OKUTI nove walambelele motyitateka ngo tya Linda weihamenenue unene komutima, mokonda yetyi alingilwe nou vafenda nae? Ovanthu vamwe vehole okusoya mokonda yovituwa via vakuavo. Iya otyo atyikalesa omapita oupanga wavo na Jeova. Okuti nove walambelele motyitateka ngotyo?

Tyotyili, tyipondola okutupuiya unene okuevela omukuatate wetu ine omphange wetunumanesa. Mahi, Ovakristau vesukisa okukala nohole na vakuavo. (João 13:34, 35) Tyina umwe tufenda nae etulinga omapita, tyipondola okutusoyesa, nokutuihama unene.—Salmo 55:12.

Ombimbiliya ilekesa okuti pamwe Omukristau upondola okulinga otyipuka ‘tyinumanesa’ mukuavo. (Colossenses 3:13) Mahi, inkha onthue tulingwa ngotyo, tyipondola okutupuiya okutetulula otyitateka otyo. Okuti pena etyi tyipondola okutukuatesako? Tala onondonga ononthatu mbo Vihonekwa:

Tate yetu keulu weete atyiho. Jeova weete ovipuka aviho vitumonekela, alo umwe tyina tulingwa onya, nononkhumbi tyituetela. (Hebreus 4:13) Tupu, tyina tumona ononkhumbi, Jeova tyimuihama. (Isaías 63:9) Jeova kayeke “ononkhumbi, ine emone” ine otyipuka otyikuavo, nii omuumbili wae “etuyapule mohole ya Huku.” (Romanos 8:35, 38, 39) Moluotyo, nonthue tuhayekei natyike ine omunthu nawike etuyapule ku Jeova.

Okuevela, ha-kuhesukile netyi walingua. Tyina tuevela vana vetulinga omapita, ha-kuti tuanianga, ine katuesukile netyi vetulinga. Hinangela okuti, Jeova uyele una ulinga onkhali, mahi wevela una walinga onkhali, iya elivele. (Salmo 103:12, 13; Habacuque 1:13) Tyina Jeova etuavela ondundo yokuevela vakuetu, ukahi nokutuita opo tumuhetekele. Jeova “kakala nonkhongo.”—Salmo 103:9; Mateus 6:14.

Tyina tuyekapo onkhongo, onthue muene tupolako ouwa. Ñgeni ngotyo? Tala ongeleka ei: Soka ñgeno upaka onkhanda peke, otandaveka okuvoko. Upondola okukala nayo momuwo wehehi. Mahi, okuti motyivili okukala nayo omuvo omunyingi? Motyivili okukala nayo omuvo ulifwe pi? Onominutu mbumwe? Oola? Ine mokala omuvo omunyingi vali? Tyotyili, mooko ine moponwa unene! Omulemo wonkhanda, kaupiluluka. Mahi inkha ukala nayo ehimbwe, maikulemena vali unene. Nonkhongo ongotyo ikahi. Tyina tukala nayo ehimbwe, tuiihamenwa vali unene komutima. Otyo Jeova etuavelela ondundo yokuyekapo onkhongo. Tyotyili, okuyekapo onkhongo, onthue muene tyietela ouwa.—Provérbios 11:17.

Oityi tyakuatesileko Linda okuhakala nonkhongo namphila alingilwe omapita nou afenda nae? Tyimwe, okusokolola omokonda yatyi Ovihonekwa vipopila okuti tuesukisa okuevela vakuetu. (Salmo 130:3, 4) Haunene, etyi tyapele Linda ondundo, okunoñgonoka okuti inkha tuevela vakuetu, na Jeova metuevela. (Efésios 4:32–5:2) Wapopia oñgeni okusokolola Kovihonekwa tyemukalesile, ati: “Nelitehelela ngatyina o Jeova muene ukahi nokumphopila.”

Mokueenda kuomuvo, Linda etyivili okuyekapo onkhongo. Linda waevela omphange wokuemuhungile, iya pahe omapanga omanene. Otyo, atyavela Linda ondundo yokutualako okuumbila Jeova. Kala nonthumbi yokuti Jeova uhanda okukukuatesako okulinga nga Linda.