Etyi pakala, Mbeletesasale akala ohamba yo Mbambilonia. Nthiki imwe kounthiki, alingi otyipito tyimwe otyinene, akongo ovanthu 1.000 ovanene vatyo vomo Mbambilonia. Ohamba aitumu ovaundapi vayo vaete onokopo mboolu Nambukondonosole apolele mondywo ya Siovaa. Mbeletesasale novanthu ovakwavo veli motyipito, avanwina monokopo ombo otyo vahivilika onohuku mbavo. Tyina vakatala-ko, okuvoko kukahi nokuhoneka motyimato onondaka mbeheiwe.

Mbeletesasale atili owoma. Aihana ovatali evepopila okuti: ‘Omulume utanga onondaka ombu, amphopila etyi mbupopia, malingi omutumini wa tatu mo Mbambilonia.’ Ovatali avaloloko, mahi avehetyivili okupopia etyi mbupopia. Tembwa otyilongo eya apopi okuti: ‘Kuna omulume umwe utiwa o Ndaniyele ankho uhole okupopila Nambukondonosole etyi tyipopia onondyoi mbae. Mekupopila etyi tyipopia onondaka ombu.’

Ndaniyele eya kohamba. Mbeletesasale emupopila okuti: ‘Ine ove utyivila okutanga onondaka ombu, omphopila etyi mbupopia, movalekwa okalienge koolu pomunyino, olingi omutumini wa tatu mo Mbambilonia.’ Ndaniyele ati: ‘Ame hihande okupewa natyike, mahi mandyikupopila etyi onondaka ombu mbupopia. Tate yove Nambukondonosole mokonda ankho una omalityindailo, Siovaa emukondola koututu. Ovipuka ovio ove uvii umwe nawa, mahi ove welipaka kounene, uhanda okulitalelapo na Siovaa, ukahi nokunwina ovinyu monokopo mboolu mbatunda mondywo Yae. Otyo Huku ahonekela onondaka ombu mbati: Mene, Mene, Tekel, Parsim. Onondaka ombu mbupopia okuti ova Mendia nova Pelesa maveya okuhanya-po o Mbambilonia, ove kumakala vali ohamba.’

Ovanthu ankho vasoka okuti petupu omunthu nawike utyivila okuhanya-po o Mbambilonia. Epunda-umbo olio ankho lina ovimato viapama  viaya peulu, nondongi imwe yaya kohi. Mahi motyinthiki tyatyo omo, ova Mendia nova Pelesa aveya okulwisa epunda-umbo. Ohamba yo Pelesa itiwa o Silu aiyapula omaande ondongi, ovakwa-vita vayo avanyingila mepunda-umbo. Etyi vehika pomapito aveevasi eumbululu! Ovakwa-vita avanyingila, avaipaa ohamba, epunda-umbo alilingi liavo. Silu akala omutumini wo Mbambilonia.

Etyi palamba enima, Silu apopila ovanthu aveho ati: ‘Siovaa wamphopila ndyikapindule-po ondywo yae mo Selusalei. Aveho vahanda okwenda ko Selusalei vakapindule-po ondywo ya Huku vende.’ Ngeetyi Siovaa apopile umwe, etyi palamba omanima 70 okutuka apa o Selusalei yahanywa-po, ova Sundaa ovanyingi avakondoka kotyilongo tyavo. Silu akondola onokopo mboolu no mbopalata novipuka ovikwavo Nambukondonosole apolele mondywo ya Huku. Wetyimona etyi Siovaa alingile opo Silu akwateseko ovanthu Vae?