ONTHELE 1
“Ongi Yokuavomba Mandyikeyovola”
Soka ñgeno ongi yalimbililwa. Ankho yatalukwa nokulia aiyapuka ko nonkhuavo. Pahe, kaiyeete vali ononkhuavo, nii omunthita. Akuhimbika okunthikovela. Yavombela mohika imwe muna ovinyama, iya pahe ikahi aike. Tyina ikatehela, ondaka yomunthita wayo ukahi nokuhatekela apa ili. Etyi eivasa eyumphulapo, eityindi ponkhondo okuituala keumbo.
OVIKANDO ovinyingi, Jeova ulipopia okuti omunthita. Mondaka yae, wetupopila okuti: “Ame muene mandyikaovola onongi mbange, andyimbuyungu.”—Ezequiel 34:11, 12.
“Onongi Ame Ndyilisa”
Onongi mba Jeova ovalie? Onongi mba Jeova, ovanthu aveho vemuhole, nokumufenda. Ombimbiliya yati: “Tufendei, nokulipetamena. Tuikilei konongolo kolupala lwa Jeova Omutungi wetu. Mokonda oe Huku yetu, iya onthue tuvanthu vae, tupu tu nongi mbae.” (Salmo 95:6, 7) Ngo nongi mbulandula omunthita wambo, ovafendi va Jeova vahanda unene okulandula Omunthita wavo. Okuti kavapengesa? Vapengesaumwe. Pamwe, ovaumbili va Huku vakala ngo “nongi mbeliyapauka,” ngo “nongi mbavomba,” ngo “nongi mbayapuka” mo nonkhuavo. (Ezequiel 34:12; Mateus 15:24; 1 Pedro 2:25) No ngotyo, tyina omunthu umwe amayapuka, Jeova nkhele ukevela akondoke.
Tyina usoka, okuti Jeova nkhele Omunthita wove? Oityi tyilekesa okuti Jeova na hono Omunthita? Tala ononkhalelo ononthatu:
Ututekula nondaka yae. Jeova wati: “Mandyikembulisila monohika mbayova nawa. Mambukaombela mohika ongwa, ambukalila monohika mbayova nawa.” (Ezequiel 34:14) Jeova apeho utuavela okulia kupameka oupanga wetu nae momuvo watyo. Okuti uhinangela onthele imwe momikanda vietu, ine ovidiu, yakumbulula elikuambelo liove? Otyo katyekukalesile nonthumbi yokuti Jeova usuka nove?
Jeova utuyakulila, nokutukuatesako. Jeova walaa okuti: “Ongi yokuayapuka po nonkhuavo mandyikeikondola-po, yokuateka mandyiikutu, yokuavela mandyiipameka.” (Ezequiel 34:16) Jeova upameka vokuasoya ine vena otyiho otyinene. Ukuta onongi mbae, mokumbukuatesako okuveluka inkha mbeihamenwa, alo umwe inkha mbeihameswa omutima na vana vafenda navo. Tupu ukondola motyunda una wayapuka, na una hamwe ukahi nokulwa nomalusoke ahaviukile.
Jeova utyii okuti tutei kwe. Jeova wati: “Mandyikembupola ko nomphangu ambuho mbeliombaila. Yokuavomba, mandyikeyovola.” (Ezequiel 34:12, 16) Ku Jeova, ongi yavomba, ipondola okuvasiwa. Tyina ongi yavomba, Jeova wiyongola, ekeyovola. Iya tyina ameivasi uhambukwa unene. (Mateus 18:12-14) Tyotyili, Jeova wihana ovafendi vae votyotyili okuti “onongi mbange, onongi ame ndyilisa.” (Ezequiel 34:31) Ove, ove umwe po nongi ombo.
Ku Jeova, ongi yavomba, ipondola okuvasiwa. Jeova uhambukwa tyina amavasi ongi oyo
“Yeka Ovipuka Aviho Vikale ngo Kohale”
Omokonda yatyi Jeova ekuovolela, nokukuita opo ukondoke kwe? Omokonda uhanda ove ukale nehambu. Jeova walaa okuti, “ononkhano onongwa” makaavela onongi mbae “mambukauyuka ngombila.” (Ezequiel 34:26) Omulao oo, owotyotyili. Tutyii okuti ove wamona-monale ovipuka vilekesa okuti omulao oo owotyotyili.
Mongeleka, hinangela pomuvo wahimbika okunoñgonoka Jeova. Oñgeni wakalele onthiki yo tete wanoñgonoka otyili konthele yenyina lia Huku, netyi ahandela ovanthu? Okuti uhinangela ehambu ankho ukala nalio tyina uliongiya novakuatate vove Ovakristau movionge? Onthiki waivisile omunthu onondaka onongwa, etavela, kuakondokele keumbo nehambu enene?
Ove upondola okukala vali nehambu lituka kovipuka ovio. Ovaumbili va Huku kohale, velikuambelele okuti: “Tukondole kuove Jeova, iya onthue matukala tyafuapo pala okukondoka kuove. Yeka ovipuka aviho vikale ngo kohale.” (Lamentações 5:21) Jeova wakumbululile elikuambelo olio, iya ovanthu vae avakondoka, avahimbika okumuumbila vali nehambu enene. (Neemias 8:17) Tupu Jeova malingi ngotyo nove.
No ngotyo, okukondoka ku Jeova katyapepukile. Tala ovitateka vimwe vipondola okutyika omunthu okukondoka ku Jeova, no ñgeni upondola okuvitetulula.
