ELONGESO 28
Pandula Etyi Ovo Siovaa na Sesusi Vekulingila
Soka ñgeno una epanga liove, ekuavela otyipuka tyimwe otyiwa. Mokala ñgeni? Mohambukwa, omupandula unene! Ovo Siovaa na Sesusi vetuavela otyipuka otyiwa vali ankho vena-tyo. Otyipuka otyo oityi? Oityi matulingi no onthwe tuvepandule?
1. Oityi matulingi tupandule etyi ovo Siovaa na Sesusi vetulingila?
Ombimbiliya yapopia okuti ‘aveho vayumba onthumbi’ mu Sesusi, mavakakala-ko apeho. (Suau 3:16) Oityi tyitiwa okuyumba onthumbi mu Sesusi? Hakutavela vala okuti kouye kuna Sesusi. Mahi tuna okulinga ovipuka oviwa, mavilekesa umwe okuti tuvanthu va Huku. (Tiaku 2:17) Tyina tulinga ovipuka oviwa na tyina tupopia ovipuka vikahi nawa, tukala vali omapanga a Sesusi, tupu tukala omapanga a Tate yae Siovaa. — Tanga Suau 14:21.
2. Eliongiyo patyi litukuatesako tupandule ovo Siovaa na Sesusi?
Etyi Sesusi ehenenkhie, wapopilile ovalongwa vae otyipuka tyimwe ankho vena okulinga vapandule etyi ankho mevelingila. Wevelongesile valinge-linge otyipuka tyimwe Ombimbiliya ipopia okuti “Ondalelo ya Tatekulu.” (1 Ova Kolindu 11:20) Sesusi wevelongesile tupu, omokonda ankho uhanda ovalongwa vae, novanthu aveho va Huku, vahinangaile etyi etavela okunkhia eveyovole. Pahe etyi evelongesa, eveti: “Tualeiko okutyilinga opo munthyinangele.” (Luka 22:19) Ove tyina wenda keliongiyo olio liokuhinangela ononkhia mba Sesusi, uli nokupandula okankhenda ovo Siovaa na Sesusi vekulingila.
KUHANDE OKUNOÑGONOKA VALI?
Monoñgonoka ovipuka ovikwavo upondola okulinga upandule etyi ovo Siovaa na Sesusi vekulingila. Motale oityi wesukisila okuenda keliongiyo liokuhinangela ononkhia mba Sesusi.
3. Oityi tupondola okulinga na tupandule ovo Siovaa na Sesusi
Soka ñgeno uli nokuyoa, ohande okuenda nomaande. Tyina ukati ñgaa, kuna kuya omunthu wekumona, ekuyaula-mo. Pahe okuti tyina wamayaulwa-mo, motundilila vala opo, oende no keumbo ohapandula omunthu oo? Nii vala kumetyilingi! Mokutala mohande umwe ñgeno umufeta, ine hatyo?
Matukakalako tupu apeho, atuhakankhia-nkhia vali, okankhenda ka Siovaa. Tangei 1 Suau 4:8-10, amutomphola omapulo aa:
-
Oityi tutila okuti Huku walinga etyi atuma omona wae etuyovole?
-
Tyina usoka ñgaa ku etyi ovo Siovaa na Sesusi vekulingila, tyikukalesa-vo ñgeni?
Oityi tuna okulinga tupandule ovo Siovaa na Sesusi okankhenda vetulingila? Tangei 2 Ova Kolindu 5:15 na 1 Suau 4:11; 5:3. Lingei ñgaa: tangei otesitu ike, amutomphola epulo lili pombuelo, ngatyo mulinga ono tesitu ambuho:
-
Ngetyi tuatanga, oityi tuna okulinga tupandule ovo Siovaa na Sesusi?
4. Hetekela Sesusi
Otyipuka otyikwavo tupondola okulinga tupandule ovo Siovaa na Sesusi etyi vetulingila oputyina tuhetekela Sesusi. Tangei 1 Petulu 2:21, amutomphola epulo eli:
-
Oñgeni ove molandulila popepi onomphai mba Sesusi?
Sesusi ankho uhole Ondaka ya Huku, ulongesa ovanthu Ondaka ya Huku, ukuatesako vakuavo
5. Enda keliongiyo liokuhinangela ononkhia mba Sesusi
Tangei Luka 22:14, 19, 20, mutale oityi Sesusi alingile Pondalelo ya Tatekulu. Pahe amutomphola omapulo aa:
-
Oityi tyalingilwe Pondalelo ya Tatekulu?
-
Ombolo ilekesa-tyi? Ovinyu ilekesa-tyi? — Tala vali povelesikulu 19 no 20.
Sesusi wahandele ñgeno ovalongwa vae vahinangela ononkhia mbae omanima atyo aeho. Onthwe Nombangi mba Siovaa otyo tulinga. Omanima atyo aeho, tuliongiya monthiki Sesusi aipaelwe opo tulinge etyi etutuma okuhinangela ononkhia mbae. Tutyilinga umwe ngetyi ngwe etyilingile. Mahi oityi eliongiyo olio liesukisila unene? Talei OVIDIU, amutomphola omapulo aa:
-
Oityi tyilingwa meliongiyo liokuhinangela ononkhia mba Sesusi?
Ombolo novinyu vina etyi vilekesa. Ombolo ilekesa olutu lwa Sesusi luehena onkhali. Ovinyu ilekesa ohonde yae
OVANTHU VAMWE VATI: “Omunthu opo ayovolwe, una vala okutavela okuti Sesusi Omona wa Huku tyapwa.”
-
Upondola okumutangela omukanda wa Suau 3:16 no wa Tiaku 2:17. Mahi ñgeno wemuhangununina ñgeni ono tesitu ombo, atale okuti hatyo-ko vala?
ETYI WELILONGESA
Welilongesa okuti opo upandule etyi Sesusi etulingila, haunene una okulinga ovipuka evi vivali: okumuyumba onthumbi, nokuenda keliongiyo liokuhinangela ononkhia mbae.
Okupitulula
-
Okuyumba onthumbi mu Sesusi oityi?
-
Oityi molingi upandule etyi ovo Siovaa na Sesusi vekulingila?
-
Oityi tuesukisila okuenda keliongiyo liokuhinangela ononkhia mba Sesusi?
KUHANDE OKUOVOLA VALI?
Tyina tusoka ku Sesusi, etyi aipawa, tyituavela okulinga-tyi?
Onthele ei ipopia ovipuka tupondola okulinga tuyumbe onthumbi mu Siovaa.
“Yumba Onthumbi Momilao via Jeova” (Omutala Womulavi wa Outubro yo 2016)
Monthele ei yokuati “Ame Pahe Ndyikahi Umwe Nawa, Hilivele Vali Onombei” omukai ou wapopia oñgeni okunoñgonoka umwe nawa etyi Sesusi emulingila tyemukuatesako.
“Ombimbiliya Ipilulula Omuenyo Wovanthu” (onthele Yomutala Womulavi)
Meliongiyo liokuhinangela ononkhia mba Sesusi, o vamwe vala valia kombolo nokunwa kovinyu. Omokonda yatyi?
