Siovaa Huku Omutungi wetu. Watunga ovipuka aviho, evi tupondola okumona neevi twahamono. Etyi ehenetunge ovipuka tupondola okumona, Huku watunga onoandyu ononyingi. Okuti ove utyii oñgeni onoandyu mbukahi? Onoandyu ovanthu Siovaa atunga velifwa nae. Katupondola okumona onoandyu, ngeetyi twahapondola okumona Huku. Oandyu yotete Siovaa atunga yemukwatesileko okutunga ovipuka ovikwavo. Povipuka ovio pati umwe nononthungululu, nohi, novipuka ovikwavo. Ohi yatungwa opo ikale eumbo lietu.

Konyima Siovaa alingi nawa ohi opo ovinyama novanthu vakale-mo. Watunga ekumbi opo limimikile ohi. Watunga onomphunda, nelunga, nonondongi.

Oityi vali alinga? Siovaa wati: ‘Mandyilingi eholi, nomiti viima ovinyango vielikalaila nononthemo mbelikalaila.’ Etyi alinga ovipuka ovio, Siovaa alingi ovinyama ovinyingi, vimwe vinthanana, vimwe vikala momaande, vimwe vilikoka, ovikwavo vieenda. Vimwe ovitutu ngeetyi ovindimba, ovikwavo ovinene ngeetyi onondyamba. Otyinyama patyi ove uhole vali?

Pahe Siovaa apopila oandyu yotete okuti: “Tulinge omunthu.” Ovanthu velikalela novinyama. Ovanthu vapondola okulinga ovipuka ovinyingi, okupopia, nokuyola, nokulikwambela. Ovanthu vapelwe  otyilinga tyokuyunga ohi novinyama. Okuti ove wii olie omulume wotete? Tutalei.