Sitele ankho omuhikwena umwe omu Sundaa ukala mo Pelesa mepunda-umbo lyo Susaa. Tundee apa Nambukondonosole apola ombunga yae mo Selusalei, ankho palamba-le omanima omanyingi. Sitele ankho ukala nomphange yae Molondekai velikwai movohe, omuundapi Wohamba Asuwelu woko Pelesa.

Ohamba Asuwelu ankho uhanda omukai omukwavo. Ovaundapi vae avemwetela ovahikwena ovawa vo motyilongo, pati na Sitele. Povahikwena ovo aveho, ohamba aikoyo-po Sitele akale omukai wae. Molondekai atolela Sitele ati wahatie ndyimu Sundaa.

Ankho kuna omulume umwe ulipaka-ko unene utiwa o Hamaa, wakalela komutwe ovatumini vakwavo. Ankho uhanda tyina ovanthu aveho vemumona vaikila konongolo. Molondekai aanye okutyilinga, Hamaa anumana unene ahande okumwipaa. Etyi Hamaa etyinoñgonoka okuti Molondekai omu Sundaa, alingi omphango yokwipaa ova Sundaa aveho vomotyilongo. Atolela ohamba okuti: ‘Ova Sundaa ovakalavi, ñgeno aveho vaipawa.’ Asuwelu ati: ‘Linga etyi uhanda, paka-ko otyitumino.’ Hamaa apake-ko otyitumino ati: ‘Ipaei ova Sundaa aveho monthiki ya 13 yohanyi ya Andale.’ Siovaa ankho utyiete.

Sitele ankho kei otyitumino otyo. Molondekai atumu omukanda muna otyitumino otyo ku Sitele, emupopila okuti: ‘Enda kapopie nohamba.’ Sitele apopi okuti: ‘Omunthu wenda kohamba tyahaihanenwe upondola okwipawa. Ame ndyina ononthiki 30 otyo nahaihanwa nohamba! Mahi mandyende-ko. Ine utandaveka otyimuti tyae, mandyihupu. Ine katandaveka, mandyinkhi.’

Sitele aende kohamba. Etyi ohamba yemumona, aitandaveka otyimuti. Aimupulu okuti: ‘Oityi uhanda ndyikulingile,  Sitele?’ Sitele apopi okuti: ‘Endywei hono na Hamaa mulie mandyikemutelekela-po.’ Pokuna nokulia Sitele eveti, muhuka endywei vali, mandyimutelekela-po. Etyi veli nokulia, ohamba aimupulu vali okuti: ‘Oityi uhanda nkhulingile?’ Sitele ati: ‘Pena omunthu uhanda okundyipaa kumwe novanthu vange. Tuyovole-vo.’ Ohamba aimupulu okuti: ‘Olie uhanda okumwipaa?’ Sitele ati: ‘Omulume ou, ondingavivi Hamaa.’ Asuwelu anumana unene atumu Hamaa aipawe.

Mahi ankho petupu omunthu upondola okupilulula otyitumino tya Hamaa, nohamba umwe kaipondola okutyipilulula. Ohamba ailingi Molondekai omutumini, emuti paka-ko otyitumino otyikwavo. Molondekai apake-ko otyitumino tyipopia okuti tyina ova Sundaa vameya okulwiswa navo valwe na veliyakulile. Monthiki 13 ya Andale, ova Sundaa navo avalu, vokuveyele avatili-ko. Ova Sundaa avalingi otyipito. Okutuka umwe opo, omanima aeho valinga otyipito tyonthiki oyo vayovoka.