ELONGESO 11

Oityi Una Okulinga Opo Tyina Utanga Ombimbiliya Oinoñgonoka Umwe Nawa?

OKUHIKISA

Okuti nthiki imwe wakalele-ale notyilinga tyimwe otyinene, etyi wetyitala ñgaa, ngoti kumetyivili-ale? Mokutala hamwe otyipuka tyo tete walingile, okutyiyapaula oti olingi-ko etyi, olingi-ko otyikuavo. Nombimbiliya, omukanda umwe omunene. Hamwe tyina wiitala ñgaa, uhole okulipopila okuti: ‘Ñgaa omukanda ou, ine tyitiwa utanga, ndyihimbikila-pi?’ Melongeso eli, monoñgonoka ovipuka vimwe upondola okulinga opo tyokutanga Ombimbiliya tyehekuponeswe.

1. Oityi tyihandela okutanga Ombimbiliya apeho?

Omunthu wokutanga apeho “ovitumino vya Siovaa,” ovipuka alinga vieenda nawa, nehambu una ehambu. (Tanga Salmo 1:1-3.) Mokonda Ombimbiliya omukanda omunene, tyina uti pokuhimbika okuitanga, upondola okutanga vala onovelesikulu mbehehi ononthiki mbatyo ambuho. Okulinga ngotyo, katutu-katutu mohimbika okunoñgonoka nawa Ombimbiliya. Ngwe tyina etyi utanga wametyinoñgonoka umwe nawa, pahe opo no pokuiitanga kumaponwa-le vali.

2. Oityi wesukisa okulinga opo unoñgonoke nawa Ombimbiliya?

Opo tunoñgonoke Ombimbiliya tyina tuitanga, tuesukisa okuti oku otyo tutanga oku otyo ‘tusoka.’ Mahi okusoka kutyi? Okusoka ku etyi welilongesila-ko. (Josué 1:8) Tyina utanga upondola otyo ulipula ñgaa: ‘Etyi natanga, namona okuti Siovaa omunthu ukahi ñgeni? Oñgeni mandyilingi etyi natanga? Oñgeni ndyipondola okukuatesako vakuetu nonondaka ombu natanga?’

3. Pahe oola patyi motange Ombimbiliya?

Okuti pamwe tyina ulitala ñgaa, ngoti utupu-ale omuvo wokutanga Ombimbiliya? Ine ongotyo, have-ko vala. Ombimbiliya ipopia okuti tuna ‘okukwata nawa omuvo wetu.’ (Ova Efesu 5:16) Upondola okulinga ñgaa: Holovona oola upondola okutanga-tanga Ombimbiliya ononthiki ambuho. Ovanthu vamwe velimeneka nokutanga Ombimbiliya. Ovakuavo vatanga Ombimbiliya komeliya. Nkhele vamwe, vatanga Ombimbiliya tyina nkhele vehenekalangale-po. Pahe ove, oola patyi maikupepukila vali?

KUHANDE OKUNOÑGONOKA VALI?

Noñgonoka ovipuka vimwe upondola okulinga opo tyokutanga Ombimbiliya tyikuhambukiswe. Tupu tala oñgeni upondola okulilongesa nawa etyi ha mamuya okulilongesa nomulongesi wove.

Tyokuhambukilwa okutanga Ombimbiliya tyililongwa umwe, ngetyi omunthu elilongesa okulia ovikulia vielikalaila atee etyiliya

4. Etyi una okulinga opo tyokutanga Ombimbiliya tyikuhambukiswe

Okusoka umwe okuti pahe mandyihimbika okutanga Ombimbiliya, tyili katyapepukile! Mahi katutu-katutu tupondola okulilongesa okuhambukilwa okuitanga, ngetyi omunthu elilongesa okulia ovikulia ehenelie nkhele ali. Tangei 1 Petulu 2:2, amutomphola omapulo aa:

Ovanthu vamwe pahe vetyiliya okutanga Ombimbiliya, vehole okupopia okuti tyina wiitanga ononthiki ambuho, ha pahe katyiponeswa vali, pahe no ove tyikuhambukiswa. Ove oityi usoka? Oityi usokela ngotyo?

Talei OVIDIU opo mutale etyi ovakuendye vevali novahikuena vevali valinga, tyevekuatesako avahambukilwa okutanga Ombimbiliya. Konyima amutomphola omapulo aa:

OVIDIU: Ovakuendye Novahikuena Velilongesa Okuhumba Ondaka ya Huku (5:33)

Ngetyi tuamona movidiu, oityi ankho tyivetyilika okutanga Ombimbiliya ononthiki ambuho?
Oityi tyevekuatesako avahimbika okutanga Ombimbiliya ononthiki ambuho?
Oityi vehole okulinga opo tyokutanga Ombimbiliya tyivehambukiswe?

Ovipuka vimwe upondola okulinga pokuhimbika:

Tanga Ombimbiliya imwe iivala nawa, yehena onondaka mbupuiya okumbunoñgonoka. Ine Ombimbiliya Tradução do Novo Mundo muna-yo melaka lienyi, hetekela okuitanga.
Himbika okutanga omikanda weete okuti movipande. Tyimwe matyikukuatesako tyili apa pokuati: “Kuhande Okuhimbika Okutanga Ombimbiliya?”
Honeka etyi watanga-le. Tyimwe matyikukuatesako okuhinangela apa watanga-le na apa ha mohimbikila, tyili apa pokuati: “Nthinda Ovikapitulu Watanga-le.”
Tangela mo JW Library^®. Ine o JW Library^® wiipaka motelefone yove hamwe o mo kombutandole yove, movasi-mo Ombimbiliya. Tupu muna Ombimbiliya yangalavalwa, upondola vala okuhikisa otyo witehelela.
Tyina utanga tupu otyo utala novipuka ovikwavo vili mo Mbimbiliya Tradução do Novo Mundo. Muna onomapa, na tyimwe tyitiwa Onondaka Mbombimbiliya Mbahangununwa, novikwavo vali. Okutangela kumwe novipuka ovio tyihiwa.

5. Lilongesa etyi ha mamuya okulilongesa

Tangei Salmo 119:34, amutomphola epulo eli:

Oityi wesukisila okulikuambela tyina wehenehimbike okutanga Ombimbiliya, na tyina uhanda okulilongesa etyi ha matuya okulilongesa?

Tyina muli nokulilongesa nomulongesi wove, opo utyiive umwe nawa, oityi una okulinga? Hetekela okulinga ovipuka evi tyina ulilongesa etyi ha mamuya okulilongesa nomulongesi wove:

Tanga onondaka mbuna mbatetekela tyina nkhele wehenehike pana pokuati: ‘Kuhande Okunoñgonoka Vali?’
Tyina wamavasi otesitu, itanga. Pahe osoko oñgeni onondaka mbo tesitu mbelikuata netyi uli nokulilongesa.
Onondaka watala ñgaa ombo mbukumbulula epulo mbunthinda. Otyo matyikukuatesako okumbulula liwa tyina pahe mulilongesa nomulongesi wove.

Okuti ankho utyii-ale?

Onthwe Nombangi mba Siovaa tutanga ono Mbimbiliya ononyingi. Mahi Ombimbiliya tuhole vali, o Tradução do Novo Mundo da Bíblia Sagrada. Tuihole tupu, omokonda yovipuka vitatu. Tyo tete: vokueipitiya kavapolele-po onondaka, avahoneka vala etyi muene ankho vahanda. Tya vali: Muna onondaka mbapepuka okumbunoñgonoka. Tya tatu: Muna enyina lya Huku. — Tanga mo jw.org onondaka ombu mbokuati: “Okuti Onombangi mba Siovaa Vena Ombimbiliya Yavo Yehelifwile Nononkhuavo?”

OVANTHU VAMWE VATI: “Okulilongesa Ombimbiliya tyipuilisa unene. Ñgaa ame mandyimono umwe o tembu andyipumphama tyatiwa ndyililongesa-yo?”

Iya ove oityi usoka?

ETYI WELILONGESA

Welilongesa okuti opo unoñgonoke Ombimbiliya, wesukisa okutaindya omuvo wokuitanga, nokulikuambela ku Huku ekukuateseko okunoñgonoka etyi motange. Tupu wamona okuti apeho otyiwa ulilongese etyi ha mamuya okulilongesa nomulongesi wove.

Okupitulula

Ovipuka patyi una okulinga unoñgonoke Ombimbiliya tyina wiitanga?
Oola patyi ove wasoka, oti umwe ei pahe maikala oola yange yokutanga-tanga Ombimbiliya?
Oityi wesukisila okulilongesa tete etyi ha mamuya okulilongesa nomulongesi wove?

Namana okulilongesa elongeso eli monthiki:

Hetekela okulinga ñgaa:

Lilongesa etyi ha mamuya okulilongesa onthiki onkhuavo nomulongesi wove, mahi tyina ulilongesa, olingi ovipuka vimwe viapopiwa melongeso eli.

Ovikwavo:

Ovikwavo molingi