Vaivisi vakwetu tuhole:

Okuhumba Huku, nokuhumba vakwetu otyo tyitwavela ondundo ‘atweende tukalongese ovanthu vomihoko aviho valinge ovalongwa, avambatisalwa.’ (Mat. 28:​19, 20; Malu. 12:​28-31) Olwembia luna ononkhono. Ine tuhumba ovanthu, matukwatesako “aveho . . . vesuka umwe natyo vehiwa omwenyo wahapu.” — Ovil. 13:48.

Konyima oku, etyi ankho tusuka vali natyo okupaka momutwe etyi matukapopia, nokusila omunthu omukanda. Mahi pahe twesukisa okulilongesa okukala vali ovanongo pokutomphola novanthu. Twahanda okupopia etyi ovanthu vesuka natyo, tyimoneke okuti tuvehole. Otyo tyilekesa okuti, tuna okutala kweetyi munthu na munthu esuka vali natyo, etyi tyimulingisa otyiho, atwahapopi vala etyi tweya natyo. Oñgeni omukanda ou mautukwatesako?

Omukanda ou una omalongeso 12 apopia oñgeni tuna okukala tyimoneke okuti tuhole ovanthu, atuvelongesa valinge ovalongwa. Momalongeso atyo aeho muna otesitu y’Ombimbiliya ipopia oñgeni Sesusi, novaivisi ovakwavo vali vo potyita tyo tete vakalele pokwivisa. Etyi twesuka natyo, ha kupaka vala momutwe etyi matukapopia, mahi okulinga evi mavilekesa okuti tuhole ovanthu. Namphila atyiho matupopi tyesukisa pokuhimbika etompho nomunthu, no pokukondoka-ko, no pokumulongesa Ombimbiliya, mahi matupopi oityi matyitukwatesako pokuhimbika etompho nomunthu, no pokukondoka-ko, no pokumulongesa Ombimbiliya.

Tyina ulilongesa omalongeso atyo aeho, soka umwe nawa oityi una okulinga ukale ngeetyi tyapopiwa-mo pokupopia novanthu movilinga viokwivisa potyilongo tyenyi. Likwatehila umwe uhumbe vali unene Siovaa, novanthu. Okuhumba Siovaa, novanthu, tyapona pounongo auho upondola okukala nao, matyikukwatesako otyivili okulongesa ovanthu valinge ovalongwa.

Twapandula unene elao tuna-lio liokuundapela kumwe noonwe. (Sof. 3:9) Siovaa emuyambe, twaleiko okuhumba ovanthu, nokuvelongesa valinge ovalongwa!