Siovaa wetuavela otyipuka tyimwe otyiwa unene: otyipuka otyo Ombimbiliya. Ombimbiliya ina omikanda 66. Hamwe uhole okulipula okuti: ‘Ombimbiliya yahonekwa ñgeni? Hekulu yatyo olie?’ Opo unoñgonoke omapulo oo, matutale oñgeni onondaka mba Huku mbakapakwa mo Mbimbiliya, netyi ngwe alinga opo Ombimbiliya ihike pomavoko etu.

1. Ine Ombimbiliya yahonekwa novanthu, opo omokonda yatyi ipopilwa okuti o ya Huku?

Ombimbiliya yahonekwa novalume vena 40 mokueenda kuomanima 1.600. Omukanda wotete wahonekwa mo 1513 P.K.E. Omukanda wahulililako wahonekwa menima 98 P.K. Ovahoneki vayo ankho vakala kovilongo vielikalaila iya novilinga ankho valinga vielikalaila. Mahi otyipuka tyihuvisa, okuti Ombimbiliya aiho ipopia vala otyipuka tyike. Utyii omokonda yatyi? Omokonda Ombimbiliya o ya Huku. (Tanga 1 Ova Tesalonika 2:13.) Ovanthu vokweihoneka, kavahonekele vala etyi muene vasoka. “Vapopia etyi tyatunda ku Huku, kehongolelo liononkhono mbae.” a (2 Petulu 1:21) Huku weveavelele ononkhono mbae, evekuatesako okuhoneka etyi ankho ahanda vahoneke. — 2 Timotiu 3:16.

2. Ovalie Huku ahonekela Ombimbiliya?

Ombimbiliya Huku wahonekela “vana vakala kombanda yohi, vovilongo aviho, nomihoko aviho, nomalaka aeho, novanthu aveho.” (Tanga Eholololo 14:6.) Petupu omukanda unepitiyue momalaka omanyingi ngo Mbimbiliya. Hono, ovanthu vatyo aveho, vapondola okukala no Mbimbiliya, tyehetei kelaka vapopia, no kotyilongo vakala. Otyo tyilekesa umwe nawa okuti Huku uhanda ovanthu vatyo aveho vanoñgonoke etyi tyili mo Mbimbiliya.

3. Oñgeni Siovaa ayakulila Ombimbiliya?

Potete, Ombimbiliya ankho yahonekwa movipuka vimwe viahakolele. Ankho ononthiki onoñgapi vala ovipuka vina vipondola okutunyauka-tunyauka. Opo oñgeni Ombimbiliya yehika pomavoko etu? Ovanthu vamwe ankho vehole Ombimbiliya, valingile ononkhono mbokuikopiyala nawa. Tupu kohale, kwali ovatumini vamwe nomalombe amwe onongeleya, vahandele okunyimako Ombimbiliya opo yahakale-ko vali. Mahi tupu ankho kuna ovanthu vamwe vaholekele nawa Ombimbiliya, naapa vetyii umwe okuti ine vavasiwa nayo mavalekwa. Siovaa kayekele omunthu nawike ahanyeko Ombimbiliya, ankho uhanda ovanthu aveho veinoñgonoke. Ngwe otyo umwe Ombimbiliya yatyo yapopia yati, “ondaka ya Huku maikalako apeho.” — Isaías 40:8.

 KUHANDE OKUNOÑGONOKA VALI?

5. Ombimbiliya yahupa kovanthu ankho vahanda okuihanyuna-ko

 6. Ombimbiliya yalingilwa ovanthu aveho

Ombimbiliya omukanda wapitiyua vali unene. Tupu nkhele vala tya kohale, Ombimbiliya omukanda utangwa vali unene mouye auho. Tanga Ovilinga 10:34, 35, amutomphola omapulo aa:

• Omokonda yatyi Huku ahandela Ombimbiliya ipitiyue momalaka aeho, ayavelwa ovanthu?

• Etyi tuapopia apa tyaenda-enda Ombimbiliya, oityi tyekuhuvisa vali?

 ETYI WELILONGESA

Tete, welilongesa okuti Ombimbiliya Ondaka ya Huku; vali, wamona okuti Huku uhanda ovanthu aveho vakale Nombimbiliya.

Okupitulula

• Onondaka mbokuati Huku wakuatesako ovanthu vokuahoneka Ombimbiliya nononkhono mbae, mbuhanda okutiwi?

• Ovanthu vahandele okuhanya-ko Ombimbiliya, mahi pahe oo omukanda utangwa vali mouye auho, iya kanda munthu wiitanga melaka liae muene. Tyina usoka kotyipuka otyo, tyikukalesa ñgeni?

• Ukala ñgeni tyina usoka okuti ine ha Huku wekuavela Ombimbiliya ñgeno kuanoñgonokele etyi ahanda?