Onalupi iya omokonda yatyi omphange ena okukuta elesu komutwe pokulinga ovilinga vimwe vielikuata nefendelo liae? Matutale etyi apostolu Paulu ahoneka konthele oyo. Utuavela onondonga tuesukisa opo tulinge omatokolo omawa, ankhimaneka Huku. (1 Coríntios 11:3-16) Paulu upopia ononthele ononthatu tuna okutala nawa: (1) ovilinga omukai esukisila okukuta komutwe, (2) mononkhalelo esukisa okutyilinga (3) nomahunga pala okuundapesa otyitumino otyo.

Ovilinga. Paulu wapopia ovilinga vivali: Elikuambelo nokuula. (Oversikulu 4, 5) Elikuambelo okupopia na Jeova, lilinga onthele yefendelo. Hono, omuumbili Omukristau tyina alongesa Ombimbiliya ongatyina ekahi nokuula. Okuti Paulu ankho uhanda okupopia okuti omukai una okukuta komutwe apeho tyina elikuambela ine alongesa Ombimbiliya? Au. Atyiho tyitei apa malingila elikuambelo ine okulongesa.

Ononkhalelo. Onondaka mba Paulu mbupopia ononkhalelo onombali—mombunga no mewaneno. Wati: “Omutwe  womukai omulume . . . ovakai aveho velikuambela ine okuula tyihakutile komutwe vakundisa omutwe wavo”. (Oversikulu 3, 5) Mombunga, Jeova waholovona omulume akale omutwe womukai. Pamwe tyesukisa omukai alinge otyilinga Jeova aavela omulume. Mahi, inkha etyilinga ahaimbuka outumini womulume wae ukahi nokumukundisa. Mongeleka, inkha tyesukisa omukai alongese omunthu Ombimbiliya ponthele yomulume, una okuimbuka outumini wae akutu komutwe. Una okukuta komutwe tyilinge omulume wambatisalua ine kambatisalelwe, mokonda oe omutwe wombunga. * Inkha elikuambela ine alongesa ponthele yomona omututu wambatisalua tupu una okukuta komutwe, otyo katyilekesa okuti omona omutwe wombunga, mahi omokonda youtumini upewa ovalume vambatisalwa mewaneno Liovakristau.

Paulu wapopila ewaneno okuti: “Inkha omunthu umwe uhanda okutañguna konthele yotyiso otyikuavo, onthue tutupu otyituwa otyo, tupu nomawaneno a Huku etupu otyituwa otyo.” (Oversikulu 16) Mewaneno, outumini upewa vala ovalume vambatisalwa. (1 Timóteo 2:11-14; Hebreus 13:17) Ovalume ovo vala vaholovonwa opo vakale ovakulu vewaneno novakuatesiko vavo opo valinge otyilinga vapewa na Huku tyokuyunga otyiunda tyae. (Atos 20:28) Pamwe, tyesukisa okuholovona omukai opo alinge otyilinga ñgeno ankho tyilingwa nomulume wambatisalua. Mongeleka, hamwe wesukisa okuendesa eliongiyo liokuenda movilinga viokuivisa mokonda petupu omulume wambatisalua nokuafwapo mewaneno. Ine hamwe ulongesa omunthu Ombimbiliya ponthele yomukuatate wambatisalua. * Mokonda ovilinga ovio vilinga onthele yewaneno lio Vakristau, una okukuta komutwe okuimbuka okuti ukahi nokulinga otyilinga ñgeno ankho tyilingwa nomukuatate.

 Tupu, kuna ononthele ononkuavo mbefendelo omphange ehesukisile okukuta komutwe. Mongeleka, kesukisile okukuta komutwe tyina akumbulula momaliongiyo, na tyina aya movilinga viokuivisa umbo na umbo nomulume wae ine omukuatate omukuavo wambatisalua, ine tyina elilongesa nokulikuambela novana vae vehenembatisalwe. Tyotyili, papondola okumoneka omapulo konthele oyo. Inkha omphange umwe ketyinoñgonokele nawa upondola okukaovola momikanda omikuavo vipopia konthele oyo. * Inkha omphange nkhele nongotyo akala tyihena onthumbi oñgeni apondola okulinga, iya omutima wae aumuhindila okukuta komutwe, upondola okutyilinga katyapengele.

Omahunga. Moversikulu 10, tuvasamo omahunga evali alunda Omukristau okufuisapo otyitumino otyo: “Omukai una okukala nenyingilikilo lioutumini komutwe wae mokonda yonoandyu.” Tete tala ondaka “enyingilikilo lioutumini.” Okukuta komutwe, onkhalelo imwe omukai alekesa okuti wiimbuka outumini Jeova aavela ovalume vambatisalwa mewaneno. Ngotyo, ulekesa ohole yae noukuatyili ku Jeova Huku. Ehunga liavali, livasiwa monondaka ombu, “mokonda yonoandyu.” Oñgeni tyikalesa onoandyu tyina omukai akuta komutwe?

Onoandyu mbuhambukwa unene tyina mbutala okuti outumini wa Huku ukahi nokuimbukwa meongano aliho lia Jeova, tyilinge peulu ine pohi. Ombo tupu mbulilongesila kongeleka ovanthu ovakuankhali vaava konthele oyo. Tyotyili, onoandyu nambo mbesukisa okutavela ovitumino via Jeova —ovitumino onoandyu ononyingi kohale mbaponyene. (Judas 6) Onoandyu hamwe mbutala tyina omphange umwe ena vali ounongo, nenoñgonoko, tyipona omukuatate wambatisalua mewaneno, mahi nongotyo ulekesa okuti wafuapo pala okutavela outumini wae. Mononkhalelo mbumwe, omphange omulembulwa makatumina na Kristu. Omphange oo makalinga otyilinga tyimwe tyavilapo vali kotyilinga tyo noandyu nokukatumina na Kristu keulu. Oyo ongeleka ongwa pala onoandyu mbutale! Tyotyili, mokonda youkuatyili wavo nokutavela, onomphange vena elao limwe enene liokulekesa konoandyu ononyingi mbekolelo okuti vena omutima weliola!