ELONGESO 06
Omwenyo Watuka-pi?
Huku oe “omuhekulu womwenyo.” (Salmo 36:9) Ove otyo utyitavela? Ovanthu ovanyingi vasoka okuti ovipuka mouye vieya vala avike. Ine otyo otyili, muaina kouye tutupu etyi tueya okulingako. Mahi ine Siovaa Huku oe watunga ovipuka aviho, opo naina una etyi evitungila. a Ombimbiliya ipopia nawa-nawa opi omwenyo watuka. Ovola okunoñgonoka ovipuka vilekesa okuti etyi Ombimbiliya ipopia otyili umwe.
1. Ovipuka vili pano pohi no peulu viatundapi?
Ombimbiliya ipopia okuti: “Ponthyimbi Huku watunga eulu nohi.” (Gênesis 1:1) Ovanongo ovanyingi vokuatanga unene vehole okupopia okuti ouye watungwa. Mahi oñgeni Huku atunga ouye? Weutunga “nononkhono mbae.” Ovipuka aviho, tyilinge ononthungululu, tyilinge ovipuka ovikuavo vili keulu, aviho wevitunga nononkhono mbae. — Gênesis 1:2.
2. Oityi Huku atungila ohi?
Siovaa “katungile ohi opo ikale vala ngotyo; weitunga opo mukale ovanthu.” (Isaías 45:18) Huku watunga ohi ikale eumbo liovanthu. Wapaka-mo ovipuka aviho ovanthu vesukisa vakale nehambu. Ankho uhanda ñgeno ovanthu vakala-mo apeho. (Tanga Isaías 40:28; 42:5.) Ovanthu wokuatanga, vamona okuti ohi yelikalela novipuka ovikuavo Huku atunga. Vamona okuti ohi oyo vala ina ovipuka vina omwenyo.
3. Oityi tyipunga omunthu kovinyama?
Huku wati vala tungee ohi, apake-mo omiti novinyama. Pahe “atungu omulume otyifuika tyae.” (Tanga Gênesis 1:27.) Mahi oityi tyipunga omunthu kovinyama? Huku omunthu umwe uli nawa, una okankhenda, wahahande ovivi. No onthwe otyo tukahi ngotyo mokonda Huku wetutunga otyifuika tyae. Otyikuavo tyitupunga kovinyama, omokonda onthwe tutyivila okulilongesa omalaka omanyingi atweevili. Tupu tuhole ovipuka oviwa, noviimbo, iya tupondola okukala omapanga a Huku, Omutungi wetu. Ovipuka ovio, ovinyama kavityivili okuvilinga.
KUHANDE OKUNOÑGONOKA VALI?
Ovipuka monoñgonoka, no ove motyimono umwe okuti etyi Ombimbiliya yati Huku oe watunga ovipuka aviho, otyili umwe. Iya momono okuti ovipuka vimwe ovanthu valinga vina etyi vipondola okukulongesa konthele ya Huku.
4. Huku una etyi atungila ovipuka aviho
Ovanthu tyina vamapangiya ovipuka oviwa vapandulwa, mahi ngwe evi vapangiya vatalela kovipuka vavasa mouye. Iya una wokuatunga ouye watyo, novipuka aviho vili-mo, nae ñgeno kapandulwa-vo? Talei OVIDIU, amutomphola epulo eli:
-
Ovipuka patyi ovanthu vapangiya, mahi vahetekela evi vavasa mouye?
Onondyuo mbutungwa novanthu. Mahi olie watunga ovipuka aviho vili mouye? Tangei Ova Hebeleu 3:4, amutomphola omapulo aa:
-
Okuti nomiti, novinyama, novipuka ovikwavo vali, oityi uhole vali?
-
Utavela okuti ouye, novipuka vili-mo, viatungwa na Huku? Oityi wapopila ngotyo?
Apa pena otyipuka tyimwe hamwe motyipande
Ovikwavo mavikukuatesako okunoñgonoka nawa etyi Huku atunga ovipuka vili mouye, vili mo jw.org pana pati “Kuna Ou Wevitunga?” no pokuati “Etyi ovanthu vapopia konthele yoku kwatuka omuenyo.”
“Kese ondyuo pena omunthu weitunga, mahi watunga ovipuka aviho o Huku”
5. Etyi Ombimbiliya yapopia okuti Huku oe watunga ovipuka aviho, otyili umwe
Ombimbiliya momukanda wa Gênesis okapitulu 1, ipopia umwe nawa okuti Huku, oe watunga ohi, novipuka aviho vili-mo. Okuti otyipuka otyo Ombimbiliya yapopia otyili umwe? Talei OVIDIU, amutomphola omapulo aa:
-
Etyi Ombimbiliya yapopia okuti Huku watunga ouye mononthiki epandu, okuti ononthiki mbuna umwe vala onoola 24?
-
Etyi Ombimbiliya yapopia okuti Huku watunga ovipuka viatyo aviho, utyitavela? Oityi usokela ngotyo?
Tangei Gênesis 1:1, amutomphola epulo eli:
-
Ovanongo vokuatanga unene vehole okupopia okuti ouye una apa watuka. Oñgeni otyipuka otyo vapopia tyelikuata netyi tuatanga mo Mbimbiliya?
Ovanthu vamwe vasoka okuti Huku watunga vala okapuka keke kena omwenyo, ngako katyita ovikwavo. Tangei Gênesis 1:21, 25, 27, amutomphola omapulo aa:
-
Okuti Ombimbiliya ipopia umwe okuti Huku watunga vala okapuka keke kena omwenyo, pahe ngamo mutunda ovanthu, nonombisi, novinyama ovikwavo tumona hono? Ine oe watunga umwe ovipuka aviho vina omwenyo?
6. Ovanthu velikalela novipuka ovikwavo Huku atunga
Onthwe tuelikalela novinyama. Tangei Gênesis 1:26, amutomphola epulo eli:
-
Onthwe tuhole ovanthu iya tutekula nawa vakuetu, mokonda tuatungwa otyifwika tya Huku. Naina Huku yatyo ukahi ñgeni?
OVANTHU VAMWE VATI: “Etyi Ombimbiliya ipopia okuti Huku oe watunga ovipuka aviho, vapopia vala, hatyiliko.”
-
Iya ove oityi usoka? Oityi usokela ngotyo?
ETYI WELILONGESA
Welilongesa okuti Siovaa, oe watunga ovipuka aviho, tyilinge evi vina omwenyo, tyilinge evi viehena omwenyo.
Okupitulula
-
Ombimbiliya ipopia okuti ouye watuka-pi?
-
Okuti Huku watunga vala okapuka keke kena omwenyo, ngako katyita ovikwavo, ine oe watunga umwe ovipuka aviho vina omwenyo?
-
Oityi tyipunga omunthu kovinyama?
KUHANDE OKUOVOLA VALI?
Tala oñgeni ovipuka vimwe viatungwa opo utale umwe okuti tyili kouye kuna Omutungi.
“Ovipuka Tuavasa Kouye Vitulongesa-tyi?” (Pahukei!, Setembro yo 2006)
Tala oñgeni ovohe yovana vapondola okulongesa ovana vavo okuti ovipuka aviho viatungwa na Siovaa.
Vamwe vapopia okuti ovipuka mouye vieyako vala ngotyo. Mahi Ombimbiliya ipopia okuti o Huku wevitunga. Pahe, otyipi tyaviuka?
“Okuti Huku Watunga Vala Otyipuka Tyike Tyina Omwenyo, Ngatyo Tyityita Ovikwavo?” (Mo jw.org)
Ovanongo vokuatanga mokuovolola omo, vavasa-vasa omankhipa ovinyama vialiko kohale. Oityi vamona momankhipa oo?
a Melongeso 25 matunoñgonoka oityi Huku atungila ovanthu.
