Jeova ukevelela ovalinepi vafuisepo omphango yotyinepo valinga. Etyi Jeova anepesa omulume wotete nomukai wotete, wapopia okuti: “Omulume . . . meliwaneka nomukai wae, avakala vala olutu lwike.” Konyima, Jesus Kristu wapitulula onondaka ombo ayawisako okuti: “Moluotyo, etyi Huku apaka kokanga ike, omunthu ehetyiyapule.” (Gênesis 2:24; Mateus 19:3-6) Ngotyo, Jeova na Jesus vatala otyinepo ngotyipuka tyitualako, tyimanuhuka vala tyina umwe povalinepi amankhi. (1 Coríntios 7:39) Mokonda otyinepo tyikola, okulihenga otyipuka tyimwe tyesukisa okutalwa nawa. Tyotyili,  Jeova uyele vana velihenga, tyina nawike povalinepi walinga oumbalehi.—Malaquias 2:15, 16.

Oityi Ombimbiliya ipopia tyituala ovanthu kokulihenga? Jeova uyele oumbalehi noundalelapo. (Gênesis 39:9; 2 Samuel 11:26, 27; Salmo 51:4) Uyele unene oundalelapo iya utyitala ngotyipuka tyipondola okutuala ovalinepi kokulihenga. (Opo unoñgonoke oityi oundalelapo tala Okapitulu 9, palagrafu 7.) Jeova wavela omphitilo ovalinepi opo vatokole inkha matualako okukala nauna walinga oundalelapo ine mavelihenge. (Mateus 19:9) Ngotyo, inkha una wahalingile oumbalehi utokola okulihenga, kamalingi otyipuka Jeova eyele. Tupu, ewaneno kaliavela ondundo omunthu opo velihenge. Tyotyili, mokonda yovipuka vimwe, omunthu hamwe utokola okutualako okukala nomunthu walinga oumbalehi, haunene inkha omunthu oo welivela nomutima auho. Mahi, tyina umwe povalinepi amalingi oumbalehi, una wokuna ehunga lielikuata Novihonekwa pala okulihenga upondola okutyilinga mahi una okutavela ovitateka vipondola okumonekapo.—Gálatas 6:5.

Tyina pamoneka ovitateka ovinene, Ovakristau vamwe vatokola okuliyapuka ine okulihenga mahi apehena ou walinga oundalelapo. Mahi, Ombimbiliya ipopia okuti una ulinga ngotyo una “okutualako okukala tyihanepwa ine inkha hatyo akondoka vali.” (1 Coríntios 7:11) Omukristau uvasiwa motyitateka otyo, kapondola okunepa ine okunepwa nomunthu omukuavo. (Mateus 5:32) Tutalei ovitateka vimwe ovanthu vamwe vatala okuti vipondola okutuala ovanthu kokuliyapuka.

Wanya Tyawina okutekula ombunga. Ombunga imwe hamwe itupu etyi ilia mokonda omulume katekula vali ombunga, namphila ena onombongo pala okutyilinga. Ombimbiliya yati: “Inkha umwe katekula ombunga yae . . . ukahi nokuanya ekolelo, iya wapona una uhena ekolelo.” (1 Timóteo 5:8) Inkha omulume uvasiwa motyitateka otyo wanya okupilulula olusoke lwae, omukai una okutola inkha  wesukisa okuyakulila ouwa wae no wovana vae mokuliyapuka nomulume wae. Inkha Omukristau umwe utendeleyua okuti kekahi nokutekula ombunga, ovakulu vewaneno vesukisa okunoñgonoka nawa otyitateka otyo, mokonda omunthu upondola okupolwa mewaneno.

Okutekula nonya ou welinepa nae. Omukristau uveta ou elinepa nae, upaka motyiponga ekongoko alo umwe omuenyo wae. Inkha omulume uveta omukai wae Omukristau, ovakulu vewaneno vena okutala nawa inkha otyo otyili ine omatutu. Omunthu wonyengo onene nomukalavi upondola okupolwa mewaneno.—Gálatas 5:19-21.

Okupaka motyiponga oupanga omunthu ena na Huku. Omulume ine omukai utyilika ou elinepa nae opo ahafende Huku, hamwe alo umwe okumukuluminya okuyekapo okuendela movitumino via Huku. Mononkhalelo ombo, ou ukahi nokupita motyitateka otyo oe una okutokola inkha okuliyapuka oyo onkhalelo yaviuka opo atualako “okutavela ku Huku, tyipona kovanthu”.—Atos 5:29.

Inkha pamoneka ovitateka ngovio, nawike upondola okuvekuluminya okuliyapuka ine okutualako okukala nomulume ine nomukai wae. Namphila ovakulu vewaneno nomapanga anoñgonoka nawa Ovihonekwa, vapondola okuvatela nokuavela onondonga Mbombimbiliya, ovo kavetyii atyiho konthele yetyi tyapita nomulume nomukai. Jeova oe vala utala atyiho. Tyotyili, omukai Omukristau kekahi nokuhumba Huku notyinepo inkha eliyava unene natyina pena ovitateka ovitutu opo vala veliyapuke nomulume wae. Jeova utyii nawa tyina omunthu aovola onomphitilo mbokuliyapuka, namphila ekahi nokuholeka otyipuka tyimwe. Tyotyili, “ovipuka aviho vikahi poluhandya komaiho a una meketukoyesa.” (Hebreus 4:13) Mahi, inkha otyitateka tyimwe otyinene tyitualako, nawike upondola okukoyesa Omukristau watokola okuliyapuka nou elinepa nae. Tutyii okuti “onthue atuho matukakala lutai kolupala luotyipundi tyekoyeso tya Huku.”—Romanos 14:10-12.