Okunyimisa ou tuhole tyiihama unene. Otyo Ombimbiliya ipopila okuti ononkhia ondyale yovanthu. (1 Ova Kolindu 15:26) Melongeso 27, welilongesa okuti Siovaa makamanako ononkhia. Pahe vokuankhia-le, oityi Siovaa mekevelingila? Okuti ngotyo vakakota umwe? Melongeso eli, monoñgonoka otyipuka tyimwe Siovaa apanga okukalinga. Wapopia okuti makatutilisa ovanthu ovanyingi-nyingi avakakala-kalako umwe tyahakankhia-nkhia vali. Okuti ñgaa tyili metyilingi umwe? Tyina vamatutiliswa, mavakakala keulu ine opo pano pohi?

1. Oityi Siovaa ahanda okulingila vetu vokuanyima?

Siovaa nae utyihanda omunthu wokuanyima akale vali nomwenyo. Kwali omukulu umwe ankho uhole Huku utiwa o Sobe. Omukulu oo ankho utyii okuti ine nthiki imwe unkhia, Siovaa kamemulimbwa. Wapopilile Siovaa ati: ‘Ove mokandyihana, ame andyikutavelela kondyembo.’ — Tanga Jó 14:13-15.

2. Oityi tutila ovanthu vapondola umwe okututila?

Etyi Sesusi eli pano pohi watutilisile ovanthu kononkhono mba Huku. Watutilisile omona umwe omukainthu ankho una omanima 12, atutilisa vali omukuendye umwe, omona womukulu umwe omuhepe. (Maluku 5:41, 42; Luka 7:12-15) Etyi pakala, epanga liae Lasalu nae anyimi akapakwa. Onthiki Sesusi apita komutambo, wavasa Lasalu wanyima-le tyokohale, ankho pena-le ononthiki ononkhuana. Sesusi asoko okumututilisa, elikuambela ku Huku. Pahe etyi amana okulikuambela ati: “Lasalu, tunda-mo!” Iya “omulume [oo] ankho wankhia, atundu-mo” nomwenyo. (Suau 11:43, 44) Ombunga ya Lasalu nomapanga ae avahambukwa unene!

3. Okuti no venyi vokuanyima mavakatutiliswa?

Ombimbiliya yapopia okuti “makukakala etutilo.” (Ovilinga 24:15) Ovanthu vana Sesusi atutilisile kavaile keulu. (Suau 3:13) Vatutiliswa vala avatualako okukala pano pohi. Kavaanyene avati tuahanda okuenda keulu. Apa katutu Sesusi makatutilisa ovanthu, avakalako apeho pano pohi nombembwa. Watile okuti makatutilisa “aveho vana vekahi momalangalo.” Ovanthu vamwe vanyima-nyima-le onthwe tuevelimbwa-le. Mahi vana Huku apaka momutima mekevetutilisa. — Suau 5:28, 29.

 KUHANDE OKUNOÑGONOKA VALI?

4. Sesusi utyivila okututilisa ovanthu

Tangei Suau 11:14, 38-44, mutale etyi Sesusi alingile epanga liae Lasalu etyi anyima. Pahe tyina muamatange, amutomphola omapulo aa:

• Okuti Lasalu wankhile umwe? — Tala vali povelesikulu 39.

• Ine tyitiwa Lasalu etyi ankhia waile keulu, okuti Sesusi ñgeno wemukondola vali pano pohi?

Talei OVIDIU.

5. Ovanthu ovanyingi vanyima mavakatutiliswa

Tangei Salmo 37:29, amutomphola epulo eli:

• Ovanthu mavakatutiliswa mavakakala-pi?

Sesusi kamakatutilisa vala vana vali omapanga a Siovaa. Tangei Ovilinga 24:15, amutomphola epulo eli:

• Olie uhanda okumona vali nga atutiliswa?

• Ovalinepi tuamona movidiu, vetyii umwe nawa okuti omona wavo makatutiliswa. Oñgeni okusoka ku otyo tyevekuatesako?

 ETYI WELILONGESA

Welilongesa okuti ovanthu ovanyingi vokuanyima mavakatutiliswa. Wamona okuti Siovaa kevelimbwilwe, uvehandela vali omwenyo. Tupu welilongesa okuti Sesusi oe mekevetutilisa kononkhono mba Huku.

Okupitulula

• Okutyi tutalela okuti ovo Siovaa na Sesusi vahanda umwe okututilisa ovanthu?

• Ovanthu mavakatutiliswa mavakakala keulu ine opo pano pohi? Oityi wakumbululila ngotyo?

• Oityi wayumbila-ko umwe onthumbi yokuti vana uhole vokuanyima mavakatutila?