Tyina kumoneka otyipuka tyimwe otyivi, tyiihama komutima, ovanthu vehole okulipula okuti: “Oityi tumonena emone ñgaa?” Ombimbiliya ipopia oityi kumonekela ovipuka ovivi.

1. Ononkhumbi mbatuka-pi?

Satanasi Eliapu ketavelele ku Huku, ankho uhanda ñgeno oe utumina ovanthu. Ayapula ovo Andau na Eva vahule kwe, avehetavela ku Huku ngae. Mahi wetyilingile ñgeni? Wakemba Eva. (Gênesis 3:1-5) Eva pahe asoko okuti Huku hamwe ankho una etyi eveholeka otyiwa. Ovipuka apopila Eva, ongatyina ati: ‘Ovanthu ine valinga vala etyi vahanda, tyehetei ku Huku, vakala vali nawa.’ Satanasi atee umwe apopila Eva okuti: ‘Upondola vala okuehetavela etyi Huku emupopila, kumankhi-ale.’ Satanasi oe watetekela okukemba, otyo Ombimbiliya imupopila okuti “onkhembi, iya o he younkhembi.” — Suau 8:44.

2. Oityi ovo Andau na Eva valingile?

Siovaa waavelele ovo Andau na Eva ovipuka ovinyingi oviwa, eveti: ‘Liei komiti aviho vili motyilongo tyenyi, mahi mwahaliei vala ku wike.’ (Gênesis 2:15-17) Ngwe avalingi onkhango, avali komuti una Huku eveilikile. Ombimbiliya ipopia okuti Eva “atokola otyinyango ali.” Etyi Andau eya, “nae ali.” (Gênesis 3:6) Otyipuka otyo valinga, vaanya Huku. Etyi Huku atunga ovo Andau na Eva, wevetungile umwe nawa. Ankho nokusoka vala okulinga otyivi, kavetyisoko-ale. Naina, etyi valia kotyinyango tyina, valingile umwe tyawina, tyokwahahandele umwe okutavela ku Siovaa. Pahe ankho vahanda umwe vala okulinga etyi vasoka. Otyipuka otyo valinga tyokwehetavelele ku Huku, tyeveetela. — Gênesis 3:16-19.

3. Otyipuka otyo tyalingile ovo Andau na Eva tyetutuala napi?

Okutuka umwe onthiki ovo Andau na Eva vaanya Huku, avakala nonkhali. Pahe ovana vatyo aveho vatunda muvo, navo vena onkhali. Ombimbiliya yati: “Mokonda yomunthu wike vala [Andau], onkhali yanyingila mouye iya onkhali yaeta ononkhia, ngotyo ononkhia ambuliyandyana movanthu aveho.” — Ova Loma 5:12.

Oityi tumonena ononkhumbi? Pamwe tumona umwe ononkhumbi mokonda yovipuka onthwe muene tualinga. Pamwe omokonda yovipuka vakuetu vehole okulinga. Tupu pamwe tyitumonesa umwe emone, o tyovitateka viatyo evi viahalae. — Tanga Eclesiastes 9:11.

 KUHANDE OKUNOÑGONOKA VALI?

4. Olie uli nokutuetela ononkhumbi

Ovanthu ovanyingi vasoka okuti o Huku uli nokutumina ouye. Mahi okuti otyo otyili umwe? Talei OVIDIU.

Tangei Tiaku 1:13 na 1 Suau 5:19, amutomphola epulo eli:

• Okuti tyili-tyili o Huku umwe utumonesa emone?

5. Tala ovipuka vimwe viamoneka tundee apa Satanasi ahimbika okutumina ouye

1. Ovo Andau na Eva ankho vetupu onkhali, vena vala ombembwa. Mahi avetavela ku Satanasi, avatyindamena Siovaa

2.   Pahe etyi vayeka-po Huku, mouye amuyula vala ovitateka. Ovanthu pahe vena onkhali, vamona emone, vankhia

3. Siovaa makamana-ko onkhali, nononkhumbi, nononkhia. Ovanthu mavakakala nawa, mouye umwe ukahi nawa

6. Tyina tuli nokumona emone, Siovaa nae tyimuihama

Okuti Huku tyina tuli nokumona emone, ututala vala, kesukile-ale? Tutale mo Mbimbiliya etyi Ohamba Daviti nomu apositolu Petulu vapopia. Tangei Salmo 31:7 na 1 Petulu 5:7, amutomphola epulo eli:

• Pahe wetyimona okuti Siovaa ononkhumbi mbetu umbuete, utukuatesako movitateka vietu. Otyipuka otyo tyekukalesa-vo ñgeni?

 ETYI WELILONGESA

Welilongesa okuti ovo Satanasi, na Andau na Eva, ovo vaeta emone mouye. Tupu wamona okuti tyina tumona emone, Siovaa nae tyimuihama komutima. Apa katutu Siovaa mamaneko ovivi aviho.

Okupitulula

• Omatutu patyi Satanasi Eliapu apopila Eva?

• Etyi ovo Andau na Eva vaanya Huku, pahe oityi tyetuetela?

• Oityi tutila umwe Siovaa ononkhumbi mbetu mbumuihama komutima?