nolupe lwae. Mahi etyi Ondaka ya Huku ipopia konthele yae tyilekesa nawa ankho Maliya omunthu patyi.

⁴ Opo tunoñgonoke nawa Maliya tuesukisa okumutala monkhalelo imwe yapona puetyi onongeleya ononyingi mbulongesa konthele yae. Tuhalandulei omalutalatu omanyingi valekesa. Tupu atuhalandula omalongeso ahaviukile alekeswa mo nosinema mbuavela omukai oo weliola omutima omanyina enkhimano okuti “Me ya Huku,” “Nkhai-hamba Yokeulu.” Mahi tutalei vali unene kuetyi Ombimbiliya tyili-tyili ilongesa konthele ya Maliya.  Ovihonekwa vitukuatesako okunoñgonoka ekolelo liomukai oo noñgeni tupondola okumuhetekela.

5. (a) Oityi tulilongesila ku Maliya etyi akukunyua noandyu Gabrieli? (b) Oityi tulilongesila ku Maliya tyakolela unene?

⁵ Omuenda wa Maliya, ankho hamunthu. Ankho oandyu Gabrieli. Etyi aihana Maliya okuti “ove wokuapandua” Maliya “asukalala unene” nonondaka ombo elipulu oityi tyihangununa okukukunyua ngotyo. (Luc. 1:29) Wapandua unene nalie? Maliya ankho kakevelela okutalwa ngotyo novanthu. Mahi kelipakeleko okusoka liwa-liwa okuti ankho wapandua na Huku. Inkha tulinga ononkhono mbokupandwa na Huku, katukala nomalityindailo ngatyina tuapanduae, tuhinangela onondonga mbumwe mbakolela omuhikuena Maliya ankho ei nawa, mbati: Huku uyele vana velipakako, mahi uhole nokukuatesako vana veliola omutima.​—Tia. 4:6.

6. Otyilinga patyi tyakolela oandyu yaavela Maliya?

⁶ Maliya ankho wesukisa okuliola omutima, mokonda oandyu yemuavela otyilinga ankho ahakevela. Yemuhangununina okuti makala nomona wakolela vali unene kovanthu aveho. Gabrieli wati: “Jeova Huku memuavela otyipundi tyoutumini tya David tate yae. Oe makala ohamba mondyuo ya Jako apeho, iya ouhamba wae kamaukakala nonthyulilo.” (Luc. 1:32, 33) Tyotyili, Maliya ankho wii omulao Jeova alinga David momanima 1.000 konyima, wokuti omutekula wae makatumina apeho. (2 Sam. 7:12, 13) Ngotyo omona wae makakala Mesiya una ankho ovanthu vakevela mokueenda kuomanima omanyingi!

7. (a) Oityi epulo lia Maliya liahololola konthele yae? (b) Oityi ovakuendye novahikuena hono vapondola okulilongesila ku Maliya?

⁷ Tupu, oandyu yemupopila okuti omona wae “makaihanwa okuti Omona Womukulami”. Oñgeni omukai pano pohi apondola okukutula omona wa Huku? Mahi, oñgeni Maliya ankho apondola okukala nomona tyina ankho ehenenepwe? Maliya wapula oandyu okuti: “Otyo matyiende ñgeni, tyina ame nehenelale nomulume nawike?” (Luc. 1:34) Tala, Maliya wapopia okuti omumphembela tyihena ohonyi. Ankho wapanda unene oumphembela. Hono, ovahikuena ovanyingi vapesela liwa oumphembela wavo nokupenya vana nkhele ovamphembela. Tyotyili ouye  wapiluluka, mahi Jeova kapiluluka. (Mal. 3:6) Ngo kononthiki mba Maliya, Jeova upanda unene vana vaendela movitumino viae.​—Tanga Hebreus 13:4.

8. Oñgeni Maliya, namphila omukuankhali akala nomona uhena onkhali?

⁸ Namphila ankho omuumbili wekolelo wa Huku Maliya ankho omukuankhali. Ngotyo, oñgeni apondola okutyita omona uhena onkhali, omona wa Huku? Gabrieli wahangununa okuti: “Ospilitu sandu maikuwila, iya Epondolo lio Mukulami malikuhiki. Moluotyo, tupu omona matyitwa matiwa osandu, Omona wa Huku.” (Luc. 1:35) Ondaka sandu ihangununa okuti “tyasukuka,” “tyafuapo,” “tyikola”. Ovana tyina vatyitwa vatambula ononkhali novivi vio vohe. Mahi, pomona ou Jeova malingi ehuviso limwe lielikalela. Jeova wapola omuenyo Womona wae keulu eupake meimo lia Maliya aundapesa ononkhono mbae, ine ospilitu sandu, “ambuhiki” Maliya, okutyilika omona opo ahatambule onkhali. Mahi okuti Maliya wetavela etyi oandyu yalaa? Oñgeni Maliya akala?

9. (a) Omokonda yatyi vokuhetavela vapengesa, tyina vaanya etyi tyaendele na Maliya? (b) Omonkhalelo patyi Gabrieli apameka ekolelo lia Maliya?

⁹ Ovanthu vokuhetavela, alo umwe Ovalongesi Vonongeleya, kavetavela okuti omumphembela upondola okutyita omona. Namphila valongeswa unene, kavetyivili okutavela otyili tyimwe tyapepuka. Oandyu Gabrieli yati: “Huku na tyimwe tyimupona.” (Luc. 1:37) Maliya etavela konondaka mba Gabrieli mokonda ankho omuhikuena wekolelo liapama. Mahi ekolelo olio ankho hakutavela vala. Ngetyi kese munthu alinga, Maliya nae ankho wesukisa omalekeso muna apondola okupameka ekolelo liae. Gabrieli ankho wafuapo pala okulekesa ovipuka maviyawisa kenoñgonoko lia Maliya. Wemupopila etyi tyaendele na Elisabete omukulukai umwe ombunga yae ankho wiiwe okuti wakala omanima omanyingi tyahakutula. Huku walingile omahuviso Elisabete akala omunthimba!

10. Namphila Maliya ankho makala nomona wa Huku, omokonda yatyi otyilinga otyo tyepuiya nokutilisa owoma?

¹⁰ Oityi Maliya pahe malingi? Pahe una otyilinga nomalekeso okuti Huku mafuisapo etyi Gabrieli apopia. Mahi otyilinga otyo tyitilisa owoma nokuepuiya. Tupu, ankho usoka komphunga yae Jose. Okuti Jose metavela okulinepa nae tyina amanoñgonoka okuti omulemi? Tupu tyipondola otyilinga otyo tyemutilisa unene owoma. Maliya ankho makala ina yomunthu wakolela vali kovipuka aviho Huku atunga, omona wae onthyolwe!  Memutekula tyina olukembe nokumuyunga mouye wovivi. Tyotyili otyo otyilinga otyinene!

11, 12. (a) Oñgeni alo umwe ovanthu vokuapama, nokuna ekolelo pamwe valinga tyina vapewa otyilinga na Huku tyihapepukile? (b) Ekumbululo Maliya avela Gabrieli lilekesa tyi konthele yae?

¹¹ Ombimbiliya ilekesa okuti alo umwe ovanthu vokuapama, nokuna ekolelo pamwe ankho vaanya otyilinga vapewa na Huku. Moisesi waanyene, ati ketyivili okupopia nawa pala akale omutumwa-ndaka wa Huku. (Êx. 4:10) Jeremia wapopile okuti “nkhele omona”, kametyivili okulinga etyi Huku ankho emutuma. (Jer. 1:6) Iya Jona waile nkholo otyilinga ankho apewa! (Jonas 1:3) Iya Maliya oñgeni malingi?

¹² Alo umwe hono, onondaka mbae mbokueliola omitima nokutavela, mbutulongesa unene. Maliya wapopila Gabrieli okuti: “Ame uno mupika wa Jeova! Tyilingwe muame ngetyi apopia.” (Luc. 1:38) Omupika ankho omuundapi wahepa, omuenyo wae ankho utei vala Komuhona wae. Ongotyo ankho Maliya elitehelela konthele Yomuhona wae, Jeova. Ankho utyii okuti memukuatesako, mokonda ukuatesako vana vakolela mwe, nokuavela ononkhano onongwa ovanthu valinga atyiho vevila pala okufuisapo otyilinga vapewa.​—Sal. 18:25.

13. Inkha tulinga etyi Huku etuita namphila mokutala kuetu ngoti tyepuiya ine kamatutyivili, oñgeni ongeleka ya Maliya itukuatesako?

¹³ Pamwe Huku utuita tulinge otyipuka tusoka okuti tyalema, alo umwe kamatutyivili okutyilinga. Mahi Mondaka yae Huku utuavela atyiho tuesukisa opo tuyumbe unene onthumbi mwe, ngetyi tyalingile Maliya. (Pro. 3:5, 6) Okuti matulingi ngotyo? Inkha tulinga ngotyo, Jeova metuyambe, nokutuavela omahunga okupameka ekolelo lietu mwe.

14, 15. (a) Oñgeni Jeova ayamba Maliya etyi akatalelapo Elisabete na Zakaria? (b) Oityi onondaka mba Maliya mbukahi mu Lucas 1:46-55 mbulekesa konthele yae?

¹⁴ Onondaka Gabrieli apopila Elisabete mbuna ehangununo enene ku Maliya. Ovakai aveho mouye, olie upondola okunoñgonoka nawa etyi tyaendele na Maliya? Maliya watunda liwa-liwa ko Judaa, kotyilongo tyonomphunda, alingi oungendi wononthiki ononthatu ine ononkhuana. Etyi anyingila meumbo lia Elisabete na Zakaria, omunene-nakwa, Jeova wemuavela vali omalekeso  apameka ekolelo liae. Etyi Elisabete eiva Maliya wakukunya, liwa-liwa omona ukahi meimo liae apikita okuahambukwa. Elisabete eyula ospilitu sandu aihana Maliya okuti “me ya Tatekulu yange.” Huku wapopila Elisabete okuti omona wa Maliya makala Tatekulu yae, Mesiya walaelue. Tupu, watumwa na Huku okupandula Maliya mokonda yokuetavela nekolelo, ati: “Tupu una ehambu una wetavela.” (Luc. 1:39-45) Tyotyili, ovipuka aviho Jeova alaele Maliya mavifuisuapo!

¹⁵ Konyima yotyo, Maliya apopi, iya onondaka mbae mbahonekwa Mondaka ya Huku. (Tanga Lucas 1:46-55.) Ombo onondaka ononkhuavo mbukahi Mombimbiliya mbulekesa  ekumbululo lia Maliya. Onondaka ombo mbulekesa ombili ena yokunkhimaneka Jeova, mokonda yokuemuavela elao enene liokukala ina ya Mesiya. Tupu mbulekesa onthumbi onene ena mu Jeova, yokuti upaka pombuelo vana velipakako novepondolo mahi ukuatesako vana veliola omutima no vokuahepa vaovola okumuumbila. Nokulekesa okuti ankho una enoñgonoko. Ngetyi tyipopia ovanthu vamwe, Maliya wapopia Ovihonekwa vio Hebreu ovikando vilamba po 20! *

16, 17. (a) Oñgeni Maliya nomona wae valekesa otyituwa tuesukisa okuhetekela? (b) Ouwa patyi tyituhinangelesa etyi Maliya akatalelapo Elisabete?

¹⁶ Tyimoneka nawa okuti Maliya ankho usoka unene Mondaka ya Huku. Mahi nongotyo watuaileko okuliola omutima, apopi Ovihonekwa tyipona okupopia vala etyi asoka. Omona ankho ukahi nokukula meimo liae, nae otyo eya okulinga, wati: “Onondaka ndyikahi nokulongesa hambangeko, omba una wanthuma.” (João 7:16) Otyiwa tulipule okuti: ‘Ndyina umwe ehumbilo nonthilo Nondaka ya Huku? Ine ndyihumba vali omalusoke ange nomalongeso?’ onkhalelo ya Maliya ankho yandyuluka nawa.

¹⁷ Maliya wakala onohanyi mbuhungi pononthatu na Elisabete, nokutambula onondonga nokuava epameko. (Luc. 1:56) Ovakai ovo vevali vetulongesa okuti oupanga wakolela unene. Inkha tuovola omapanga ehole tyilityili Huku yetu, Jeova, tyotyili matukala ovanthu vapama mopamphepo nokufuena vali ku Huku. (Pro. 13:20) Pahe onthiki ya Maliya yokukondoka keumbo aihikipo. Oñgeni Jose makala tyina amanoñgonoka etyi Maliya ekahi?

18. Oityi Maliya apopila Jose iya oñgeni Jose akala?

¹⁸ Tyafuile Maliya kakevelele alo eimo liae limoneka. Ankho wesukisa okupopia na Jose. Tyina ehenepoie nae, tyipondola welipula oñgeni omulume oo weliola omutima nokuna onthilo na Huku, makala tyina amemupopila. Mahi nongotyo, Maliya wemupopila atyiho. Ngetyi ove upondola okusoka Jose asukalala unene. Ankho uhanda okutavela komuhikuena oo ehole unene, mahi etyi emupopila otyipuka tyimwe tyihenemonwe. Ombimbiliya kaipopi etyi Jose asoka. Mahi yapopia okuti ankho uhanda okumuhenga mokonda ankho pomuvo opo onomphunga vatalwa ngatyina velinepa. Anthi, ankho kahande okukundiswa nounyingi ine okupenyua, moluotyo aovola okumuhenga otyo ovanthu vehetyii. (Mat. 1:18, 19) Tyipondola Maliya tyemuihamene  unene tyina atala omulume oo omuwa-tima waihamenua okutala otyipuka otyo tyihenemonwe. Mahi Maliya kakalele nonyengo okutala Jose wehetavelele kwe.

19. Oñgeni Jeova akuatesako Jose okulinga etyi tyaviuka?

¹⁹ Jeova kayekele Jose atualako okulinga etyi asoka. Mondyoi, oandyu yemupopila okuti Maliya wakala omulemi komahuviso. Otyo tyafuile tyemutulisile unene omutima! Jose alingi etyi Maliya ankho alinga tunde konthyimbi okutavela ehongolelo lia Jeova. Anepe Maliya nokulifuiika pala okutavela otyilinga tyokutekula Omona wa Jeova.​—Mat. 1:20-24.

20, 21. Vana vanepa na vana vasoka okunepa, oityi velilongesila ku Maliya na Jose?

²⁰ Vana vanepa na vana vasoka okunepa, vena okulilongesila unene kongeleka yomuhikuena oo waliko omanima 2.000 konyima. Okutala omukai wae omuhikuena ukahi nokulinga otyilinga tyokutekula omona, Jose wahambukilwe unene mokonda yokualandula ehongolelo apewa noandyu ya Jeova. Jose wamuene okuti okulandula ehongolelo lia Jeova tyakolela tyina ulinga etokolo liepuiya. (Sal. 37:5; Pro. 18:13) Tyotyili, watuaileko nokutala nawa nokuakala noluembia tyina alinga omatokolo okuhongolela ombunga.

²¹ Tupu, oityi tupondola okusoka konthele ya Maliya nkhele wetavela okunepwa na Jose? Namphila tete hamwe tyepuiya unene Jose okutavela etyi Maliya apopia, mahi Maliya watuaileko nokukevela noumphua-lundo nonthumbi yokuti malingi etokolo liaviuka opo akale onkhalamutwe yombunga. Tyotyili, ankho utyii okuti okupwa elundo tyakolela, iya otyo ongeleka ongwa hono pala ovakai Ovakristau. Konyima, omalekeso oo alongesa Jose na Maliya okuti okutomphola nawa noukuatyili tyakolela unene.​—Tanga Provérbios 15:22.

22. Oñgeni otyinepo tya Jose na Maliya tyehimbika, iya oityi ankho vakevelela komutwe?

²² Tyotyili, omuhikuena oo wahimbika otyinepo tyae monkhalelo yapama nawa. Aveho ankho vehole unene Jeova iya ankho vahanda okukala ovohe vonondunge nokuna oluembia opo vemuhambukiswe. Tyotyili, ankho mavatambula ononkhano onongwa komutwe, mahi tupu mavakala novitateka ovinene. Ankho vena otyilinga tyokutekula Jesus, una makala omulume wankhimana unene mouye.