Ovipuka ovivi vikahi nokumoneka hono, vilekesa okuti apa katutu oohi maikala omphangu imue ongwa. Ombimbiliya yapopia okuti, tete ovanthu mavakapita momuvo umue wovitateka ovinyingi. Konyima oohi maikapilululwa omphangu imue ongwa. Hono tukahi nokupita momuvo watyo oo. Pahe matutale ovipuka vimue viapopiwa Mombimbiliya okuti mavikamoneka:

Ovita. “Otyilongo matyikaluisa otyilongo otyikuavo iya ouhamba maukaluisa ouhamba omukuavo.” (Mateus 24:7) Otyo tyikahi nokupita tyili. Okutundilila ko 1914, kuapita ovita ovinene novitutu. Ovanthu ovanyingi vankhia movita ovio.

Omauvela omanyingi. Kononthele mbumue makukakala omukihi. (Lucas 21:11) Okuti otyo tyikahi nokumoneka tyili? Enga. Omauvela omutima, omukolo omunene, ouvela utundilila konome, o Sida, nomauvela omakuavo vali, ekahi nokuipaa ovanthu ovanyingi hono.

Ondyala. Ovanthu ovanyingi mouye auho vetupu okulia kutuuka. Kese enima, ovanthu ovanyingi vekahi nokunkhia nondyala. Olyo elekeso ekuavo liokuti apa katutu oohi maipilululwa omphangu imue ongwa. Ombimbiliya yati: Makukakala ondyala.—Marcos 13:8.

 Ovinimawe. Konomphangu mbumue makukamoneka ovinimawe. (Mateus 24:7) Tupu otyo tyikahi nokupita momuvo wetu. Okutundilila ko 1914, ovanthu ovanyingi vekahi nokunkhia novinimawe.

Ovanthu onondingavivi. Ovanthu mavakakala “nohole nonombongo” “nokulihole ovo muene.” Ovo mavakakala vali “nohole novitalukilo tyipona ohole na Huku.” Ovana “kamavakatavela ovohe novoina.” (2 Timóteo 3:1-5) Ovanthu ovanyingi hono otyo vekahi nokulinga. Ovo vetupu onthilo na Huku. Tupu vekahi nokuetela ovitateka vana vahanda okulilongesa kombinga ya Huku.

Oungangala. Tupu makukakala ovanthu ovanyingi vahatavela ovitumino. (Mateus 24:12) Hono oungangala ukahi vali nokuliyauisa tyipona komanima okualamba. Ovanthu kononthele ambuho vapondola okutokela pomavoko onongangala.

Ovipuka ovio aviho vilekesa okuti Ouhamba wa Huku ukahi popepi. Ombimbiliya yati: “Putyino mutala okuti ovipuka evi vikahi nokumoneka, noñgonokei okuti Ouhamba wa Huku ukahi popepi.” (Lucas 21:31) Ouhamba wa Huku oityi? Outumino wa Huku ukahi keulu. Outumino oo, o maukapilulula oohi ino omphangu imue ongwa. Ouhamba wa Huku maukapinga omautumino aeho ovanthu.—Daniel 2:44.