ELONGESO 48
Koya Omapanga Ena Onondunge
Omapanga ena onondunge, etukuatesako tyina tuna ovitateka; tyina tuahambukwa, ayawisa kehambu lietu. Mahi Ombimbiliya ipopia umwe nawa okuti ovanthu vamwe, ha mapanga-ko omawa. Oñgeni matupungu okuti omunthu ou epanga likahi nawa, lina onondunge? Soka komapulo aa eli pombuelo.
1. Ine ukoya omapanga ena onondunge, mokala omunthu patyi?
Onthwe haunene tuayemba kokulinga etyi ovanthu tuhimama navo valinga. Ine omapanga etu alinga oviwa, no onthwe matulingi oviwa. Mahi ine valinga ovivi, opo no onthwe matuyembe vala kokulinga ovivi. Onthwe vanthu, otyo tukahi umwe ngotyo, tyilinge omapanga etu tuenda-enda navo, tyilinge tutomphola vala navo mo Internet. Ombimbiliya yati: “Una weenda novanandunge, nae makala nonondunge, mahi una ulinga oupanga novityova [ovanthu vana vehesukile na Siovaa] nae makala otyova.” (Provérbios 13:20) Ine ovanthu tukoya vakale omapanga etu ovava vehole Siovaa, no onthwe matukala noupanga wapama na Siovaa, atulingi ovipuka nonondunge. Mahi ine tukoya omapanga vehesukile netyi Ombimbiliya ipopia, mavetuhondovola ku Siovaa. Otyo Ombimbiliya yapopila okuti tuna okukoya nawa omapanga etu! Tyina tuna omapanga vehole Huku, vetukuatesako tulinge ovipuka nonondunge, no onthwe tuvekuatesako valinge oviwa. Tulinga umwe etyi Ombimbiliya yapopia okuti “okuliungumanesa pokati nokulipameka pokati.” — 1 Ova Tesalonika 5:11.
2. Ine katukoyo nawa omapanga etu, Siovaa makala ñgeni?
“Siovaa ukala epanga lyo vokulinga oviwa.” Naina Siovaa nae ukoya nawa omapanga ae. (Provérbios 3:32) Pahe soka: Ine Siovaa nae utala nawa ovanthu etavela vakale omapanga ae, opo makala ñgeni ine onthwe tulinga omapanga ovanthu vehemuhole, vehesukile-ale nae? Okuti kamanumana? (Tanga Tiaku 4:4.) Siovaa uhanda umwe vala tukale omapanga ae, tupu atukala omapanga ovanthu vemuhole. Ine otyo tulinga umwe otyo, mahambukwa. — Salmo 15:1-4.
KUHANDE OKUNOÑGONOKA VALI?
Monoñgonoka oityi wesukisila okuholovona nawa omapanga ove. Tupu motale etyi una okulinga uvase omapanga ekahi nawa.
3. Lunguka komapanga omavi
Omunthu wokuati umwe, oe wehehole Siovaa, oe wehesukile-ale netyi Ombimbiliya ipopia, omunthu ngo oo, kalingwa nae oupanga. Talei OVIDIU, amutomphola epulo eli.
-
Pamwe oñgeni tupondola okuhimbika okukala nomapanga omavi, mahi otyo tuehetyiete?
Tangei 1 Ova Kolindu 15:33, amutomphola omapulo aa:
-
Ovanthu patyi ove utala umwe okuti omapanga omavi? Omokonda yatyi?
Tangei Salmo 119:63, amutomphola epulo eli:
-
Oityi una okutala komunthu umwe opo upunge ankho epanga ewa ine hepanga-ko ewa?
Okukuata otyinyango tyavola otyipake povikwavo, aviho vivola. Okuti omapanga ove eli nokukuvolesa ine eli nokukupa onondunge?
4. Tupondola okukala omapanga ovanthu tuehelifwile navo
Ombimbiliya ipopia okuti ovo Daviti na Sonataa ankho omapanga omanene. Oupanga wavo uhuvisa mokonda Sonataa ankho omukulu unene ku Daviti, tupu ngwe ankho omona womutumini wova Isilayeli. Tangei 1 Samuel 18:1, amutomphola epulo eli:
-
Ngetyi tuamona ku Daviti na Sonataa, okuti omapanga etu vena umwe vala okukala ava tulifwe navo, na vana vena ovipuka onthwe tuna-vyo?
Tangei Ova Loma 1:11, 12, amutomphola epulo eli:
-
Oñgeni omapanga ehole Siovaa velipameka pokati?
Ovidiu ei, ilekesa omukuendye umwe wavasa epanga ankho ahasoko-ale. Talei OVIDIU, amutomphola omapulo aa:
-
Oityi ovo tate ya Ambele ankho valingila otyiho tyina vasoka komapanga ae o kosikola?
-
Oityi Ambele apanda komapanga ae o kosikola?
-
Okuti etyi ayeka-po omapanga ae o kosikola, pahe akala umwe vala ngotyo?
5. Etyi una okulinga ukale nomapanga omawa
Tala oñgeni upondola okuvasa omapanga omawa, netyi ove muene una okulinga ukale epanga likahi nawa. Talei OVIDIU.
Tangei Provérbios 18:24; 27:17, amutomphola omapulo aa:
-
Okuti omapanga elihole veliyekela?
-
Okuti no ove una omapanga ekukuatesako ngotyo? Ine nkhele utupu, okuti upondola okulikuatehila ukale nomapanga ngo oo?
Tangei Ova Filipu 2:4, amutomphola epulo eli:
-
Opo ukale nomapanga, no ove una-vo okulinga omunthu wovanthu. Pahe oityi upondola okulinga ulinge omunthu wovanthu?
Opo ukale nomapanga, no ove una-vo okulinga omunthu wovanthu
OVANTHU VAMWE VATI: “Hahe okukala nomunthu uti-vo epanga liange, namphila ehena onondunge, tyipona okukala vala ngotyo.”
-
Ove oityi usoka?
ETYI WELILONGESA
Welilongesa okuti tyina tukoya nawa omapanga etu, Siovaa uhambukwa, no onthwe muene tulinga ovipuka nonondunge.
Okupitulula
-
Tyina tuya pokukoya omapanga, oityi tuesukisila okusoka ku Siovaa?
-
Ovanthu patyi tuahapondola okutavela vakale omapanga etu?
-
Oityi una okulinga ukale nomapanga?
KUHANDE OKUOVOLA VALI?
Tanga onthele ei utale oñgeni omapanga omawa etukuatesako tyina tuehulilwa.
“Kala Nomapanga Omawa Tyina Onthyulilo Iheneye” (Omutala Womulavi wa Novembro yo 2019)
Tala ovipuka vimwe upondola okulinga opo ukale nomapanga ekahi nawa.
Ovipuka patyi una okusoka nawa tyina uya pokulinga omapanga mo Internet?
Omukuendye ou, etyi asoka umwe nawa, ahimbika okuovola omapanga omakwavo. Mahi opo utyinoñgonoke vali nawa, tanga onthele ei yati: “Ankho Ndyihanda-vo Ñgeno Ndyikala na Tate.”
“Ombimbiliya Ipilulula Omuenyo Wovanthu” (onthele Yomutala Womulavi)
