Mu 1 Coríntios 6:1-8 apostolu Paulu wapopia konthele Yovakristau okulituala konombonge. Walekesa okuti wanumana mokonda Ovakristau vamwe ko Korintu ankho ‘vatuala ovitateka vena vikakoyeswe na vana vehevaviuki.’ (Oversikulu 1) Paulu wapopia omahunga omanene Ovakristau vena okutetulula ovitateka vena navakuavo mewaneno, tyipona okuenda kovakoyesi. Tutalei omokonda yatyi Paulu apopila onondonga ombo iya konyima atutale ovitateka vimwe vihesukisile okuundapesa onondonga ombo.

Inkha tuna otyitateka tyimwe konthele yovitanda nomukuatate, tete tuna okuovola okutetulula otyitateka monkhalelo Jeova asoka atuhatetulula monkhalelo yetu. (Provérbios 14:12) Ngetyi Jesus alekesa, otyiwa okutetulula liwa-liwa otyitateka tuna namukuetu, tyina nkhele tyehenevilepo. (Mateus 5:23-26) Mahi, Ovakristau vamwe vakala notyituwa tyokutañguna alo umwe vatuala ovitateka viavo konombonge. Paulu wati: “Otyo tyilekesa okuti muafindwa, tyetyi muna onondyaya pokati kenyi.” Omokonda yatyi? Mokonda okutuala ovakuatate vetu kovakoyesi tyipopisa omapita ewaneno na Huku tufenda. Moluotyo, tupakei momutima epulo lia Paulu liati: “Oityi muheliyekela okulingwa etyi tyihaviukile?”—Oversikulu 7.

Tupu Paulu wapopia okuti Huku walinga epongiyo eewa opo ewaneno litetulule ovitateka ovinyingi pokati kovakuatate. Ovakulu vewaneno ovanongo mokonda vanoñgonoka nawa otyili Tyombimbiliya, iya Paulu wapopia okuti ovo vafuapo pala “okukoyesa . . . ovakuatate” konthele “yovipuka viomuenyo uno.” (Oversikulu 3-5) Jesus wapopia ovipuka vitatu tuesukisa okulinga pala okutetulula ovitateka viakutikinya ononkhali ononene,  okutendeleya nokuvaka: Tete okuovola okupopia nomunthu una nae otyitateka; vali, inkha kekutehelela endako vali nomunthu wike ine vevali; tatu, inkha nongotyo ketavelele, tuala otyitateka kovakulu vewaneno.—Mateus 18:15-17.

Tyotyili ovakulu vewaneno havakoyesi ine ovalume vovitanda, tupu kavapondola okukoyesa ngotyo. Ovo kavaave ovitumino vilekesa oñgeni ovakuatate vena okutetulula otyitateka konthele yovitanda. Mahi, vaovola okukuatesako ovakuatate vaundapese ovitumino Viombimbiliya opo vakale nombembwa. Inkha otyitateka tyepuiya okutyitetulula, hamwe vatokola okupopia nomutalelipo womauaneno ine okuhonekela ko Filiyale yo Nombangi mba Jeova. Kuna ovitateka vimwe vihesukisile okuundapesa onondonga mba Paulu. Ovipi?

Ovikando vimwe, tyesukisa okutetulula ovitateka ovitutu nohole nombembwa, tyina muakutikinya ovipuka viesukisa okuenda kombonge. Mongeleka, hamwe okuenda kombonge oyo vala ondyila pala okulihenga, nokukala novana, nokutokola onombongo mbokulia, nokufeta Elilimu, nokuhoneka omukanda pala okutokola olie makala novipuka viove tyina wamankhi. Tupu hamwe omukuatate usoka okuti wesukisa okutuala kombonge omukuatate wae opo eliamene kotyiponga. *

Inkha omunthu wovola ombatelo kovatumini notyituwa tyombembwa, kekahi nokutomba onondonga mba Paulu. * Mahi, Omukristau una okusukalala vali nokusukukisa enyina lia Jeova nokuamena ombembwa newaneko mewaneno. Ovalanduli va Kristu vaimbukilwa kohole iya “ohole . . . kaiovola okulinga omahando ayo muene.”—1 Coríntios 13:4, 5; João 13:34, 35.