Opo ukale epanga lia Huku, wesukisa okulilongesa kombinga yae. Okuti omapanga ove ei enyina liove iya velipopia? Enga. Tupu Huku uhanda ove unoñgonoke enyina liae nokulipopia. Enyina lia Huku o Yehova. (Salmo 83:18; Mateus 6:9) Tupu una yokulilongesa oityi Huku ehole netyi eyele. Wesukisa okunoñgonoka omapanga ae nonondyale mbae. Okunoñgonoka omunthu tyesukisa omuvo omunyingi. Ombimbiliya ipopia okuti okukala nomuvo wokulilongesa kombinga ya Yehova tyina esilivilo enene.—Efésios 5:15, 16.

Omapanga a Huku alinga ovipuka vimuhambukiswa. Sokolola kombinga yomapanga ove. Inkha uvepopia omapita, nokulinga ovipuka veyele, okuti mavatualako okukala omapanga ove? Kamavatualako. Tupu nove inkha uhanda okukala epanga lia Huku, wesukisa okulinga ovipuka vimuhambukiswa.—João 4:24.

Onongeleya hambuhoko mbulongesa ovanthu okukala omapanga a Huku. Yesu, epanga enene lia Huku, wapopile kombinga yonondyila onombali. Wati okuti: Ondyila imwe yahandyuka, iya ovanthu ovanyingi omo vekahi nokuendela. Ondyila oyo ituala kononkhia. Ondyila onkhuavo yahita, iya ovanthu kavehi vekahi nokuendelamo. Ondyila oyo ituala komuenyo waapeho. Etyi tyihangununa okuti inkha ove uhanda okukala epanga lia Huku, una yokulilongesa onkhalelo yaviuka yokumufendela.—Mateus 7:13, 14.