ELONGESO 10
Oñgeni Omaliongiyo Onombangi mba Siovaa Maekukuatesako?
Waile-ale keliongiyo lyo Nombangi mba Siovaa? Ine kuneende-ko, hamwe tyina usoka okuenda-ko, ulinga kapii otyiho. Hamwe uhole okulipula okuti: ‘Oityi tyilingwa-mo? Ine ndyenda-ko mandyikaeta-ko?’ Melongeso eli, momono oñgeni okuliongiya na vakwenyi vafenda Huku matyikukuatesako, tyilinge moupanga wove na Huku, tyilinge momwenyo wove.
1. Oityi Onombangi mba Siovaa veliongiyila?
Omuhoneki umwe wo Mbimbiliya, wapopia oityi ovanthu va Huku vesukisila okuliongiya. Wati: “Mandyihilivika Siovaa tyina ndyina vakuetu.” (Salmo 26:12) No Nombangi mba Siovaa otyo vasoka ngotyo. Navo vetyihole unene tyokukala na vakuavo opo vahilivike Siovaa Huku. Onosimanu mbatyo ambuho, mouye auho, tuliongiya tufende Huku, otyo tuimba nokulikuambela. Menima, pena ononthiki mbumwe, tulinga omaliongiyo omanene vali.
2. Oityi molilongesa komaliongiyo?
Atyiho tyilongeswa momaliongiyo etu, tyipolwa Mondaka ya Huku. Momaliongiyo, Ombimbiliya ‘ihangununwa nawa opo inoñgonokwe nawa.’ (Tanga Neemias 8:8.) Ine wenda komaliongiyo, monoñgonoka vali nawa Siovaa. Monoñgoka etyi ekahi netyi ehole. Monoñgonoka okuti Huku ukuhole unene. Otyipuka otyo tyina wametyinoñgonoka umwe nawa, mohande okukala epanga liae. Tupu molilongesa okuti Siovaa upondola okukukuatesako opo ukale nawa. — Isaías 48:17, 18.
3. Oñgeni ovanthu movasi momaliongiyo vapondola okukukuatesako?
Siovaa wapopia okuti tuna ‘okusoka ku vakuetu opo tuliavele ondundo yokukala [noluembia] nokulinga ovilinga oviwa, nokuhayeke-po okuliongiya [na vakuetu].’ (Ova Hebeleu 10:24, 25) Momaliongiyo movasi-mo ovanthu vekahi nawa, ovanthu vehole vakwavo. Ovanthu ovo, navo veli nokulinga ononkhono mbokunoñgonoka nawa Huku ngo ove. Tyilinge tyina muli meliongiyo, tyilinge pokutomphaula opo, movemono tyina vapopia ovipuka vehole okulilongesa mo Mbimbiliya. (Tanga Ova Loma 1:11, 12.) Monoñgonoka-mo ovanthu vokwelinepa no vokuahanepele. Aveho vena ehambu namphila vena ovitateka. Otyo, otyo Siovaa ahandela tuliongiye na vakuetu vemufenda!
KUHANDE OKUNOÑGONOKA VALI?
Monoñgonoka etyi Onombangi mba Siovaa valinga tyina veliongiya. Tupu momono oñgeni omaliongiyo apondola okukukuatesako.
4. Omaliongiyo Onombangi mba Siovaa
Kohale-hale, Ovakilisitau ankho veliongiya-le opo vafende Siovaa. (Ova Loma 16:3-5) Tangei Ova Kolosu 3:16, amutomphola epulo eli:
-
Oñgeni Ovakilisitau vo kohale ankho vafenda Siovaa?
Hono, Onombangi mba Siovaa veliongiyila monondyuo mbumwe mbutiwa Onondyuo Mbomaliongiyo. Opo utale etyi valinga momaliongiyo, talei OVIDIU. Pahe konyima amutale ofoto otyo mutomphola omapulo aa:
-
Ovipuka patyi wamona mo vidiu, vielikuata netyi tyipopia omukanda Ova Kolosu 3:16?
-
Oityi wahumba vali mo vidiu no mofoto?
Tangei 2 Ova Kolindu 9:7, amutomphola epulo eli:
-
Oityi Onombangi mba Siovaa vahaitila onombongo momaliongiyo avo?
Mulongesi, lekesa omulongwa wove ovipuka vimwe mavipopiwa meliongiyo malilandulako, pahe omupulu okuti:
-
Oityi wahumba-po vali? Oityi wamona usoka okuti matyikukuatesako?
Apa pena otyipuka tyimwe hamwe motyipande
Mo jw.org, movasi-mo apa omaliongiyo etu alingilwa mouye auho, noola yatyo tulinga.
-
Momaliongiyo etu, mulingwa etyi tyitiwa omalongomona, netyi tyitiwa omalekeso, tupu tutala ono vidiu. Pokuhimbika tuimba otyiimbo atulikuambela, pokumanuhula napo tuimba ñgo otyiimbo atulikuambela
-
Pamwe ovanthu vayelula omankhanya opo vapopie etyi navo velilongesa
-
Tyilinge ovakulu, tyilinge ovana, tyilinge ava vanepa, tyilinge ava vahanepele, aveho vapondola okuenda komaliongiyo
-
Momaliongiyo etu munyingilwa otyali. Mahi tupu tyina uli mokati kuesukisile okulinga otyiho tyokuti moitwa onombongo. Onombangi mba Siovaa kavaiti onombongo kovanthu
5. Opo tuende komaliongiyo, tyihanda okulikuatehila
Nkhele soka ku Sesusi noko tate yae. Ankho vena eliongiyo limwe lilingwa like menima, mahi ankho lilingilwa ko Selusalei. Pahe ankho okutunda oku ankho vakala ko Nasalee okuenda ko Selusalei, ankho paendwa ehimbwe (100 km) ngwe ankho vakwata monomphunda. Tangei Luka 2:39-42, amutomphola omapulo aa:
-
Okuti ankho tyapepuka okulinga oungendi oo?
-
Omokonda yatyi no ove wesukisila okulikuatehila opo wende komaliongiyo?
-
Okuti ononkhono molingi, ononkhono-puila vala? Oityi wapopila ngotyo?
Ombimbiliya ipopia okuti tuesukisa umwe okuliongiya opo tufende Huku. Tangei Ova Hebeleu 10:24, 25, amutomphola epulo eli:
-
Oityi tuna okuila apeho komaliongiyo?
OVANTHU VAMWE VATI: “Komaliongiyo oko utupu-ale etyi upolako! Una Ombimbiliya yove peumbo, kuitange vala?”
-
Otesitu patyi yo Mbimbiliya ipopia okuti Huku uhanda tuliongiye na vakuetu?
ETYI WELILONGESA
Okuenda komaliongiyo matyikukuatesako: (1) Okunoñgonoka nawa Siovaa Huku. (2) Okukala vali epanga liae. (3) Okumufendela kumwe na vakwenyi.
Okupitulula
-
Oityi Siovaa ahandela tuliongiye na vakuetu?
-
Oityi monoñgonoka ine wenda komaliongiyo Onombangi mba Siovaa?
-
Tyina utala, oñgeni omaliongiyo Onombangi mba Siovaa apondola okukukuatesako?
KUHANDE OKUOVOLA VALI?
Hamwe tyina usoka okuenda keliongiyo uponwa mokonda walinga kapii otyiho. Omukulu ou nae otyo ankho akala ngotyo, mahi pahe uhole omaliongiyo. Oityi tyemukuatesako?
Omukuendye ou ankho uhole unene omaliongiyo. Tala ononkhono ankho alinga opo ahalañge ko maliongiyo vapopia.
Tala etyi vamwe vehole okuenda komaliongiyo vapopia.
Omukulu ou ankho otyifuanga, mahi etyi apita keliongiyo ayekepo okukala otyifuanga.
“Nalumwe Naendele Tyihena Outa Wange” (Omutala Womulavi, 1 ya Julho yo 2014)
