ELONGESO 14
Huku Uhanda Tumufende Ñgeni?
Melongeso liokualamba, tuamona okuti ha ambuho onongeleya mbuhambukiswa Huku. Mahi tyitavela okufenda Omutungi wetu ngetyi muene-muene ngwe ahanda okufendwa. Mahi “ongeleya” patyi iti umwe, na tyina Huku eitala uhambukwa? (Tiaku 1:27) Tala etyi Ombimbiliya ipopia.
1. Opi Huku apopia umwe nawa-nawa etyi ahanda okufendwa?
Mo Mbimbiliya Huku wapopia-mo oñgeni ena okufendwa. Opo tumufende umwe ngetyi ahanda, atumuhambukiswa, tuna okulinga etyi ngwe apopia mo Mbimbiliya. Sesusi nthiki imwe wapopilile Huku ati: “Ondaka yove otyili.” (Suau 17:17) Onongeleya mbumwe, Ombimbiliya veipakela ponthele, pahe valinga vala etyi vahanda. Vamwe atee umwe valinga vala oviso vahinda. Mahi etyi ovanthu ovo valinga Siovaa ketyihande, mokonda ngotyo vekahi nokulinga etyi Ombimbiliya yati “okupaka ponthele otyitumino tya Huku.” (Tanga Maluku 7:9.) Mahi pahe mokusoka kwove, ine pokufenda Huku tulinga vala etyi tyapopiwa mo Mbimbiliya, Huku ukala ñgeni? Ngondela momutima wakumbulula okuti uhambukwa, ngwe otyo umwe!
2. Huku uhanda afendwe ñgeni?
Tuna vala okufenda Siovaa mokonda oe wetutunga. (Eholololo 4:11) Mahi tyili-tyili okufenda vala Siovaa Huku oityi? Onondaka ombo mbuhanda okupopia okuti oe vala tuna okuhumba vali unene. Katupondola okufenda vali otyipuka otyikuavo, tyilinge otyilolo, tyilinge ofoto. — Tanga Isaías 42:8.
Ombimbiliya ipopia okuti tuna okukala ovanthu ‘vasukuka’ komaiho a Siovaa. (Ova Loma 12:1) Mahi opo tusukuke, tuna okulinga etyi Huku ahanda. Omunthu wokuhole Siovaa Huku, ulinga etyi Ombimbiliya ipopia tyayemba kotyinepo. Tupu kalingi ovipuka vinyona olutu lwae muene, ngetyi: okupwena, nokusipa, nokunwa unene. a
3. Oityi tuesukisila okufenda Siovaa kumwe na vakuetu?
Onthwe tuenda komaliongiyo onosimanu ambuho opo ‘tuhilivike Siovaa kumwe na vakuetu.’ (Salmo 111:1, 2) Onthwe tuhilivika Siovaa tyina tuimba momaliongiyo. (Tanga Salmo 104:33.) Siovaa ututuma atuho tuliongiye na vakuetu mokonda utuhole. Utyii okuti ine tuenda komaliongiyo, matukakala-ko apeho. Naina okuenda komaliongiyo, opala ouwa wetu muene.
KUHANDE OKUNOÑGONOKA VALI?
Monoñgonoka omokonda yatyi Siovaa ailikila okufenda ovilolo. Tupu momono ovipuka upondola okulinga opo upandule Huku.
4. Katupondola okufenda kotyilolo atusoko okuti tuli nokufenda Huku
Oñgeni tutyii okuti tyokufenda ovilolo Huku ketyihande? Talei OVIDIU, amutomphola epulo eli:
-
Oñgeni Huku akalele etyi ova Isilayeli vamwe vafendele kotyilolo?
Ovanthu vamwe tyina vahanda okufenda Huku velikuambela kovilolo, no konofoto. Mahi okuti otyipuka otyo valinga tyivefweneka ku Huku ine tyivehondovola kwe? Tangei Êxodo 20:4-6 na Salmo 106:35, 36, amutomphola omapulo aa:
-
Ovipuka patyi ovanthu vehole okukuata tyina vati pokufenda Huku?
-
Tyina Siovaa atala otyipuka otyo, ukala ñgeni?
-
Ove tyokufenda kovilolo, no konofoto, no kovipuka ovikwavo vali, utyitala-vo ñgeni?
5. Ine tufenda vala Siovaa, matuyovoka komatutu
Tala oñgeni okufenda Siovaa ngetyi muene ahanda tyituyovola komatutu, no koviso viehelikuatele Nondaka ya Huku. Talei OVIDIU.
Tangei Salmo 91:14, amutomphola epulo eli:
-
Ine tufenda vala Siovaa, oityi metulingila?
6. Onthwe tuliongiya tufende Huku
Tyina tuenda komaliongiyo, atukumbulula, atuimbi, ngotyo tuli nokuhilivika Siovaa, tupu tukahi nokukuatesako vakuetu. Tangei Salmo 22:22, amutomphola omapulo aa:
-
Tyina vakwenyi vakumbulula momaliongiyo, utyihole?
-
Kuhande ñgeno no ove ukumbulula-vo meliongiyo? Tete una okulinga-tyi, opo utyivile okukumbulula umwe nawa?
7. Siovaa uhambukwa unene tyina tupopila vakuetu etyi tukahi nokulilongesa
Kuna ovipuka ovinyingi tupondola okulinga tupopile vakuetu etyi tuli nokulilongesa mo Mbimbiliya. Tangei Salmo 9:1; 34:1, amutomphola epulo eli:
-
Otyipuka patyi welilongesa mo Mbimbiliya wahumba unene, wahanda okukapopila vakwenyi?
OVANTHU VAMWE VATI: “Okuhambukiswa Huku katyivilwa-le!”
-
Ove oityi usoka?
ETYI WELILONGESA
Onthwe tuhambukiswa Omutungi wetu, tyina: (1) Oe vala tufenda; (2) tukumbulula momaliongiyo; (3) tupopila vakuetu etyi tukahi nokulilongesa mo Mbimbiliya.
Okupitulula
-
Opi Huku apopia umwe nawa-nawa etyi ahanda okufendwa?
-
Omokonda yatyi tuesukisila okufenda vala Siovaa?
-
Oityi tuesukisila okufenda Siovaa Huku na vakuetu?
KUHANDE OKUOVOLA VALI?
Omukai ou, ankho ufenda kovilolo. Tanga onthele yati “Pahe Hifende Vali Kovilolo,” unoñgonoke oityi eviyekela-po.
“Ombimbiliya Ipilulula Omuenyo Wovanthu” (Omutala Womulavi 1 ya Julho yo 2011)
Noñgonoka etyi una okulinga opo tyina uti pokukumbulula momaliongiyo, opopi umwe otyipuka tyiivala.
“Hilivika Siovaa Mewaneno” (Omutala Womulavi wa Janeiro yo 2019)
Omukuendye ou, okukala pokati kovanthu kakala nawa, mahi no ngotyo ulikuatehila aende komaliongiyo. Tala ouwa apola-ko.
Ovanthu vamwe vasoka okuti ekulusu otyipuka tyimwe tyiimbukisa Ovakilisitau. Mahi okuti tyaviuka umwe tyina tufenda Huku, atukwate ekulusu?
“Oityi Onombangi mba Siovaa Vahakuatela Ekulusu Tyina Vati Pokufenda Huku?” (Mo jw.org)
a Ovipuka ovio molilongesa-vyo vali nawa komutwe.
