Siovaa Huku uhanda ovipuka vialulikwa nawa. (1 Ova Kolindu 14:33) Otyo novanthu vae evelulikila nawa. Mahi muene-muene uvelulika ñgeni? Oityi onthwe pahe tuna okulinga opo etyi Huku aonganeka nawa tyiviuke?

1. Olie uli nokuhongolela ovanthu va Huku?

Ombimbiliya yati: “Kilisitu omutwe wewaneno.” (Ova Efesu 5:23) Namphila Sesusi eli keulu, mahi no ngotyo oe uli nokuhongolela ovanthu va Huku pano pohi. Mahi tupu na pano pohi Sesusi waavela otyilinga tyimwe ovakulu vamwe vatiwa “omupika omukuatyili nokualunguka.” Ovakulu ovo tupu vatiwa Ononkhalamutwe mbo Nombangi mba Siovaa. (Tanga Mateusi 24:45-47.) Mahi tyili-tyili otyipi otyilinga tyovakulu ovo? Okululika nawa ovanthu va Huku mouye auho, ngetyi ankho tyilinga ovalongwa va Sesusi, novakulu ovakwavo ankho vakala mo Selusalei. (Ovilinga 15:2) Mahi ovanthu ovo, hakuti ovo vetutumina. Apeho tyina pena etyi vahanda okulinga, vaovola mo Mbimbiliya opo vatale etyi ovo Siovaa na Sesusi vasoka.

2. Otyipi otyilinga tyovakulu vewaneno?

Ovakulu vewaneno ovanthu vamwe vehole unene Siovaa. Otyilinga tyavo o tyokulongesa vakuavo mewaneno nokuvekuatesako. Otyilinga otyo vetyilinga otyali, kavafetwa nomunthu nawike. Vetyilinga ‘tyeliava komaiho a Huku, kavetyilingi nelungavi liokumonena-mo, mahi muene tyitunda komitima viavo.’ (1 Petulu 5:1, 2) Tupu nkhele mewaneno muna ovanthu vamwe vatiwa ovakuatesiko vovakulu vewaneno. Otyilinga tyavo okuundapela kumwe novakulu vewaneno otyo vevekuatesako. Pahe tyina pamakala, ovanthu ovo, navo vapondola avakala ovakulu vewaneno.

Ononkhalamutwe mbo Nombangi vakoya ovanthu vamwe, ava tuti ovatalelipo womawaneno. Otyilinga tyovakulu ovo okupila momawaneno opo vapameke ovanthu velimo. Ovatalelipo vomawaneno tyina vemehiki mewaneno limwe, ovo vakoya ava mavakala ovakulu vewaneno, nava mavakala ovakuatesiko vovakulu vewaneno. Mahi opo vevepe ovilinga ovio, tete vatala ine etyi ovanthu ovo valinga tyelikuata umwe netyi tyili mo Mbimbiliya. — 1 Timotiu 3:1-10, 12; Titu 1:5-9.

3. Otyipi otyilinga tyomunthu Ombangi ya Siovaa?

Aveho Onombangi vena otyilinga “tyokuhilivika enyina lya Siovaa.” Vahilivika Siovaa tyina venda komaliongiyo na tyina valongesa vakuavo Ombimbiliya. — Tanga Salmo 148:12, 13.

 KUHANDE OKUNOÑGONOKA VALI?

4. Sesusi ohongoi ikahi nawa

Sesusi wapopia onondaka mbumwe mbukalesa nawa mbuli mu Mateusi 11:28-30. Tangei otesitu oyo, amutomphola epulo eli:

• Sesusi ohongoi ikahi ñgeni? Uhanda umutale ñgeni?

5. Ovakulu vewaneno ovipuka valinga vilongesa

1. Ovakulu vewaneno vesuka unene noupanga wavo na Huku, tupu vakuatesako vo meumbo liavo navo vahumbe Huku

2. Ovakulu vewaneno vesuka na vakuavo mewaneno

3.   Ovakulu vewaneno navo venda momaumbo ovanthu vekevelongese Ombimbiliya

4. Ovakulu vewaneno valongesa momaliongiyo, mahi tupu valinga ovilinga ovikwavo, ngetyi okukomba mondyuo yomaliongiyo

6. Tuna ovipuka vimwe tupondola okulinga tukuateseko ovakulu vewaneno

Ombimbiliya ipopia okuti tuna okukuatesako ovakulu vewaneno. Mahi oityi tuesukisila okutyilinga? Tangei Ova Hebeleu 13:17, amutomphola omapulo aa:

• Oityi Ombimbiliya yapopila okuti otyiwa okutavela ku vana vokwetukalela komutwe? Ove otyipuka otyo tyokutavela ku ava vetukalela komutwe, utyitala-vo ñgeni?

Tangei Luka 16:10, amutomphola epulo eli:

• Oityi tuesukisila okutavela kovakulu vewaneno, no moupuka oututu vala tusoka okuti ngoti kausilivila-le?

 ETYI WELILONGESA

Welilongesa okuti Sesusi oe wakalela komutwe ovanthu va Huku. Tupu wamona okuti tuesukisa okutavela kovakulu vewaneno tyetyi vena otyilinga otyinene tyokutupameka, nokutulongesa.

Okupitulula

• Olie wakalela komutwe ovanthu va Huku?

• Oityi ovakulu vewaneno valinga vakuateseko vakuavo mewaneno?

• Otyipi otyilinga tyomunthu Ombangi ya Siovaa?