1. Ankho omuvo patyi wepuiya momuenyo wa Petulu?

PETULU kalimbuilueko ononthiki mbuna mbepuiya etyi Jesus emutala. Okuti watala momaiho a Jesus otyilekeso tyokuti wanumana ine kemupandele vali? Katutyii mahi ehipululo lipopia vala okuti: “Tatekulu wapiluluka atale ku Petulu.” (Luc. 22:61) Mahi okutala oko, Petulu wamona okuti etyi alinga tyapenga. Waimbuka okuti walinga umwe etyi Jesus ankho apopia, otyipuka Petulu aanene okuti kametyilingi: okuanya Omulongesi wae ehole. Ku Petulu ovipuka tyafuile ankho viapiluluka, onthiki yepuiya momuenyo wae.

2. Oityi Petulu ankho esukisa okulilongesa, iya oñgeni tupondola okupola ouwa kehipululo olio?

² Mahi haveho vakevelela okumona otyitateka ngo tya Petulu. Petulu ankho omulume wekolelo liapama iya pahe ankho una omphitilo yokulimbwa ovivi alinga nokulilongesila kelongeso enene Jesus emuavela. Otyo ankho okuevela. Onthue atuho tuesukisa okulilongesa elongeso olio. Ngotyo tulandulei oungendi wa Petulu.

3, 4. (a) Epulo patyi Petulu alinga Jesus, iya oityi Petulu ankho asoka? (b) Oñgeni Jesus alekesa okuti Petulu ankho uhongiliyua notyituwa tyikahi kononthi mbae?

³ Monohanyi epandu konyima, mo Kafarnau, mepundaumbo ankho akala, Petulu wapula Jesus okuti: “Tatekulu, ovikando viñgapi omukuatate wange mandingi oviponyo, iya ame andyimuevela? Alo ovikando epandu-vali?” Petulu ankho usoka okuti omukuatyali. Mokonda ononkhalamutwe mbonongeleya pomuvo opo ankho valongesa okuti tyesukisa okuevela vala tutatu! Jesus emukumbulula okuti: “Ame hikupopila okuti: Alo ovikando epandu-vali, mahi: Alo ovikando omakwi epandu-vali nepandu-vali.”​—Mat. 18:21, 22.

⁴ Okuti ankho Jesus ukahi nokulongesa Petulu opo ahoneke  oviponyo ovanthu vemulinga? Au, etyi apopia okuti he 7 mahi alo ovikando 77, ankho ukahi nokulongesa Petulu okuti okuevela katyihulila. (1 Cor. 13:4, 5) Jesus walekesa okuti Petulu ankho wahongiliyua notyituwa tyepuiya tyokuhaevela ankho tyakaka kononthiki mbae, kuna ovanthu vatala okuevela ngatyina vahoneka momukanda. Mahi, vana vahanda okuhetekela Huku vena okuevela vakuavo ovikando ovinyingi.​—Tanga 1 João 1:7-9.

5. Oityi tupondola okulilongesa vali konthele yokuevela?

⁵ Petulu kaanyene ekumbululo lia Jesus. Mahi okuti onondonga ombo mbehikile umwe komutima wae? Pamwe tulilongesa vala okuevela tyina tuamanoñgonoka okuti nonthwe tuesukisa okuevelwa. Ngotyo, tuhinangelei etyi tyaendelepo konyima yononkhia mba Jesus. Momuvo una ankho wepuiya, Petulu ankho wesukisa okuevelwa Nomulongesi wae.

6. Oñgeni Petulu akumbulula etyi Jesus ekahi nokulongesa ono apostolu okuliola omutima, iya oityi Jesus alinga?

⁶ Otyinthiki tyimwe tyahalimbuwa​—otyinkhiki tyahulililako tya Jesus pano pohi. Jesus ankho nkhele una ovipuka ovinyingi pala okulongesa ono apostolu mbae. Tyimwe ankho okuliola omutima. Jesus weveavela ongeleka yokuliola omutima etyi akoha onomphai mbavo, otyilinga tyimwe ankho tyilingwa nomupika. Tete Petulu wapula oityi Jesus makohela onomphai mbae. Konyima anye Jesus akohe onomphai mbae. Mahi okulandulako emuiti ahakohe vala onomphai, mahi akohe omankhanya nomutwe! Jesus noumphua-lundo emupopila nawa esilivilo nehangununo lietyi ekahi nokulinga.​—João 13:1-17.

7, 8. (a) Omononkhalelo patyi Petulu alola oumphua-lundo wa Jesus? (b) Oñgeni Jesus atualako okulekesa okankhenda notyituwa tyokuevela?

⁷ Pakala vala katutu, Petulu alolo oumphua-lundo wa Jesus. Ono apostolu vahimbika okutañguna olie puvo omunene vali, Petulu nae elipake monkhalelo oyo ombi yokulekesa omalityindailo ovanthu vena. Nongotyo, Jesus weveviula nawa nokuvepandula movipuka oviwa valingile, ekolelo noukuatyili valekesa Komulongesi wavo. Mahi wapopile okuti aveho mavemusipo. Petulu apopi okuti makala ponthele ya Jesus alo umwe kononkhia. Jesus aulu okuti Petulu maanye Omulongesi wae ovikando vitatu tyina ekuandambolo lihenepopie liavali. Petulu kaanyene vali etyi Jesus apopia, mahi nkhele welipakako okuti makala vali nekolelo kono apostolu ononhuavo ambuho!​—Mat. 26:31-35; Mar. 14:27-31; Luc. 22:24-28; João 13:36-38.

 ⁸ Okuti Jesus ankho kapuile vali elundo na Petulu? Tyotyili, momuvo oo auho wokuepuiya Jesus watualako okutala otyiwa mono apostolu mbae ovakuankhali. Ankho utyii okuti Petulu maponyo, nongotyo ati: “Ame ndyikahi nokukuitilako unene nomalikuambelo, opo ekolelo liove lihatepuluke. Iya ove tyina wamakondoka pameka ovakuatate vove.” (Luc. 22:32) Jesus ankho una onthumbi yokuti Petulu mapame vali mopamphepo, nokulinga ovilinga viae nekolelo. Jesus ankho una ovituwa oviwa nokuevela!

9, 10. (a) Motyikunino tyo Getsemani, eviyulo patyi Petulu ankho esukisa? (b) Oviponyo via Petulu vituhinangelesa tyi?

⁹ Konyima, motyikunino tyo Getsemani, Petulu ankho wesukisa okuviyulwa unene. Jesus waita Petulu, na Tiago na João vakale tyipahi putyina elikuambela. Jesus ankho weihamenwa unene nokuesukisa ekuateso, mahi Petulu na vakuavo avalala ovikando ovinyingi. Jesus, nokankhenda notyituwa tyokuevela, wapopia okuti: “Ospilitu ina otyiho, mahi ohitu yanama.”​—Mar. 14:32-41.

¹⁰ Konyima yotyo akuya ovanthu ovanyingi vatyinda oviihi, nomakatana, novimuti. Oo ankho omuvo wokukala tyalunguka. Mahi Petulu nokuanumana, apolomo omutunga alwisa Maluku, omupika womunene-nawa, emutete okutwi. Nokuapoleya Jesus aviyula Petulu, ahakula omunthu oo, ahangununa onondonga mbuhongolela ovalanduli vae alo hono, okuti kavapondola okulwa. (Mat. 26:47-55; Luc. 22:47-51; João 18:10, 11) Petulu ankho wesukisale okuevelwa Nomulongesi wae. Otyo tyituhinangelesa okuti atuho pamwe tulinga oviponyo. (Tanga Tiago 3:2.) Olie puonthue uhesukisa okuevelwa na Huku ononthiki ambuho? Iya Petulu motyinthiki otyo nkhele malingi oviponyo ovikuavo ovinyingi.

11, 12. (a) Oñgeni Petulu alekesa okuti wakola omutima etyi alandula Jesus wakuatua? (b) Oñgeni Petulu ahafuisilepo etyi apopile okuti metyilingi?

¹¹ Jesus wapopila ovanthu ovo okuti inkha oe veya okuovola vayeke ono apostolu vaye. Putyina vakuta Jesus, Petulu otyo atala ahalingi natyike. Konyima akahateka ngetyi tyalinga ono apostolu ononkhuavo.

¹² Petulu na João tyafuile vatalama popepi neumbo lio Munene-nakwa Anasi, muna ovanthu vehimbikila okupula Jesus. Etyi Jesus atyindwa Petulu na João avalandulako “otyo veli vala kokule.” (Mat. 26:58; João 18:12, 13) Petulu ankho  hamukuawoma. Okulandula ovanthu vandyinda Jesus tyilekesa okuti wakola omutima. Mokonda ovanthu ovo ankho vamaneka, iya Petulu umwe wemutetale okutwi. Mahi, Petulu ankho kekahi nokulekesa oukuatyili una apopile okuti wafuapo opo ankhile ponthele Yomulongesi wae.​—Mar. 14:31.

13. Oipi onkhalelo ike yaviuka yokulandula Kristu?

¹³ Nga Petulu, ovanthu ovanyingi hono vahanda okulandulila Kristu “kokule” ine monkhalelo imwe yahaimbukwa novanthu. Mahi ngetyi Petulu muene ahoneka, onkhalelo ike yaviuka yokulandula Kristu okukala popepi Yae, okuhetekela ongeleka Yae movipuka aviho, namphila pamoneka ovitateka.​—Tanga 1 Pedro 2:21.

14. Oñgeni Petulu alamba otyinthiki etyi Jesus ankho ekahi nokukoyeswa?

¹⁴ Nokuavindya, Petulu walandula Jesus alo ehika pombundi yeumbo limwe enene liankhimana mo Jelusalei. Ankho eumbo lia Kaifaa, omunene-nakwa, wamona, nokuankhimana. Omaumbo oo ankho atungwa pokati apakala epata, kombundi yeumbo akukala epito enene. Petulu ahayekwa anyingile. Mahi mokonda ankho João wanyingilale aiti vayeke Petulu nae anyingile. Tyafuile Petulu kakalele ponthele ya João, tupu kanyingilile mondyuo opo akale ponthele Yomulongesi wae. Mokutala wakala pepata, ankho pena ovapika novaumbili vekahi peiko liotupia, okutala vana ankho vekahi nokwava oumbangi womatutu vanyingila nokulupuka tyina Jesus akoyeswa.​—Mar. 14:54-57; João 18:15, 16, 18.

15, 16. Hangununa oñgeni eulo lia Jesus konthele yokuanya tutatu liafuisuapo.

¹⁵ Ponthele yotupia, omuhikuena una wayekele Petulu anyingile pahe emutale nawa, emuimbuka. Emupopi okuti: “Nove ankho ukahi na Jesus, omu Galileia!” Nokuauhululwa Petulu ati kei Jesus, alo umwe elilingisa ngatyina ehei etyi omuhikuena oo ekahi nokupopia. Aende ponthele yepito, opo ovanthu vehemuimbuke, mahi omuhikuena omukuavo emumono apopi ngetyi tyapopile wotete, okuti: “Omulume ou ankho ukahi na Jesus, omu Nasare.” Petulu aane okuti: “Omulume oo himwi.” (Mat. 26:69-72; Mar. 14:66-68) Tyafuile okonyima yetyi Petulu aanya Jesus otyikando tyavali eivi ekuandambolo liapopia, mahi ankho wasukalala novipuka ovikuavo ahahinangela eulo Jesus alingile mo noola mbumwe konyima.

¹⁶ Pakala vala katutu, etyi nkhele Petulu ekahi nokuliholeka, ovanthu vamwe ankho vekahi pepata avafuene pwe. Umwe ankho ombunga ya Maluku, omupika una Petulu atetele okutwi.  Apulu Petulu okuti: “Hekumuene nae kotyikunino?” Petulu ehetavela okuti otyo otyili. Ngotyo aane, tyafuile wapopia okuti inkha ukahi nokukemba ha upondola okuhitiswa. Kamaneniale okupopia eivi ekuandambolo liapopia liavali motyinthiki otyo.​—João 18:26, 27; Mar. 14:71, 72.

17, 18. (a) Oñgeni Petulu akala etyi amona okuti walinga otyiponyo otyinene Komulongesi wae? (b) Tyipondola Petulu welipula konthele yatyi?

¹⁷ Jesus eya pana petavela okutala pepata. Atale ku Petulu ngetyi tyapopiwa konthyimbi yokapitulu aka. Petulu ahinangela otyiponyo otyinene alinga Komulongesi wae. Petulu atundu pepata, nokueihamenwa. Alupuka nokulila okuenda vala nomomatapalo epundaumbo, komwi wohanyi ihungi kokunyingila. Nomaiho eyula ononkhuka, Petulu alili unene.​—Mar. 14:72; Luc. 22:61, 62.

¹⁸ Tyina omunthu alinga onkhali onene ngoyo, upondola okusoka okuti otyiponyo tyae otyinene unene katyivilwa okuevelwa. Petulu tyafuile wasoka ngotyo. Okuti Petulu upondola okuevelwa?

19. Oñgeni Petulu elitehelela kotyiponyo tyae, mahi oñgeni tutyii okuti kelinyengelwe?

¹⁹ Tyipuiya okusoka omuihamo Petulu atehelela etyi kuatya. Iya ovipuka viaenda monthiki oyo viayawisa vali komuihamo wae! Petulu welivelele unene onombei etyi asoka okuti Omulongesi wae wankhia monthiki oyo, konyima yononkhumbi ononene. Petulu tyafuile wanumanene unene etyi aimbuka okuti wayawisa komuihamo Womulongesi wae monthiki yahulililako yomuenyo wae pano pohi. Namphila Petulu ankho anumana unene mahi ankho kelinyengelwe. Otyo, tutyii mokonda ehipululo lilekesa okuti konyima eliongiya vali novakuatate vae. (Luc. 24:33) Tyotyili, ono apostolu velivelele onombei mokonda yetyi valingile motyinthiki tyina tyepuiya, tyafuile avelipameka poyavo.

20. Oityi tupondola okulilongesila ku Petulu motyikando tyahulililako?

²⁰ Moluotyo, Petulu welitehela okuti oo omuwo waviuka vali palae. Tyina omuumbili wa Huku atoka, tyakolela vali hatyiponyo tyae, mahi etokolo alinga liokupindukapo ine okulivela. (Tanga Provérbios 24:16.) Petulu walekesa ekolelo enene okuliongiya  novakuatate vae namphila ankho anumana unene. Tyina omunthu ankhia ohonyi ine wanumana, uhanda okukala aike, mahi otyo otyivi. (Pro. 18:1) Tyaviuka okufuena kovakuatate vetu nokulinga ononkhono mbokuumbila Huku.​—Heb. 10:24, 25.

21. Mokonda Petulu ankho weliongiya novakuatate vae, onondaka patyi eiva?

²¹ Mokonda ankho ukahi novakuatate vae, Petulu weivile onondaka mbunumanesa mbokuti olutu lwa Jesus meendo kalumo. Petulu na João avahateka okukatala peendo lia Jesus ankho papatwa. João tyafuile mokonda ankho oe omona vali, wehika tete avasi elangalo liumbululu, ahanyingila. Mahi Petulu anyingila. Namphila ankho aponwa, wanyingila tyihakevela. Mendo ankho mutupu omunthu!​—João 20:3-9.

22. Oñgeni okunumana nondima viatunda momutima wa Petulu?

²² Okuti Petulu ankho utavela okuti Jesus watutila? Potete ketavelele, alo etyi eiva ovakai vamwe vemupopila okuti vamona oandyu yapopia okuti Jesus watutila. (Luc. 23:55–24:11) Mahi komakumbi, Petulu ankho kanumanene nokuhena vali ondima. Jesus ankho una omuenyo, oandyu imwe yepondolo enene! Amoneka kono apostolu mbae ambuho. Mahi etyi nkhele ehenemoneke kuvo walinga otyipuka tyimwe. Ono apostolu vapopia okuti monthiki oyo: “Tatekulu tyotyili wapinduluapo, wamonekela Simau!” (Luc. 24:34) Tupu, apostolu Paulu konyima wahoneka konthele yonthiki oyo okuti Jesus “wamonekela Sefa, konyima amonekela ekwi na vevali.” (1 Cor. 15:5) Sefa na Simau omanyina omakuavo a Petulu. Jesus wamonekelele Petulu monthiki oyo tyafuile etyi ekahi aike.

23. Omokonda yatyi Ovakristau hono valinga onkhali vesukisa okuhinangela etyi tyaendele na Petulu?

²³ Ombimbiliya kaipopi atyiho tyaendelepo etyi Petulu na Jesus velivasa vali. Mahi tupondola okusoka oñgeni Petulu elitehelele etyi elivasa vali na Tatekulu yae ehole pahe una omuenyo nokukala nomphitilo yokupopia konthele yelivelo liae. Etyi ankho Petulu ahanda vali okuevelwa. Olie upondola okupatana okuti Jesus tyilityili wemuevela? Ovakristau hono valinga oviponyo vesukisa okuhinangela etyi tyamonekelele Petulu. Katupondola okusoka okuti Huku kametuevela vali. Jesus wahetekela nawa-nawa Tate yae una “wevela unene.”​—Isa. 55:7.

24, 25. (a) Popia otyinthiki tyahulililako etyi Petulu ankho ekahi Melunga lio Galileia. (b) Oñgeni Petulu akala etyi Jesus alinga ehuviso onthiki onkhuavo?

²⁴ Jesus wapopila ono apostolu mbae opo vende ko Galileia,  oku mavekelivasa vali. Etyi vehika, Petulu akafwa ombisi Melunga lio Galileia. Vakuavo avaende nae. Petulu uli vali metala lina ankho ehole okukala. Tyina atehelela owato ulikuekueka, nomuvielo womanyonda elunga, nowanda akuata tyimuhambukiswa, mokonda ukahi motyilongo tyae. Ovanthu ovo motyinthiki otyo kavakuatele natyike.​—Mat. 26:32; João 21:1-3.

²⁵ Mahi omunthu umwe ankho ukahi koluhimba, eveihana evepopila vayumbe owanda konthele onkhuavo yowato. Avakuate onombisi 153! Petulu ankho utyii olie omunthu oo.  Ahomboka kowato aende alo koluhimba. Koluhimba oko Jesus eveavela ombisi yayokwa komakala. Otyo atala unene ku Petulu.​—João 21: 4-14.

26, 27. (a) Oityi Jesus aita Petulu apopie ovikando vitatu? (b) Oñgeni Jesus alekesa okuti waevela Petulu?

²⁶ Jesus apulu Petulu ankho uhole Tatekulu yae “tyipona ava”, tyafuile otyo ayulika kombisi. Okuti oluembia lwa Petulu luokufwa luapona oluembia ena na Jesus? Ngetyi Petulu aanyene Tatekulu yae ovikando vitatu, Jesus wemuita apopie tutatu inkha uhole tatekulu yae, otyo vakuavo vatala. Movikando vitatu Jesus wemupopila oñgeni malekesa oluembia olo: mokupaka ovilinga via Huku komutwe yovipuka aviho, nokuava okulia, nokunthita otyunda tya Kristu, ovalanduli Vae vekolelo.​—Luc. 22:32; João 21:15-17.

²⁷ Ngotyo, Jesus walekesa nawa okuti oe na Tate yae vapanda Petulu. Nehongolelo lia Kristu, Petulu makala notyilinga tyimwe otyinene meuaneno. Olio elekeso enene liokuti Jesus waevela Petulu! Tyotyili okankhenda oko kehika komutima wa Petulu.

28. Oñgeni Petulu alinga ovipuka vielikuata nenyina alukwa?

²⁸ Petulu wafuisapo nawa otyilinga apewa noukuatyili mokueenda kuomanima omanyingi. Wapameka ovakuatate vae, ngetyi Jesus apopile puetyi ehungi kokunkhia. Petulu ankho omuna luembia nokuapwa elundo pokulisa nokuyunga nawa ovalanduli va Kristu. Omulume utiwa o Simau wakalele ngetyi tyipopia enyina Jesus emuevela​—Petulu, ine Onkhanda​—wayumbua onthumbi nokupameka ewaneno. Otyo tyimoneka nawa momikanda vivali Petulu ahoneka avikala omikanda viakolela Viombimbiliya. Omikanda ovio tupu vialekesa okuti Petulu kalimbuilueko etyi alongeswa na Jesus konthele yokuevela.​—Tanga 1 Pedro 3:8, 9; 4:8.

29. Oñgeni tupondola okuhetekela ekolelo lia Petulu nokankhenda Komulongesi wae?

²⁹ Ongeleka ongwa pala onthue. Okuti ononthiki ambuho tuita ku Huku etuevele oviponyo vietu ovinyingi? Okuti tutavela okuevelwa nokutavela epondolo ena liokutusukula? Okuti tuevela vakuetu? Inkha tulinga ngotyo, matuhetekela ekolelo lia Petulu, nokankhenda Komulongesi wae.