OVANTHU aveho vakala notyiho, alo umwe vana vafenda Huku. “Omalusoke ange okunthyukalalesa, alinga omanyingi momutima wange.” (Salmo 94:19) Iya Jesus wapopile okuti mokueenda kuomuvo wonthyulilo, “okusukalala novipuka viomuenyo,” matyikala otyitateka ku vana vaumbila Jeova. (Lucas 21:34) Okuti noove otyo ukahi? Okuti oluhepo, novitateka mombunga, ine ovitateka viekongoko, viekulemena unene? Oñgeni Jeova apondola okukukuatesako okutetulula ovitateka ovio?

Onthue atuike, katutyivili okutetulula ovitateka vietu. Apostolu Paulu wahoneka okuti: “Tuahitakana nononkhumbi ononyingi mbutunda kononthele ambuho . . . Tunguanguana . . . tulemenwa novitateka.” Mahi, tupu wati: “Katuhitakana tyihevili okuliviya,” “katulimbililwa tyihei etyi matulingi,” iya “katuhanyua-ko.” Oityi tyitukuatesako okukoleleya? Tyitukuatesako “ononkhono mbavilapo” mbutunda ku Huku yetu wepondolo aliho, Jeova.—2 Coríntios 4:7-9.

Nkhele hinangela oñgeni kohale wakuatesilueko “nononkhono mbavilapo” mba Jeova. Okuti uhinangela elongomona limwe liekukuatesileko okupanda vali oluembia olunene lwa Jeova? Tyina ankho ulongesa vakuenyi konthele yekevelelo Liomphangu Yombembwa, katyapamekele ekolelo liove momilao via Jeova? Tyina tuenda komaliongiyo Ovakristau, nokupopila vakuetu konthele yetyi tulilongesa, tukala nononkhono mbokukoleleya omasukalalo omuenyo, tupu tukala nombembwa yo komutima opo tuumbile Jeova nehambu.

Tyotyili, upondola okukala nomitima vivali momuvo wike vala. Mongeleka, Jeova utuita opo tuovole tete Ouhamba wae, nokutualako novilinga vitukuatesako okupameka oupanga wetu nae. (Mateus 6:33; Lucas 13:24) Mahi, oityi molingi inkha uyalwa, uvela, ine ukala novitateka mombunga? Iya inkha ovilinga viove vikuponeswa, nokukumana vali omuvo tyipona evi ulinga mewaneno? Okukala novilinga ovinyingi unene, nomuvo uhehi pala okuvilinga, tyipondola okukulemena. Hamwe alo umwe uhole okulipula inkha Jeova uhanda ove ulinge etyi uhevili.

Jeova utwii nawa. Ketuiti etyi tuhevili okumuavela. Tupu utyii okuti opo omunthu aveluke omutima, akala vali nehambu ankho ena, tyesukisa omuvo.—Salmo 103:13, 14.

Mongeleka, tala oñgeni Jeova akuatesileko omuuli Eliya. Pomuvo umwe, Eliya wasoyele, tupu akala nowoma, iya akaholama moluhandya. Okuti Jeova wemukandukilile, emuti kondoka kovilinga viove? Au. Movikando vivali,  Jeova watumine oandyu opo imupahule-po noluembia, opo imuavele okulia na alie. No ngotyo, mokueenda kuononthiki 40, Eliya nkhele ankho una otyiho, nowoma. Oityi vali Jeova alingile opo emukuateseko? Tete, Jeova walekesile okuti upondola okumuyakulila. Vali, Jeova wapamekele Eliya “nondaka yavova-po.” Konyima, Jeova emupopila okuti kuna vali ovanthu ovanyingi vekolelo vekahi nokufenda Huku. Kapakalele ehimbwe, Eliya akala vali nombili movilinga viae viokuula. (1 Reis 19:1-19) Otyo tyitulongesa tyi? Puetyi Eliya ankho alemenwa notyiho, Jeova wakalele noumphua-lundo nae, nokankhenda. Jeova kapilulukile. Usuka nonthue ngetyi ankho esuka na Eliya.

Tyina usoka kuetyi upondola okulingila Jeova, kala omukuatyili. Uhaeleke etyi uvila okulinga hono netyi walingaile kohale. Mongeleka: Omunthu wokuhateka opo afetwe, inkha ukala omanima ine onohanyi ononyingi otyo ahahateka, tyina ahimbika vali kapondola okuutuka vala natyo. Mahi, una okuhimbika katutu-katutu alo akala nononkhono, etyivili okuhateka ehimbwe. Ovakristau vekahi ngovanthu vokuhateka. Velilongesa mokonda vena etyi vahanda okuvasa. (1 Coríntios 9:24-27) Ovola okulinga otyipuka tyimwe uvila pehepano tyipondola okukukuatesako okukondoka ku Jeova. Mongeleka, upondola okulinga omphango yokuenda komaliongiyo ewaneno. Ita ku Jeova opo ekukuateseko okulinga etyi wapanga. Putyina upameka vali oupanga wove na Jeova, “mohetekela, iya otale okuti Jeova omuwa.” (Salmo 34:8) Hinangela okuti, kese otyipuka ulinga pala okulekesa okuti uhole Jeova, namphila hamwe otyitutu, Jeova metyipande unene.—Lucas 21:1-4.

Oñgeni Jeova akuatesileko omphange June okukondoka kwe? June wati: “Natuaileko okulikuambela ku Jeova, okuita opo ankhuateseko. Omonaivi ine omukuekai wange, amphopila okuti mepundaumbo ndyikala mamulingilwa otyonge. Andyitokola okuenda-ko. Nahambukilwe unene okukala vali pokati kovanthu va Jeova! Otyonge otyo, ankho ombatelo nesukisa. Pahe ndyikahi nokuumbila vali Jeova. Omuenyo wange ukahi vali nawa. Tyihe otyo vala, ame ndyityii okuti nesukisa ovakuatate vange no nomphange, nokutavela tyina vankhuatesako. Ndyipandula unene mokonda nkhele ankho pena omuvo wokukondoka ku Jeova.”