Siovaa wakoyele Selemiya opo akale omuuli wovanthu voko Sundaa. Siovaa watumine Selemiya akapopile ovanthu okuti vesukisa okuyeka-po okulinga ovivi. Mahi Selemiya ehetavela, ati: ‘Siovaa, nkhele ndyimona. Hityivili okupopia novanthu.’ Siovaa emuti: ‘Wahatile owoma. Ame mandyikupopila etyi mokapopia. Ame mandyikukwatesako.’

Siovaa apopila Selemiya ati, enda kapopie novakulu vomo Sundaa, otyatyula ombiya otyo vatala, pahe ovepopila okuti: ‘O Selusalei maikala ngovikola evi.’ Etyi Selemiya apopia onondaka mba Siovaa, ovakulu avanumana unene. Omunakwa umwe utiwa o Pasule avete Selemiya, emukutu kovikalo no komavoko, emukutila mepundi. Selemiya alala tyakutilwa mepundi omo, ankho ketyivili okuliviya. Muhuka tyee Pasule emukutulula. Selemiya apopi okuti: ‘Himalingi vali otyilinga etyi. Himaivisa vali.’ Okuti kaivisile umwe vali? Au. Etyi Selemiya asoka vali nawa, apopi okuti: ‘Onondaka mba Siovaa mbukahi ngotupia mokati kange. Ame hipondola okuyeka-po okwivisa.’ Selemiya atwalako okulondola ovanthu.

Etyi palamba omanima amwe, mo Sundaa amutumina ohamba onkhwavo. Ovanakwa novauli vomatutu ankho veyele Selemiya. Avapopila ovakwatesiko vohamba okuti: ‘Omulume ou una okwipawa.’ Selemiya ati: ‘Inkha mundyipaa mamwipaa omunthu wehena etyi alinga. Ame napopia onondaka mba Siovaa, hapopile onondaka mbange.’ Etyi ovakwatesiko vohamba veiva etyi tyapopia Selemiya avati: ‘Omulume ou kapondola okwipawa.’

Selemiya atwalako okwivisa, ovakwatesiko vohamba avanumana  unene. Avaiti kohamba opo vaipae Selemiya. Ohamba aipopi okuti mupondola okulinga Selemiya etyi mwahanda. Avakwate Selemiya avemupake monyombo yaya kohi, muna onthata, Selemiya otyo pahe anyingila umwe kohi monthata omo.

Omulume umwe utiwa o Embende-Meleke apopila ohamba okuti: ‘Ovakwatesiko vohamba vapaka Selemiya monyombo! Inkha kapolwa-mo mankhi.’ Ohamba aitumu Embende-Meleke vende novalume 30 opo vakapole Selemiya monyombo. Selemiya vemulingile ovipuka ovinyingi ahaivise vali, mahi ahatalama okwivisa. Noove kuhande okulinga nga Selemiya?