ELONGESO 17
Sesusi Omunthu Patyi?
Tyina tulilongesa nawa ovipuka Sesusi alingile etyi ali pano pohi, tumona umwe okuti ankho omunthu umwe ukahi nawa. Ine tunoñgonoka nawa Sesusi, matuhande okukala omapanga ae, matuhande okukala omapanga a Tate yae Siovaa. Ovipuka patyi Sesusi ankho alinga tutila umwe okuti omunthu umwe omuwa? Oñgeni no onthwe tupondola okulinga ovipuka Sesusi alingile?
1. O movipuka patyi Sesusi velifwa na Tate yae?
Etyi Sesusi eheneye pano pohi, wakalele omanima omanyingi-nyingi na Tate yae keulu. Wamuene umwe nawa oñgeni Siovaa ekahi, oñgeni alinga ovipuka. Pahe novipuka aviho alinga, uhetekela vala He. (Tanga Suau 5:19.) Mokonda ngwe uhetekela nawa-nawa Tate yae, nthiki imwe wapopile okuti: “Una weete ame, tupu weete Tate.” (Suau 14:9) Otyo tyilekesa okuti ine unoñgonoka nawa Sesusi, opo tupu uli nokunoñgonoka nawa Siovaa. Opo utyinoñgonoke nawa, nkhele tala vala: Ombimbiliya ipopia okuti Sesusi uhole unene ovanthu. Otyo tyilekesa-tyi? Tyilekesa okuti Siovaa no ove ukuhole unene.
2. Ovipuka patyi Sesusi alingile vialekesile umwe okuti uhole Siovaa?
Kumbi limwe, Sesusi wapopile okuti: “Opo ouye utyinoñgonoke okuti ame ndyihole Tate, ame ndyilinga ngetyi Tate anthuma.” (Suau 14:31) Etyi Sesusi ali pano pohi, ankho ulinga vala atyiho Tate yae emutuma, naapa umwe tyahapepukile. Ankho upopila ovanthu oñgeni Tate yae ekahi opo vakale omapanga a Tate yae. Ovio o vimwe vala povipuka alingile vimoneka umwe okuti uhole Tate yae. — Suau 14:23.
3. Ovipuka patyi Sesusi alingile vialekesile umwe okuti uhole ovanthu?
Ombimbiliya ipopia okuti Sesusi ‘uhole unene ovanthu.’ (Provérbios 8:31) Mahi okutyi tutalela okuti tyili ankho uhole umwe ovanthu? Ankho ukuatesako vakuavo. Wahakulile ovavei, atutulisa ovanthu vokuankhia, alingi vali ovipuka ovikwavo vihuvisa. Ovipuka ovio kevilingile vala mokonda ankho uvivila okuvilinga, mahi omokonda uhole ovanthu. (Maluku 1:40-42) Ankho utekula nawa ovanthu, utupu okapungulula. Onondaka apopile, ankho mbukuatesako ovanthu vena ovitateka, vasoya. Sesusi wamonesilwe ononkhumbi, aipawa, ha tyimwe-ale vali, o tyokuhole umwe vala ovanthu. Mahi uhole vali ovanthu vana valinga etyi alongesile. — Tanga Suau 15:13, 14.
KUHANDE OKUNOÑGONOKA VALI?
Monoñgonoka oñgeni Sesusi ekahi. Motale oñgeni no ove upondola okuhetekela okankhenda kae, notyali tyae.
4. Sesusi uhole Tate yae
Sesusi wetulongesa etyi tuna okulinga opo no onthwe Huku etumone-vo okuti tumuhole. Tangei Luka 6:12 na Suau 15:10; 17:26. Lingei ñgaa: tyina muamatange otesitu ike, amutomphola epulo eli:
-
Oñgeni no onthwe tupondola okulinga nga Sesusi opo Siovaa etumone okuti tumuhole?
Sesusi ankho uhole unene Tate yae; apeho ankho ulikuambela apopie nae
5. Sesusi ankho uhole ovanthu
Sesusi wali omunthu umwe usuka vali na vakuavo tyipona ae muene. Naapa umwe aponwa, ankho ukuatesako vakuavo. Tangei Maluku 6:30-44, amutomphola omapulo aa:
-
Ngetyi tuatanga, oityi Sesusi alingile tyamonekele umwe okuti ankho uhole ovanthu? — Tala povelesikulu 31, 34, 41 no 42.
-
Oityi evekuatesila-ko? — Tala povelesikulu 34.
-
Ine Sesusi ankho ulinga vala ovipuka nga Tate yae, opo naina Siovaa ukahi ñgeni?
-
Omunthu wokuhole vakuavo, oityi alinga?
6. Sesusi una otyali
Sesusi ankho utupu-tyo, mahi no ngotyo ankho una otyali. Atee walongesile okuti no onthwe tuesukisa okukala ovanthu vokuna otyali. Tangei Ovilinga 20:35, amutomphola epulo eli:
-
Sesusi wapopia okuti ehambu lituka kutyi?
Talei OVIDIU, amutomphola epulo eli:
-
Ovipuka patyi tupondola okuavela vakuetu naapa umwe tuahepa?
Okuti ankho utyii-ale?
Ombimbiliya ipopia okuti tuna okulikuambela ku Siovaa, mahi menyina lya Sesusi. (Tanga Suau 16:23, 24.) Tyina tulikuambela ngotyo, ngotyo tuli nokupopia okuti tuapandula atyiho Sesusi etulingila opo tutyivile okukala omapanga a Siovaa.
OVANTHU VAMWE VATI: “Huku kesukile-ale nononkhumbi mbetu, umbumona vala otyo etutala.”
-
Atyiho Sesusi alingile, wahetekelele vala Tate yae. Pahe, oñgeni ovipuka alingile vilekesa umwe okuti ovitateka vietu Siovaa vimuihama komutima?
ETYI WELILONGESA
Wamona okuti Sesusi uhole Siovaa, novanthu. Tupu wanoñgonoka okuti Sesusi uhetekela vala Tate yae. Naina, ine unoñgonoka nawa Sesusi, tupu monoñgonoka nawa Siovaa.
Okupitulula
-
Oityi tuna okulinga Huku etyimone okuti tumuhole unene, ngomona wae Sesusi?
-
Oityi tuna okulingila vakuetu vetyimone okuti tuvehole?
-
Oityi uhole vali ku Sesusi?
KUHANDE OKUOVOLA VALI?
Tala ovipuka vimwe Sesusi alingile no onthwe tupondola okuhetekela.
“Opo Uhetekele Sesusi Kala Novituwa Evi” (Sesusi — Ondyila, Otyili, Omuenyo, pefo 317)
Opo omalikuambelo etu ehike ku Huku, otyipi otyilinga tya Sesusi?
“Oityi Tuna Okulikuambelela Menyina Lya Sesusi?” (onthele Yomutala Womulavi)
Okuti Ombimbiliya ipopia oñgeni olupe lwa Sesusi ankho lukahi?
Sesusi ankho utekula nawa ovakai. Oityi tutalela kwe?
“Vahumbwa Nokutekulwa Nawa na Huku” (Omutala Womulavi 1 ya Outubro yo 2012)
