ELONGESO 42
Oñgeni Ombimbiliya Ipopia Okunepa, Nokuahanepe?
Kovilongo vimwe, vati opo omunthu akale umwe nawa, una okunepa. Mahi kuna ovanthu vamwe vanepa, otyo vehena ehambu. Tupu otyo kuna vamwe vahanepele mahi vekahi vala nawa, vena ehambu. Ombimbiliya ipopia okuti tyilinge okunepa, tyilinge okuahanepe, atyiho tyikahi nawa.
1. Pamwe omokonda yatyi otyiwa okuahanepe?
Ombimbiliya yati: ‘Una wanepa walinga nawa, mahi una wahanepele walinga vali nawa.’ (Tanga 1 Ova Kolindu 7:32, 33, 38.) Oityi Ombimbiliya yapopila okuti omunthu wahanepele walinga vali nawa? Omokonda vokuahanepele, no vokuahanepelwe, vena vali omuvo wokulinga ovipuka ovikwavo. Vapondola okuenda kovilongo ovikwavo vakalongese ovanthu Ombimbiliya, vetupu etyi tyivetyika. Vena vali omuvo wokulilongesa nawa Ombimbiliya vapameke oupanga wavo na Siovaa.
2. Omokonda yatyi vana vokuhanda okulinepa vesukisila okulihonekesa?
Okuahanepe tyikahi nawa, mahi tupu motyinepo muna oviwa. Ombimbiliya yapopia okuti “hahe vevali tyipona wike.” (Eclesiastes 4:9) Tyina vokuelinepa valinga etyi tyili mo Mbimbiliya, vakala notyinepo tyina ehambu. Mahi omokonda yatyi vokuelinepa vesukisila okulihonekesa? Omokonda ovanthu tyina vati pokulihonekesa, velipopila okuti mavelihumbu, avakala kumwe atee-tee. Ovanthu vokulihonekesa, vakala umwe nawa. Omitima viavo vikala pomphangu mokonda vetyii okuti mukuavo kamemuyekela-po tyawina. Novana vakala nawa mokonda vetyii okuti ovohe kamaveliyeke vala ngotyo. Mahi vokuehelihonekesile, hatyo-ko vakala ngotyo.
3. Oñgeni Siovaa atala otyinepo?
Etyi Siovaa anepesa ovo Andau na Eva, evepopila onondaka ombu mbati: “Omulume akasepo he na ina, akakuata-po omukai wae.” (Gênesis 2:24) Siovaa wati ovalinepi vena okulihumba, avakala kumwe atee-tee. Tyiveyapula umwe vala, ononkhia. Pahe ine umwe weenda mukuavo konyima? Opo Siovaa wapopia okuti mukuavo, oe muene utyii ankho mavelihenge ine kamavelihenge. Muaina, Siovaa uyeka vala ovanthu velihenge ankho umwe walala nou vehelinepe nae. a (Mateusi 19:9) Omunthu wa Huku kapondola okunepa oluvale. — 1 Timotiu 3:2.
KUHANDE OKUNOÑGONOKA VALI?
Tyilinge wanepa, tyilinge kuanepele, monoñgonoka etyi una okulinga uhambukwe, mahi tupu ohambukiswa Siovaa.
4. Ovipuka vimwe vana vahanepele no vokuahanepelwe vapondola okulinga
Ku Sesusi, okuahanepe natyo ankho tyikahi nawa. (Mateusi 19:11, 12) Tangei Mateusi 4:23, amutomphola epulo eli:
-
Ovipuka patyi Sesusi alingile, mahi mokutala wetyivilile umwe vala okuvilinga aviho mokonda ankho kanepele?
Vokuahanepele no vokuahanepelwe, navo vapondola okulingila Siovaa ovipuka ovinyingi nga Sesusi. Ine otyo valinga ngotyo, mavakala nawa, avahambukwa. Talei OVIDIU, amutomphola epulo eli.
-
Ovipuka patyi vokuahanepele no vokuahanepelwe, vapondola okulinga movilinga vya Huku?
Okuti ankho utyii-ale
Ombimbiliya kaipopi omanima eñgapi omunthu ena okunepa nao. Mahi ipopia okuti hahe okunepa, tyina pahe omunthu ahasoko vali unene okulinga otyinepo tyopoula. Omokonda yatyi? Omokonda pahe opo omunthu masoko umwe nawa, akoyo umwe nawa; kamanepe vala opo alinge otyinepo tyopoula. — 1 Ova Kolindu 7:36.
5. Holovona nawa omunthu mamulinepe nae
Pokukoya omunthu matulinepe nae, tuna umwe okusoka nawa mokonda otyinepo hatyipuka tyokunyana. Tangei Mateusi 19:4-6, 9, amutomphola epulo eli:
-
Oityi tyahandela umwe okusoka nawa tyina tuya pokunepa, atuahatumphuluka vala natyo?
Ombimbiliya ipopia ovipuka vimwe tuna okuovola komunthu tuahanda ñgeno oe tulinepa nae. Mahi tete tuna okuovola omunthu uhole Siovaa. b Tangei 1 Ova Kolindu 7:39 na 2 Ova Kolindu 6:14, amutomphola omapulo aa:
-
Oityi tyahandela okulinepa vala nomunthu ufenda Siovaa?
-
Tyina usoka, oñgeni Siovaa makala ine tulinepa nomunthu wehemuhole?
Ine upandeka ongombe nembulu vieheli mononkhono, aviho mavimono emone. No onthwe okulinepa nomunthu wahalingila Siovaa, matumono ononkhumbi
6. Otyinepo tyikola
Kohale, ova Isilayeli vamwe, ankho vahengela tyawina ovakai vavo. Tangei Malaquias 2:13, 14, 16, amutomphola epulo eli:
-
Omokonda yatyi Siovaa anumanena tyina ovanthu velihenga, apehena ou waenda mukuavo konyima?
Tyina umwe po vokuelinepa amaende mukuavo konyima, avelihenge, mukuavo umona ononkhumbi; novana navo tyiveihama unene
Talei OVIDIU, amutomphola epulo eli:
-
Ine omunthu muelinepa nae kafende Siovaa, oityi upondola okulinga mukale nombembwa meumbo, amukala nehambu?
7. Linga atyiho Siovaa apopia tyayemba kotyinepo
Pamwe omunthu una umwe okulikuatehila alinge atyiho Siovaa apopia tyayemba kotyinepo. c Mahi ine tulikuatehila, Siovaa nae utukuatesako. Talei OVIDIU.
Tangei Ova Hebeleu 13:4, amutomphola omapulo aa:
-
Ku ove, etyi Siovaa apopia okuti vokuelinepa kavapondola okuyapula omaula, tyaviuka? Tyivilwa umwe okutyilinga? Oityi wakumbululila ngotyo?
Siovaa uhanda ñgeno ovanthu aveho vahanda okulinepa, velihonekesa kukaputu. No putyina ovanthu va Huku vahanda okulihenga, vena okulinga omikanda viokulihenga. Tangei Titu 3:1, amutomphola epulo eli:
-
Ine muelinepa, okuti otyinepo tyenyi tyiiwe kombonge?
INE HAMWE PAMONEKA OMUNTHU UMWE EKUPULU OKUTI: “Onwe ñgaa mututumba vali tyatiwa muhanda okukelihonekesa. Ñgaa kamuelinepele-ale?”
-
Ñgeno wemutiwi?
ETYI WELILONGESA
Welilongesa okuti tyilinge ava vanepa, tyilinge ava vahanepele, aveho vapondola okukala nawa, avahambukwa. Vena umwe vala okulinga atyiho Siovaa atuma.
Okupitulula
-
Ovipuka patyi vokuahanepele no vokuahanepelwe vapondola okulinga movilinga vya Huku?
-
Oityi Siovaa ahandela tulinepe umwe vala nomunthu umufenda?
-
Oityi Ombimbiliya yapopia okuti otyo umwe vala tyipondola okulihengesa?
KUHANDE OKUOVOLA VALI?
Onondaka mbokuati tuna ‘okulinepa vala mu Tatekulu,’ mbahanda okutiwi?
Ovidiu ei, ipopia ovipuka vimwe vokuhanda okunepa vapondola okulinga.
Omukuendye ou wapopia okuti ovipuka Siovaa emuavela ena-vyo pehepano, vili vali nawa tyipona evi asapo.
Ankho Ndyisoka Okuti Nae Metavela Okulilongesa Ombimbiliya (1:56)
Oityi omunthu ena okusoka tete, tyina vehenelihenge na tyina vehenelinyunguluke?
Humba “Etyi Huku Apaka Kokanga Ike” (Omutala Womulavi wa Dezembro yo 2018)
a Opo unoñgonoke ankho tyaviuka ine katyaviukile okulinyunguluka, tanga apa pokuati: Ovipuka Vimwe Viahangununwa Nawa 4.
b Kovilongo vimwe, tyina omona ahanda okunepa, ovohe ovo vemuovolela. Ovohe vokusuka novana vavo, kaveveovolela omunthu wokuna-tyo, mahi veveovolela omunthu uhole Siovaa.
c Ine pahetyino ñgaa una omunthu mukala nae mahi kamuelihonekesile, ove muene utyii ine momuyeke-po ine mamukelihonekesa. Otyo pahe ove muene una okutyisoka nawa, otale etyi molingi!
