Nthiki imwe, Ohamba Nambukondonosole walotele ondyoi imwe, amono otyipuka ehenemone. Ondyoi oyo aimulingisa unene otyiho, ahamono olumphoki. Aihana vokwatambula, evepopila okuti: ‘Hangununei ondyoi nalota.’ Avati: ‘Tupopile ondyoi, Hamba.’ Mahi Nambukondonosole eveti: ‘Au! Popiei etyi nalota, ankho kamutyipopi mandyimwipaa.’ Avemuti: ‘Tupopile ondyoi yove opo onthwe tutyivile okwihangununa.’ Ohamba aiti: ‘Onwe mukahi nokunkhinkhilinya. Mphopilei ondyoi yange!’ Avapopila ohamba okuti: ‘Petupu nawike utyivila okulinga otyipuka otyo. Waita otyipuka tyihevilwa.’

Nambukondonosole anumana unene, atumu okwipaa ovanongo aveho vomotyilongo. Povalume ovo ankho pena Ndaniyele na Sandalake na Mesake na Ambendeneku. Ndaniyele akapopia nohamba ati kevele-po vala katutu, mandyipopi ondyoi yove. Ndaniyele nomapanga ae avaiti ku Siovaa opo evekwateseko. Oityi Siovaa alingile?

Siovaa apopila Ndaniyele etyi ondyoi ya Nambukondonosole ihangununa. Muhuka tyee, Ndaniyele apopila omuundapi umwe wohamba ati: ‘Mwahaipaei omunthu nawike. Ame mandyipopi ondyoi yohamba.’ Omuundapi wohamba atwala Ndaniyele kohamba. Ndaniyele apopila ohamba okuti: ‘Huku ukahi nokukupopila etyi matyikamoneka noove komutwe wandyila. Ondyoi yove oyei: Ove wamona otyilolo tyina omutwe woolu, onthulo nomakuvoko oviopalata, eimo novitumbo oviotyivela tyikuhukila, ovikalo nonomphai oviotyivela tyahonya nonthata. Komphunda akutundu emanya limwe, alivete konomphai mbotyilolo. Otyilolo atyityatyaula atyikala ombuma. Emanya lina alityituka omphunda, aihiki eheke aliho.’

 Ndaniyele apopi etyi tyihangununa ondyoi ati: ‘Omutwe woolu wotyilolo ove hamba. Opalata ouhamba maukupingi. Ouhamba oo haa aukapingwa nouhamba omukwavo ukahi ngotyivela tyikuhukila, mautumina ouye auho. Pahe akuya vali ouhamba omukwavo wapama ngotyivela. Okuhulilila-ko, makuya ouhamba wahapamene ngonthata. Emanya malitundu komphunda, Ouhamba wa Huku. Ouhamba oo mauhanye-ko omauhamba aeho, aukatumina apeho.’

Etyi Nambukondonosole etyiiva, aikila konongolo komutwe wa Ndaniyele. Apopi okuti: ‘O Huku yove wekupopila ondyoi oyo. Kutupu nawike welifwa na Huku yove.’ Nambukondonosole ahaipaa Ndaniyele mahi wemulinga akale onkhalamutwe yovalume aveho ovanongo, akala omutumini wo Mbambilonia. Watala oñgeni Siovaa akumbululile elikwambelo lya Ndaniyele?