Ohamba onkhwavo yo Mbambilonia o Ndaliu omu Mendia. Ndaliu ankho utyii okuti Ndaniyele wii vali ovipuka tyipona vakwavo. Emwavela otyilinga tyokukalela komutwe vokuundapa mombala yo Mbambilonia. Ovalume ovo avalu onkhi na Ndaniyele, avahande okumwipaa. Ankho vetyii okuti Ndaniyele ulikwambela ku Siovaa tutatu monthiki, avapopila Ndaliu okuti: ‘Hamba, paka-ko otyitumino tyipopia okuti ovanthu aveho vena vala okulikwambela kwoove. Una wehetavela otyitumino otyo, ayumbwe meleva liononkhulika.’ Ndaliu etavela, apake-ko otyitumino otyo.

Etyi Ndaniyele eiva otyitumino otyo, aende keumbo liae. Anyingila mondywo, aikula ondyanena, aikila konongolo elikwambela ku Siovaa. Vana vokumulwa onkhi avanyingila mondywo yae avemuvasi ulikwambela. Avaende nokuhateka aveketyipopila Ndaliu avati: ‘Ndaniyele ketavelele otyitumino tyove. Ulikwambela ku Huku yae tutatu monthiki.’ Ndaliu ankho uhole Ndaniyele, kahande ankhie. Akala onthiki aiho otyo asoka etyi malingi ayovole Ndaniyele. Mahi ankho kapondola vali okupilulula otyitumino tyina mokonda wetyitavela-le. Atumu ovalume vakapole Ndaniyele, avekemuyumba meleva liononkhulika.

 Onthiki oyo Ndaliu ahalala, mokonda walinga unene otyiho na Ndaniyele. Etyi kwatya, aende nokuhateka ai no keleva, aihana Ndaniyele ati: ‘Okuti Huku yove wekuyovola?’

Ndaliu eivi ondaka. Ankho oya Ndaniyele! Yapopila Ndaliu okuti: ‘Oandyu ya Siovaa yaika omilungu viononkhulika. Ndyikahi nawa.’ Ndaliu ahambukwa unene! Atumu vapole Ndaniyele meleva. Ndaniyele ankho utupu apa anyawa. Ohamba aiti: ‘Ovalume vana aveho vatendeleya Ndaniyele veyumbei meleva.’ Etyi vayumbwa meleva, ononkhulika ambuveli-po.

Ndaliu apopila ovanthu vomotyilongo ati: ‘Amuho muna vala okufenda Huku ya Ndaniyele. Wayovola Ndaniyele kononkhulika.’

Ove ulikwambela ononthiki ambuho ku Siovaa nga Ndaniyele?