Mukuatate wetu onthyolwe:

Ngetyi ove utyii, Ombimbiliya omukanda upopia unene konthele yovanthu. Ovanyingi, ankho ovalume novakai vekolelo vakalele novitateka vielifwa no vietu. Navo ankho ‘ovanthu vala ngonthue.’ (Tiago 5:17) Vamwe vakondyele novitateka, tupu vakalele notyiho. Ovakuavo veihamesilwe omitima no nombunga mbavo, ine na vana ankho vafenda navo. Ovanyingi puvo, velivelele onombei mokonda yovivi valingile.

Okuti ovanthu ovo vayekele-po Jeova avahakondoka vali? Au. Ovanyingi ankho vekahi ngomuhoneki wo no salmu welikuambelele okuti: “Ame ndyienda-enda ngo ongi yavomba. Taindya omuumbili wove. Tyetyi ame halimbuilwe ovitumino viove.” (Salmo 119:176) Okuti nove ukahi ngotyo?

Jeova kalimbwa ovafendi vae vavomba kotyunda. Mahi, uveovola, iya utyilinga pokati kovakuatate vavo. Mongeleka, tala oñgeni Jeova akuatesileko omuumbili wae Jobe, wakalele novitateka ovinyingi. Wapesekele kovipako viae, no kovanthu ehole, tupu avele unene. Jobe tupu wakondyele nokupopilwa onondaka mbunumanesa, na vana ankho ñgeno vemukuatesako. Mahi, kayekele-po Jeova, namphila momuvo umwe akalele nolusoke luapenga. (Jó 1:22; 2:10) Okuti Jeova wakuatesileko Jobe okukala vali nolusoke luaviuka?

Onkhalelo imwe Jeova akuatesileko Jobe, o pokati komufendi mukuavo, ankho utiwa o Eliuu. Putyina Jobe apopia ovitateka viae, Eliuu emutehelela, iya nae apopi. Oityi ankho ñgeno apopia? Okuti ñgeno ankho uyayesa Jobe ine okumupopila ovipuka vilivelesa onombei? Okuti Eliuu ankho usoka okuti omunene vali ku Jobe? Au! Kononkhono mba Huku, Eliuu apopila Jobe okuti: “Ku Huku yotyotyili, ame ndyikahi vala ngo ove. Na ame napolwa meheke.” Tupu ati: “Ame, hikutilisa owoma. Iya etyi ndyipopia katyikulemena.” (Jó 33:6, 7) Eliuu kayawisile kovitateka via Jobe, mahi, noluembia, wemupakelelemo, nokumupameka.

Mbambavo, noñgonoka okuti, nonthue tualinga ombruchula ei pala okukupameka, nokukupakelamo. Tete, tuatehelela nawa, iya atusokolola nawa konthele yetyi tyapopia vamwe vayapukile motyili. (Provérbios 18:13) Nomalikuambelo, atuovolola nounkhengela Movihonekwa, omahipululo alekesa oñgeni Jeova akuatesileko ovaumbili vae kohale vali novitateka ngo ovio. Okuhulililako, atuhonyeka omahipululo oo Ovihonekwa, no nongeleka mbo hono, opo tulinge ombruchula ei. Tukuita nomutima auho opo utange nounkhengela omukanda ou. Mbambavo, noñgonoka okuti tukuhole unene.

Ononkhalamutwe mbo Nombangi mba Jeova