ELONGESO 58
O Selusalei Yahanywa-po
Ovanthu vomo Sundaa vayeka-po Siovaa, avahimbika okufenda ono huku mbomatutu. Siovaa watumine ovauli ovanyingi opo vevelondole, mahi avehetavela. Avahimbika okulinga omukwele ovauli. Oityi Siovaa alingile opo amaneko efendelo liomatutu?
Ohamba yo Mbambilonia Nambukondonosole yalwisile ovilongo ovinyingi avilingi viae. Onthiki yo tete yeile okulwisa o Selusalei, akwate ohamba Swakii, novakwatesiko vohamba, novakwa-vita novanthu ovakwavo, evetwala ko Mbambilonia. Atyindi-po ovityuma vyo mondywo ya Siovaa. Nambukondonosole alingi Sendekiya ohamba yomo Sundaa.
Potete ankho Sendekiya utavela ku Nambukondonosole. Mahi ovanthu vovilongo ovikwavo novauli vomatutu, avahindila Sendekiya opo atyitukile-po ohamba yo Mbambilonia. Selemiya emulondola ati: ‘Ine utyitukila-po ohamba yo Mbambilonia, ovanthu vomo Sundaa mavankhi, motyilongo mamukala ondyala onene.’
Etyi pakala omanima etyinana, Sendekiya atyitukila-po Ombambilonia. Aiti kohamba yo Isitu ovakwa-vita opo veye vemukwateseko. Nambukondonosole atumu ovakwa-vita vakalwise o Selusalei, avaongo onthanda popepi nepunda-umbo. Selemiya apopila Sendekiya okuti: ‘Siovaa wati lifefei kova Mbambilonia opo epunda-umbo liahahanywe-po. Mahi ine kamulifefe kwe, ova Mbambilonia mavahanye-po o Selusalei, ove otwalwa koupika.’ Sendekiya ati: ‘Ame hilifefe kova Mbambilonia!’
Etyi palamba enima like notyihupe, ovakwa-vita voko Mbambilonia avanyingila mepunda-umbo lyo Selusalei avapake-mo otupia. Avayoko-po ondywo ya Huku, avaipaa ovanthu ovanyingi, ovakwavo avevetwala koukonde ko Mbambilonia.
Sendekiya atundu mo Selusalei akahateka, mahi ova Mbambilonia avemulandula. Avemuvasi popepi no Selikoo, avemukwate avemutwala ku Nambukondonosole. Ohamba yo Mbambilonia aitumu ovana va Sendekiya vaipawe otyo Sendekiya atala. Konyima, Nambukondonosole atiula Sendekiya omaiho, emupake mokaleya ngamo ankhila. Mahi Siovaa apopila ovanthu vomo Sundaa okuti: ‘Tyina pamalambe omanima 70 mandyimukondola keumbo lienyi ko Selusalei.’
Ovakwendye vokwatwailwe koukonde ko Mbambilonia valingilwe ñgeni? Okuti vakakatelele mu Siovaa?
“Siovaa Huku, Muvili wa atyiho, onomphela mbove o mbotyili, mbuviuka.” — Eholololo 16:7
