ELONGESO 22
Popila Vakwenyi Etyi Uli Nokulilongesa
Pahe wanoñgonoka-le ovipuka oviwa vili mo Mbimbiliya. Hamwe nthiki imwe welipopilile-ale oti: “Ñgeno ovipuka evi vakuetu navo vevinoñgonoka.” Etyi wasoka otyili umwe, aveho ñgeno vevinoñgonoka! Mahi hamwe tyina usoka okupopila vakwenyi etyi uli nokulilongesa, ulinga kapii ohonyi. Pahe matutale etyi upondola okulinga wahatile owoma tyina uhanda okupopila vakwenyi etyi uli nokulilongesa.
1. Oityi matyikukuatesako utyivile okupopila ava wii etyi uli nokulilongesa?
Nthiki imwe, ovalongwa va Sesusi vapopile okuti: ‘Onthwe katupondola okutalama okupopia ovipuka tuamona nevi tueiva.’ (Ovilinga 4:20) Ovanthu ovo, vahumbile unene etyi Sesusi evelongesile, pahe avahande-vo navo okutyipopila vakuavo. Ine no ove etyi uli nokulilongesa wetyihumba, tyipopila-vo vakwenyi, venyi, vomeumbo lienyi, nomapanga ove. Mahi tyina uti pokuvepopila-tyo, popia umwe nawa. — Tanga Ova Kolosu 4:6.
Linga ñgaa
-
Tyina uhanda okupopila omunthu umwe mombunga yove etyi Ombimbiliya ilongesa, upondola okuhimbika ñgaa: “Osimanu ei, pena otyipuka tyimwe otyiwa nelilongesa.”
-
Ine una epanga liove uvela, hamwe una otyitateka otyikuavo, mutangela onondaka mbumwe mo Mbimbiliya umuungumanese omutima.
-
Tyina muamelivasi nomunthu umwe muundapa nae, nga muelikukunya mupopila otyipuka tyimwe wanoñgonoka pokulilongesa, no komaliongiyo. Tupu upondola okutyilinga ine mwahonyena nomunthu mondyila.
-
Lekesa omapanga ove o jw.org
-
Tyina muli nokulilongesa popila vakwenyi navo veye okutehelela. Okuti hatyo, velekesa mo jw.org. etyi vena yokulinga vaite valongeswe Ombimbiliya.
2. Oityi tyahandela umwe okukalongesa na vakwenyi vo mewaneno?
Ovalongwa va Sesusi ankho kavalongesa vala Ondaka ya Huku kovanthu ankho vei. Ombimbiliya ipopia okuti Sesusi “evetumu vevali-vevali momapunda-umbo aeho” vakalongese ovanthu. (Luka 10:1) Otyipuka otyo Sesusi alingile, tyakuatesileko ovalongwa vae, avetyivili okulongesa Ondaka ya Huku ovanthu ovanyingi. Tupu tyevehambukisilwe unene etyi vaundapela kumwe. (Luka 10:17) Okuti no ove nthiki imwe wetyisokele-ale tyokuundapela kumwe na vakwenyi vo mewaneno, movilinga evi viokulongesa ovanthu Ombimbiliya?
KUHANDE OKUNOÑGONOKA VALI?
Monoñgonoka ovipuka vimwe upondola okulinga wahatile owoma tyina uti pokupopila vakwenyi etyi uli nokulilongesa.
3. Siovaa mekukuatesako
Vamwe vena owoma wokupopila vakuavo etyi veli nokulilongesa mokonda vasoka okuti hamwe mavapengesa vala. Ovakuavo vena ohonyi, vasoka okuti hamwe ovanthu kamavesuku-ale netyi mavapopi.
-
Okuti no ove tyina utyisoka tyikutilisa owoma? Oityi wakumbululila ngotyo?
Talei OVIDIU, amutomphola epulo eli:
-
Oityi tyakuatesako ovanthu ovo tuamona movidiu omo, vahatile vali owoma?
Tangei Isaías 41:10, amutomphola epulo eli:
-
Oñgeni okulikuambela matyikukuatesako tyina wamatili owoma wokupopila vakwenyi etyi uli nokulilongesa?
Okuti ankho utyii-ale
Ovanyingi Ponombangi mba Siovaa navo ankho kavetyihunu-ale okuti nthiki imwe mavetyivili okulongesa vakuavo Ombimbiliya. Omukulu umwe utiwa o Sergey ankho welitomba, ankho usoka okuti utupu-ale etyi evila okulinga. Mahi etyi pahe ahimbika okulilongesa Ombimbiliya, ehelitombo vali. Wati: “Namphila ankho ndyina owoma, ankho ndyilikuluminya umwe ndyipopile vakuetu etyi nelilongesa. Okulongesa vakuetu Ombimbiliya tyankhuatesako, pahe nohonyi ndyitupu vali. Tupu tyankhuatesako okuyumba vali onthumbi mu etyi ankho ndyili nokulilongesa.”
4. Popia-vo nawa
Tyina uti pokupopila vakwenyi etyi uli nokulilongesa, una okusoka nawa konondaka mopopi. Mahi tupu una okutala nawa oñgeni motyipopi. Tangei 2 Timotiu 2:24 na 1 Petulu 3:15, amutomphola omapulo aa:
-
Oityi ono tesitu ombo mbapopia, tuna yokulinga tyina tuya pokupopila vakuetu etyi tuli nokulilongesa?
-
Ine ovanthu vamwe kavekutavela, oityi molingi? Oityi wahapondola okulinga?
-
Tyina usoka ñgaa, oityi tyikahi vali nawa? Okuti okukuluminya vakuetu vetavele etyi tuvepopila, ine okuvepula-vo nawa navo vapopie etyi vasoka?
5. Okupopila vakuetu Ombimbiliya tyihambukiswa
Etyi Sesusi eli pano pohi, Siovaa wemuavelele otyilinga tyokulongesa vakuavo. Mahi Sesusi otyilinga otyo ankho utyitala ñgeni? Tangei Suau 4:34, amutomphola omapulo aa:
-
Omunthu tyina alia okulia kwapepa nawa, wati umwe oe uhambukwa, oe ukala nawa. Okulinga ovilinga vya Huku, oityi Sesusi etyeelekela nokulia?
-
Okupopila vakuetu etyi Huku makalingila ovanthu komutwe wandyila, tyitukalesa ñgeni? Oityi wakumbululila ngotyo?
Linga ngetyi
-
Meliongiyo liomokati kosimanu, tala umwe nawa oñgeni tupondola okuhimbika okulongesa vakuetu Ombimbiliya.
-
Pula ou ukulongesa etyi una okulinga, uhimbike okulinga ononthele meliongiyo liomokati kosimanu. Okulinga ononthele meliongiyo, matyikukuatesako ohatili owoma wokupopila vakwenyi etyi uli nokulilongesa.
-
Apa pokuati “Ovanthu Vamwe Vati” no pokuati “Ine Hamwe Pamoneka Omunthu Umwe Ekupulu Okuti”, pena ovipuka vimwe ovanthu vapopia tyina vahanda okuaanya etyi tulongesa. Pahe ove soka etyi mokumbulula ine vekupopila ovipuka ngo ovio vili opo.
INE MULIVASA NOMUNTHU EKUTOLESA: “Okuti upondola okumupopila etyi uli nokulilongesa?”
-
Mahi pahe mohimbika ñgeni?
ETYI WELILONGESA
Welilongesa okuti okupopila vakwenyi etyi uli nokulilongesa tyihambukiswa, ngwe okutyilinga katyipuilisa-le.
Okupitulula
-
Oityi wesukisila okupopila vakwenyi etyi uli nokulilongesa?
-
Oityi wahapondola okulinga tyina upopila vakwenyi etyi uli nokulilongesa?
-
Oityi matyikukuatesako wahatile owoma tyina uya pokupopila vakwenyi etyi welilongesa?
KUHANDE OKUOVOLA VALI?
Ovidiu ei ipopia oñgeni upondola okuavela ovanthu okamukanda makevetuala mo jw.org.
Tala ovipuka vikuana mavikukuatesako okulongesa vakwenyi.
“Okuti Wafuapo Opo Ufwe Ovanthu?” (Omutala Womulavi wa Setembro yo 2020)
Ovidiu ei ipopia etyi Siovaa akuatesako omukainthu umwe ahatili vali oweoma. Tulilongesila-ko okuti Siovaa utukuatesako tutyivile okulongesa vakuetu Ondaka yae, naapa tuvana.
Tanga onthele ei utale oñgeni mokuatesako ombunga yove vehelilongesa Ombimbiliya.
“Oñgeni Matuhiki Komitima Viombunga Yetu Yehelilongesa” (Omutala Womulavi 15 ya Março yo 2014)
