ELONGESO 44
Okuti Ovipito Aviho Vihambukiswa Huku?
Siovaa uhanda tuhambukwe. Otyipuka tyimwe tyituhambukiswa, ovipito. Pahe okuti ovipito viatyo aviho vihambukiswa Huku? Tyina tuya pokulinga ovipito, oñgeni matuvilingi nonondunge opo Huku etumone okuti tumuhole?
1. Omokonda yatyi Siovaa ahahandela ovipito vimwe?
Hamwe kutyii, mahi ovipito ovinyingi vilipona netyi Ombimbiliya ipopia mokonda viahindwa novanthu vahafende Huku. Pamwe movipito ovio muankhingwa-nkhingwa ovipuka viayemba komalongeso omatutu. Pamwe ovipito viatyo viatuka vala kowoma nonohande okuti mambuvelingi omapita, no kowoma novilulu. (Isaías 65:11) Siovaa wapopila aveho vemufenda wati: ‘Tundei pokati kavo, yekei-po okukuata kovipuka viasila.’ — 2 Ova Kolindu 6:17. a
2. Siovaa ukala ñgeni tyina etutala tulinga ovipito vihilivika omunthu?
Siovaa wapopia okuti hatyiwako “okuyumba unene onthumbi movanthu.” (Tanga Jeremias 17:5.) Ovipito vimwe vilingwa, opala okunkhimaneka umwe vala ovanthu, ovatumini, nomatolopa. Nkhele kuna ovipito vimwe vilingwa monthiki otyilongo tyayovoka kovanthu ankho vevekolonyeka. Kuna vali ovipito viayemba kokufenda epandela no kovipuka ovikwavo viotyilongo. (1 Suau 5:21) Tupu nkhele kuna ovipito viokupandula etyi opalititu imwe netyi ovanthu vamwe valingila otyilongo. Naina ovipito vimwe, vialingwa umwe vala vihilivike ovanthu, novipuka vyo motyilongo. Ngwe otyo ovanthu vatyo ankho kavehole-ale Siovaa. Pahe ine tulipaka movipito ngovio, Siovaa makala-vo ñgeni?
3. Ovipuka patyi vihole okulingwa movipito, Siovaa ahahande?
Movipito vimwe muhole okulingwa ovipuka viasila. Ngwe otyo Ombimbiliya yati umwe ovipuka evi ‘viokunwa unene, novipito ovivi, nomaunkholwa,’ viapenga, katupondola okuvilinga. (1 Petulu 4:3) Naina ine tuhanda okukala omapanga a Huku, katupondola okulipaka movipito mulingwa ovipuka ngo ovio viasila.
KUHANDE OKUNOÑGONOKA VALI?
Monoñgonoka oñgeni mohambukiswa Siovaa movipuka evi viovipito.
4. Wehelipake movipito vinumanesa Huku
Tangei Ova Efesu 5:10, amutomphola omapulo aa:
-
Oityi tuna okusoka tyina tuya pokukoya ine matulingi otyipito tyimwe ine kamatulingi?
-
Ovipito patyi viakaka vali potyilongo ukala?
-
Tyina utala ñgaa, ovipito ovio vihambukiswa Huku?
Ovanthu vamwe onthiki vatuukisa enima, valinga otyipito. Kumbi wasokele-ale oñgeni Huku atala otyipito otyo? Mo Mbimbiliya mutupu apa tuvasa omunthu wa Huku wapopiwa-mo okuti walingile otyipito monthiki atuukisa enima. Muapopiwa vala ovanthu vevali vetyilingile otyipito otyo, mahi ankho kavafende Siovaa. Tangei Gênesis 40:20-22 na Mateusi 14:6-10, amutomphola omapulo aa:
-
Ovipuka patyi ovivi vialingilwe movipito ovio vivali?
-
Pahe okusoka ko no tesitu ombu tuatanga, ovipito evi viomanima vikalesa ñgeni Huku?
Hamwe pahetyino ñgaa uya nokulipula okuti: ‘Ine ndyilinga otyipito tyomanima novipito ovikwavo vilipona Nombimbiliya, ñgaa okuti Huku usuka umwe natyo anumana?’ Tangei Êxodo 32:1-8, pahe amutale OVIDIU. Tyina muamatale ovidiu, amutomphola omapulo aa:
-
Oityi tyahandela umwe okunoñgonoka nawa etyi tyihambukiswa Siovaa, netyi tyimunumanesa?
-
Pahe matutyilingi ñgeni?
Ovipito patyi vinumanesa Huku?
-
Ovipito viehelikuatele netyi Ombimbiliya ipopia. Opo utyitale umwe nawa ine tyelipona netyi Ombimbiliya ipopia, una okuovola okunoñgonoka (1) ovalie vetyihinda, (2) vetyihindila-tyi.
-
Ovipito viayemba kokuhilivika unene ovanthu, novipuka viotyilongo, ngetyi epandela. Onthwe tufenda umwe vala Siovaa. Tutyii okuti oe umwe vala makamanako ovitateka viovanthu.
-
Movipito mulingwa ovipuka Huku ailika mo Mbimbiliya. Katupondola okulinga otyipuka natyike Huku ati tyasila.
5. Popila vakwenyi okuti kumalinga-linga vali ovipito vinumanesa Huku
Pamwe vakwenyi mavekukongo ukale navo povipito wii okuti Huku kevihande. Povipuka ngo ovio, okuti hihande, tyipondola okupuiya. Otyipuka tyimwe upondola okulinga, okuvepopila okuti pahe kulingi vali ovipito ovio. Mahi tyina uvepopila-tyo, opopi umwe vala nawa. Talei OVIDIU, mutale oñgeni upondola okutyilinga.
Tangei Mateusi 7:12, amutomphola omapulo aa:
-
Ngetyi tuatanga, okuti tyaviuka okuenda ko vetu vehelilongesa Ombimbiliya, atuvepopila okuti vena okuyekapo okulinga ovipito vimwe mokonda vinumanesa Siovaa?
-
Ovipuka patyi upondola okulinga opo ombunga yove vetyimone okuti namphila wahakala navo povipito viavo, mahi uvehole?
6. Siovaa uhanda tuhambukwe
Siovaa uhanda tukale nombunga yetu, nomapanga etu, otyo tulia, otyo tuyola-yola. Tangei Eclesiastes 8:15, amutomphola epulo eli:
-
Onondaka patyi mbuli mo tesitu ei mbulekesa umwe nawa okuti Siovaa uhanda tuhambukwe?
Siovaa uhanda ovanthu vae vahambukwe, avakala kumwe na vakuavo otyo vayola-yola. Talei OVIDIU mutale oñgeni tuhambukwa tyina tuna vakuetu momaliongiyo omanene.
Tangei Ova Galata 6:10, amutomphola omapulo aa:
-
Okuti tuna umwe vala okukevela ovipito ‘tulingile-ko vakuetu oviwa’?
-
Oityi tyihambukiswa vali, okuti okuavela vakuetu otyipuka mokonda vala tuli pomuvo wovipito, ine okuavela vakuetu otyipuka mokonda tuna otyali, tyatunda umwe komutima?
-
Ovanthu vamwe Onombangi, pamwe valingila-po ovana vavo oupito, avevelandela-po oupuka ouwa. Ine una ovana, ovipuka patyi usoka okuti ine uvelingila-vyo mavahambukwa?
OVANTHU VAMWE VATI: “Tyokuti tuna okututumba tuovole oku otyipito tyimwe tyatuka, otyo okulipuilisa vala. Tyikola otyetyi muna omapanga ove nombunga yove!”
-
Ove oityi usoka?
ETYI WELILONGESA
Wamona okuti Siovaa uhanda tuhambukwe, mahi tupu kahande tulipake movipito vimunumanesa.
Okupitulula
-
Ovipuka patyi una okuovola okunoñgonoka utale ankho otyipito tyimwe tyinumanesa Siovaa?
-
Oñgeni mopopila ombunga yove nomapanga ove okuti kumalinga-linga vali ovipito vimwe mokonda vinumanesa Siovaa?
-
Oityi tutila umwe Siovaa uhanda tuhambukwe?
KUHANDE OKUOVOLA VALI?
Tala ovipito vimwe ovanthu va Huku vahapondola okulinga.
“Omokonda Yatyi Onombangi mba Siovaa Vahalingila Ovipito Vimwe?” (Mo jw.org)
Tanga onthele ei unoñgonoke omokonda yatyi tutila ovipito ovanthu valinga monthiki vavetesa enima, vinumanesa Huku.
“Omokonda Yatyi Onombangi mba Siovaa Vahalingila Ovipito Viomanima?” (Mo jw.org)
Tala ovidiu ei utale etyi ovana vena okulinga vahanumanese Siovaa povipito vyo natale.
Ovanthu ovanyingi kavalingi onotale. Mahi okuti kuvo ngotyo veli nokupumbwa?
“Vavasa Otyipuka Tyimwe Otyiwa Vali” (onthele Yomutala Womulavi)
a Tanga apa pokuati: Ovipuka Vimwe Viahangununwa Nawa 5, utale etyi upondola okulinga tyina vakwenyi muna-vo veli nokulinga otyipito tyimwe tyinumanesa Siovaa.
