ELONGESO 50
Oityi Una Okulinga Eumbo Litunge? — Onthele 2
Ovana otyali tya Huku. Siovaa uhanda vokuna ovana vatekule nawa ovana vavo. Otyo mo Mbimbiliya apopila-mo etyi vokuna ovana vena okulinga vatekule nawa ovana vavo, netyi ovana vena okulinga opo eumbo litunge, mukale ombembwa.
1. Oityi Siovaa apopia vokuna ovana vena okulinga?
Siovaa uhanda vokuna ovana vatekule nawa ovana vavo, avevelongesa onondunge mbo Mbimbiliya. Uhanda pamwe vokuna ovana vanyane novana vavo, otyo vatomphola. Tupu uhanda vokuna ovana vayakulile ovana vavo kovipuka vipondola okuvenyona. (Provérbios 1:8) Ondaka yae Ombimbiliya yapopila ovohe okuti: ‘Longesei ovana venyi etyi tyelikuata netyi Siovaa apopia.’ (Tanga Ova Efesu 6:4.) Siovaa uhanda otyilinga tyokutekula ovana, nokuvelongesa atyikala muene tyovohe, avehetyavela vakuavo. Tyina ovohe vatekula ovana vavo ngetyi Siovaa apopia mo Mbimbiliya, uhambukwa.
2. Oityi Siovaa apopia ovana vena okulinga meumbo?
Siovaa wapopila ovana okuti: “Tavelei ko votate yenyi.” (Tanga Ova Kolosu 3:20.) Tyina ovana vetavela etyi vapopilwa novohe, ovohe vahambukwa, Siovaa nae uhambukwa. (Provérbios 23:22-25) Sesusi ankho kapengesa, mahi ovo tate yae ankho vapengesa. No ngotyo, etyi omututu, ankho utavela etyi ovohe vemupopila. — Luka 2:51, 52.
3. Oityi muna okulinga opo amuho meumbo mukale omapanga a Siovaa?
Ine una ovana, mokutala uhanda ñgeno novana vove vahumba Siovaa ngo ove. Pahe molingi ñgeni? Ombimbiliya yati: “[Ondaka ya Huku] una okuipopila apeho ovana vove, tyina upumphi meumbo liove, na tyina wenda-enda mondyila.” (Deuteronômio 6:7) Onondaka mbo tesitu oyo, mbahanda okuti ovohe tyina vamati pokulongesa ovana vavo, pamwe vena okuwana-wana okuvepopila otyipuka tyike. Mahi mokutala hamwe utyii-ale okuti ovana ongotyo umwe, uti umwe opopi opaleka-po vali. Naina otesitu oyo ihanda umwe okupopia okuti apeho una okusoka oñgeni molongesa ovana vove etyi Siovaa ekahi. Otyipuka tyimwe vokuna ovana vapondola okulinga, okusoka onthiki noola mavelilongaisa Ombimbiliya novana vavo, onosimanu ambuho. Mahi pahe ine mutupu ovana? No ngotyo taindyei onthiki mamulilongaisa Ombimbiliya onosimanu ambuho.
KUHANDE OKUNOÑGONOKA VALI?
Motale ovipuka vimwe upondola okulinga mukale nombembwa meumbo.
4. Pwa-elundo pokulonga ovana
Okulongesa ovana katyapepukile, mahi Ombimbiliya ipopia oñgeni vokuna ovana vapondola okutyilinga. Tangei Tiaku 1:19, 20, amutomphola omapulo aa:
-
Oñgeni vokuna ovana vena okupopia novana vavo?
-
Oityi vokuna ovana vahapondola okuviyulila ovana vavo tyina vanumana? a
5. Yakulila ovana vove
Opo utyivile okuyakulila ovana vove kovipuka vipondola okuvenyona, pamwe una okutomphola navo evi viayemba kotyinepo tyopoula, naapa umwe okupopia ovipuka ovio tyikukalesa nohonyi. Talei OVIDIU, amutomphola omapulo aa:
-
Omokonda yatyi tyahapepukilile ku vamwe vokuna ovana okupopia novana vavo evi viayemba kotyinepo tyopoula?
-
Oityi vamwe vokuna ovana valinga-linga opo vetyivile okupopia novana vavo evi viayemba kotyinepo tyopoula?
Etyi tyapopile Ombimbiliya tutyeete umwe. Ovivi mouye wa Satanasi viliyawisa vala. Tangei 2 Timotiu 3:1, 13, amutomphola epulo eli:
-
Ovelesikulu 13 ipopia ovanthu vokulinga ovivi. Vamwe povanthu ovo, vetyihole tyokulala novana. Pahe okusoka kotyipuka otyo, oityi vokuna ovana vesukisila okupopia novana vavo etyi tyayemba kotyinepo tyopoula, avevepopila etyi vapondola okulinga ine pamoneka ou uhanda okulala navo?
Okuti ankho utyii-ale?
Onombangi mba Siovaa, vehole okulinga ovipuka ovinyingi vipopia oñgeni vokuna ovana vapondola okupopia novana vavo evi viayemba kotyinepo tyopoula, netyi vena okulinga vetyivile okuliyakulila ku vana vahanda okuvekengelela valale navo. Vimwe ovievi:
-
Yakulila Ovana Vove (ovidiu)
-
Lilongesila Komulongesi Omunene, okapitulu 10 nokapitulu 32
-
“Longesa Ovana Vove Evi Viayemba Kotyinepo Tyopoula” (Pahukei! No. 5 2016)
6. Ovoho velinga onthilo
Ovana, tyilinge ovatutu vatyo, tyilinge vokuli pahe nokukula, vena okulinga onthilo ovohe, haunene umwe tyina vapopia navo. Talei OVIDIU, amutomphola omapulo aa:
-
Oityi ovana vesukisila okutomphola nawa novo tate yavo?
-
Oityi ovakuendye novahikuena vena okulinga vatomphole nawa novo tate yavo, ovohe avetyimono umwe okuti vena onondunge?
Tangei Provérbios 1:8, amutomphola epulo eli:
-
Oñgeni ovakuendye novahikuena vena okukala tyina ovohe vamevepopila etyi vena okulinga?
7. Lilongesei Ombimbiliya apeho novana venyi
Onombangi mba Siovaa, otyipuka tyimwe vehole okulinga, okuovola onthiki noola velilongese Ombimbiliya novana vavo onosimanu ambuho. Otyipuka otyo valinga tyokulilongesa Ombimbiliya aveho meumbo, tupu tyitiwa Efendelo Liombunga. Mahi efendelo liombunga lilingwa ñgeni? Talei OVIDIU, amutomphola omapulo aa:
-
Oityi mupondola okulinga opo mutyivile okulinga Efendelo Liombunga onosimanu ambuho?
-
Ovipuka patyi omukulu womeumbo apondola okulinga opo efendelo liombunga liende nawa, aveho meumbo avahambukwa? — Tala ofoto yokuhimbika elongeso eli.
-
Ovipuka patyi vipondola okumutyika okulilongesa amuho meumbo?
Siovaa wapopilile ova Isilayeli okuti vokuna ovana apeho ankho vena okulilongesa ondaka yae novana vavo. Tangei Deuteronômio 6:6, 7, amutomphola epulo eli:
-
Oñgeni upondola okulinga etyi tyipopia otesitu oyo?
Ovipuka vimwe mupondola okulinga mefendelo liombunga:
-
Lilongesei etyi matyililongeswa meliongiyo.
-
Tangei Ombimbiliya, amutomphola etyi muelilongesa.
-
Ine una ovana ovatutu, upondola okupola mo jw.org, ovipuka vimwe vialingilwa ovana.
-
Ine una ovana vekula, mupondola amutomphola ononthele mbumwe mbalingilwa ovakuendye novahikuena, mbuli mo jw.org.
-
Ove novana vove, hetekelei ovanthu vamwe vapopiwa mo Mbimbiliya.
-
Talei ovidiu imwe ili mo jw.org, amutomphola etyi muelilongesila-ko.
OVANTHU VAMWE VATI: “Ombimbiliya ipuiya unene okuinoñgonoka, ovana kamaveinoñgonoka-le.”
-
Ove oityi usoka?
ETYI WELILONGESA
Welilongesa okuti Siovaa wati vokuna ovana vena okulongesa ovana vavo onondunge, nokuveyakulila kovivi, nokuvetekula nawa. Ovana vena okulinga onthilo ovo tate yavo, nokuvetavela etyi vapopia. Tupu wamona okuti Siovaa uhanda aveho meumbo velilongesile kumwe Ondaka yae, avakala omapanga ae.
Okupitulula
-
Oityi vokuna ovana vapondola okulinga valongese nawa ovana vavo, aveveyakulila kovipuka vipondola okuvenyona?
-
Oityi ovana vena okulinga tyimoneke umwe okuti vena onthilo novohe?
-
Oityi tyahandela okukoya onthiki noola mamulilongaisa Ombimbiliya amuho meumbo?
KUHANDE OKUOVOLA VALI?
Oityi una okulongesa ovana vove opo tyina vamekulu vakale nonondunge?
“Ovipuka Epandu Ovana Vena Okulongeswa” (Pahukei! No. 2 2019)
Tala oñgeni Ombimbiliya ipondola okukuatesako vana vatekula ovohe vakulupa.
“Oityi Ombimbiliya Ipopia Tyayemba Kokutekula Ovohe Vakulupa?” (Mo jw.org)
Ovana va Abílio vena onondunge, mahi ponthyimbi ankho ketyii etyi ena okulinga atekule nawa ovana vae. Oityi tyemukuatesileko?
Oityi ovohe vapondola okulinga vakale omapanga ovana vavo? Onthele ei ityipopia!
“Oñgeni Ovohe Vapondola Okukala Omapanga Ovana Vavo?” (onthele Yomutala Womulavi)
a Ondaka oyo “okuviyula,” mo Mbimbiliya kaipopi okuveta omunthu, hamwe okumulinga onya. Ipopia okulonga nawa omunthu onondunge, na tyina umwe amapengesa. — Provérbios 4:1.
